1
. Iduwe, winyunu jo nywl wu kii Rwot pien manono en gi ki becokino.
2
. Wor papa ni kede toto ni: (kame obedo icikakin me agege kame tie kede isikan iye)
3
. Kame waco be jame bino timere iber buti dokon in ibino bedo iwi lobo pi kare abor.
4
. Dokon uda jo apapi kur imiunu iduwe wu lilo; do miunu gi ki dongi kii iponeso kede pwony me kop ka Rwot.
5
. Un jo tic, winyunu jokame loo u di lubere kede iik me kom, di itieunu kede iworo kede miel kom kede cuny acel bala itie timo ne Kurisito.
6
. Di likame itimo ki nen me wang, bala dano kame tie yomo cuny jo do bala jo tic ka Kurisito, kame timo mit ka Rubanga kii cuny gi.
7
. Kii mit ka ber di timo tic bala ne Rwot do likame ne jo.
8
. Di ingeunu be gi moro ni kene kene aber kame dano moro timo dinono Rwot oyaro gamo, arabo dono obedo epasoit kame otweo amotoko en etie dano kame likame ko tweo.
9
. Dokon wuda jo pug ipasoi, timunu amanono but gi, di ikanya kinunu ititim: di ingeunu be nga dwong wu da tie malo: di eli kede wor but dano moro dedede.
10
. Me ajikini mere imieguna, bedunu tek kii Rwot kede kii twer me teko mere.
11
. Ngapunu engape ka Rubanga dedede, tetekeny wek itwerunu cungo me lono aboteto ka sitani.
12
. Pien wan likame otie kede twer mogo kede do ked jo pug mogo kede twer mogo kede pug me col piny me lobo ni, kede cuny kareco itek twatwal kame bedo ika bedere amalo.
13
. Pimano ngapunu engape dedede me ka Rubanga, tetekeny wek itwerunu cungo kii ceng ka rac, dokon kame itiekunu tiimo gi dedede me cungo.
14
. Cungunu do pi mano, di itweunu pieru kede ateni, di ingapunu kooru kede nyonyo me poore.
15
. Di tienu engapere kede atemono kin me tero ejiri me anapakin.
16
. Ame kalamo dedede, makunu ebuku me yei, en kame oyaro minou itwerunu kwekweo rasasin me ngarac.
17
. Dokon ngapunu wiu kede alako bala ocoro, di makunu epima me cuny kame obedo kop ka Rubanga.
18
. Legunu lego dedede di ibakunu dog gu didik kii cuny, di kiunu piny kede ikanyakin dedede kede bako dog pi jo acil dedede.
19
. Kede pira ngo me wek mia gi me ayama tetekeny wek ayab doga kede tek cuny me mino mung me ejiri ngere.
20
. Kame ango abedo nga cungo kame kotweo pire: tetekeny wek ikanonon ango ayam kede tek cuny bala kame apaore yamo kede.
21
. Dokon wek uda ingeunu tam nango kede epone kame ango atimo kede jame, Tukiko obedo omin me amara kede ngatic kame genere kii Rwot bino mino wu ngec dedede.
22
. Kame ango aoro butu pi tien kop acel nono, tetekeny wun ingeunu tam wan, dokon wek en etwer kweno cuny.
23
. Anapakin bed but imiegu, kede mar kede yei, kame wok ki but Rubanga papa kede Rwot Yesu Kurisito.
24
. Kisa bed but jo dedede kame maro Rwot wa ki ateni. Amanono (BUt jo me Epeso di ko wandiko ki Roma kibut Tukiko).