¹ Pien iswil obedo Tipo me jamini abeco kame tie bino, kalikame tie cal jame nogo kalikame kede jame ayala kame gin kimio mwaka kede mwaka medo mino jo bino iye poore. ² Pi mam oudo koto gin ki jiko mino gi ayala? Pien be jo kamio wor pore bed li kede niang ikom dub. ³ Do ikom gi ayala nogo tie iyutun atimere di wok ikom dub bul mwaka. ⁴ Pi likame etwerere ne remo me twonin kede diegi kwanyo tenge dub. ⁵ Pimano di bin en ebino ilobo, eyamo be, gi ayala kede gi amia likame twero, do kom kame in iko na. ⁶ I gi amia kame owango kede gi ayala pi dub likame yomo cunyi. ⁷ Di ako yamo, neni, ango abino bala kame awandiko kede itabu pira pi timo mit ni, okwe Rubanga. ⁸ Oki eyamo be, "gi ayala kede gi amia me awanga kede gi amia me dub en likame emito, bobo eli kede yom cuny iye, kame omio di lubere kede iswil. ⁹ Di bobo eko yamo, "neni, ango abino pi timo mit ni". okwe Rubanga, eko kwanyo tenge me agege, me esipakino me are. ¹⁰ Pimano wan obino lengere di obeo igi ayala me kom Yesu Kristo i cel atwal. ¹¹ Buli ngasaseredoti poore cungo timo tic kede mino gi ayala kame onyogonyogo kalikame twero kwanyo tenge dub. ¹² Do dano ni, ingei en jalere pi dub atwal, eko bedo i bad tetucam ka Rubanga. ¹³ Geno ikare no paka na tuno di enyono jo kwor mege I piny me tiene. ¹⁴ Pien gi amia acel okelo poore atwal but jo kame otieko lonyo. ¹⁵ Pimano Tipo kacil da tie mujura but wa; pien ingei mano eyamo da pwodi. ¹⁶ "Man en obedo isikan kame abino timo kede gi ingei ceng go, Rwot en oyamo, abino keto iswilia na iyi cuny gi, kede itam gi abino wandiko gi. ¹⁷ Dub gi kede gi kareco gi likame abino yutuno bobo. ¹⁸ Nan kame kwanyo magi tenge tie iye likame tie bobo gi ayala me dub. ¹⁹ Imiegu dido wan otie jing pi donyo i kabedo me cilo di beo iremo ka Yesu. ²⁰ Kede kuo kanyen kame en elonyo wa pire, di beo iye i senge kame tie i kome. ²¹ Kede bedo tie kede ngasaseredoti adwong adaro ot ka Rubanga. ²² Wek do odoki iyapi kede ateni icuny i gen opong me yei, bedo di cuny wa olwokere ikom ngec arac, kede kom wa di olwokere kede pi kacil. ²³ Wek do omakunu kitek gi kame otuco nu kamako yei wa abongo ayangyangun; pien ngat ociko wa genere. ²⁴ Kede wek oparunu pi ngat acel acel pi mino bedo iye amara kede tice ko poore. ²⁵ Di likame owekunu bino karacel icokeren, bala kame jo mogo timo kede; do ocuk cuny dano acel acel; bala kame oneno ceng odoko iyapiyapi kede. ²⁶ Kame wan odubo imit wa ingei wan udo ngec me ateni, likame tie gi ayala odong bobo pi dub. ²⁷ Do lworo aneno tie pi ngol kede gero aliet kame bino camaro jo kwor. ²⁸ Ngat kame cao iswilia ka Musa to bongo kisa, ijura me jo are ara adek; ²⁹ Etie me acano alit, ter bala, ngat kame oparo pi bedo i poore, kame oko nyono piny itien wot ka Rubanga, kede emaro remo me Isikan kame oudo kolonye kede, doko gi kame likame acil, benyo li etimo acae but Tipo kacil me kisa.? ³⁰ Pi wan ongeo en ngat kame eyamo be, nyango kwor tie mera, ango abino culo, di Rwot en oyamo, kede bobo be Rwot oyaro ngolo ne jo mege kop. ³¹ Etie gi me lworo pi poto icing Rubanga ka kuo. ³² Do etie lwongo pi yutuno kare kokato, kame ingei in bedo nyen, i dire iyi adwong me acano; ³³ Itetu cel in oudo ibedo ngat kame oneno leuc kede acano, kede itetucel idoko nga upa me jo kame oudo tio kede gi. ³⁴ Pi in ibedo tie kede kisa ikoma ikom twere na, itero kede ilel ikom dubere me jamini, di ingeo be ibuti itie kede i malo jamini aber kede kame kanyakino. ³⁵ Pimano kur iuc tenge gen ibuti, kane tie kede cul adwong. ³⁶ Pi ipore tie kede mit me dire, wek ingei in timo mit ka Rubanga, wek iud acika. ³⁷ Pi ikare acecek, en ngat kame bin tie bino likame bino gal. ³⁸ Geno nan jo ko poore kuo kede yei, do kame di ngat kamoro odok cen, cunya likame bedo yom ikome. ³⁹ Do wan likame otie gin jo kame dok cen irwenyo; do ikom jogo kame yei pi tuno iye alako me kuo.