1
Paulo, ngaor ka Yesu Kristo di beo ikom mit ka Rubanga, but jo kacil kame tie I Epeso, kede but jo kame genere i Kristo Yesu.
2
Kisa bed butu, kede mulem, kame wok ki but Rubanga Papa wa, kede kame wok kibut Rwot Yesu Kristo.
3
Winyo bed but Rubanga kede Papa me Rwot wa Yesu Kristo, ngat ka omio wa dedede winyo me icuny ikabedere malo i Kristo.
4
Bala kame en eyero wa i en di pwodi cweno piny, be wan pore obed jo kacil kede abongo raco inyime i amara.
5
Emio yer mere but wa pi bedo idwe ikom Yesu Kristo, di lubo tic aber iyom cuny pi mit mere.
6
Tuno i pak me deyo ikisa mere, kame en egam wa i me amara.
7
Ingat a wan oudo olako di beo iremo mere, kede i sasir me dub, di lubere kede abar me kisa mere.
8
Kame en emio but wa i rieko dedede kede gwokere.
9
Emio ongere but wa omung me mit mere, di lubere ibero mere me yom cuny kame eiko kibute kene.
10
Be icobere ipong me kare, en wek ecok karacel jame lung i Kristo ribo mago kame tie imalo, kede kame tie iwi lobo; akadi en.
11
I ngat kame wan oudo gi alunya, pi bedo jo kame oyero di lubere iik me ngat atimo gi dedede ingei tam kame tie imit mere kene.
12
Me wek wan obed ideyo mere, ngat kogeo genere i Kristo.
13
I ngat kame ida igeno, ingei mano in iwinyo kop me ateni, Ejiri me alako nin, i ngat kame ida ingei mano iyei, oko mini alama me Tipo kacil me cikere,
14
Kame tie ud alunya wa tuno i alako me ogamo, ipak me deyo mere,
15
Pimano, ingei ango winyo yei wu i Rwot Yesu, kede amara but jo kacil dedede.
16
Likame ajiko mino pwoc pir wu, di ayutuno wu ilegona.
17
Be Rubanga me ka Rwot Yesu Kristo, Papa me deyo, wek mi but wu cuny me rieko kede yabere i ngec mere;
18
Wang wu me niang med rieny, me wek ingeunu gi kame tie gen me lwongo mere, kede nyo atie i abar me deyo mere i luny me jo kacil.
19
Kede nyo kame kalamo dwongo me twer mere ibut wa jo ko yei, dilubere kede tic mere me teko itwer.
20
Kame en etimo i Kristo, kame en eyaruno kibut jo ko to, kede eketo en i kom i bad tetucam i kabedo me malo.
21
Kaka ber kalamo dedede jo dongo, kede twer, kede teko, kede pug, kede nying lung kame ocako, likame kenekene iloboni, do kede imalo kame tie bino;
22
Kede eketo gi dedede piny me tiene kede omio bute pi bedo ngatel me gi dedede i kanisa.
23
Kame tie kome, i pong me ngat atie lung igi lung.