¹ Saulo da oudo tie yei kede be to mere. I ceng nono tidilo jo koyei Krisito i Yerusalem oko bedo tek, di gin kiko sarakin i adulion dedede me Yudea kede Samaria, kwanyo joor kenekene en oko dong. ² Jo kame bin omio cuny gi woro Rubanga oko tero Sitepano yiko, di kiko koke kede teko. ³ Do Saulo oko tisilaro jo koyei Krisito, edonyo iot acelacel di emako cuo kede mon kame bin oyei Yesu, di emio korwako gi i otkol. ⁴ Pi mano, jo koyei Krisito kame bin osarakin, oko donyo ot ka dedede di kipwonyo kop ka Rubanga. ⁵ Di Pilipo oko ot i bomba me Samaria eko tuco ne gi kop ka Krisito. ⁶ Di jo oko keto tam gi i kom kop kame Pilipo oudo tie yamo, kiwinyo doko kineno gianena kame en oudo etimo. ⁷ Pien tipo kareco oudo bin dwilao kibut jo atot, di kiko wok tenge ikom jo kame gin oudo imako; doko jo atot kame bin tuwo oneko adulion me kom gi kede jo kongwalo oko cango. ⁸ Manoni oko mino jo me bomba nono oko bedo kede ilel adwong. ⁹ Do oudo tie icuo moro kame nyinge Simoni, kame oudo ber ogeo bedo i bomba noni di etio tangu me jwok; en oudo emio jo me Samaria obedo ure: di en oudo ewaco ne gi be en ebedo dano kame pire tek. ¹⁰ Kame jo dedede cako kibut jo me ruom apiny tuno but jo me ruom amalo, oudo keto tam gi i yamo mege, di kiwaco be, “Icuo ni en twer ka Rubanga.” ¹¹ Di jo oudo tie kede wor bute, pien pi kare alac gin kibedo uro tangu mege me jwok. ¹² Do kakame kiyei kede ejiri ka Pilipo me Ajakanut ka Rubanga kede nying Krisito, di oko batiso gi, cuo karacel kede mon. ¹³ Kiton Simoni da kikome oko yei Yesu Krisito; ingei batiso en, en eko donyo upere kede Pilipo; di eko bedo kede ur kakame eneno kede gianena kede giaura adongodongo kame oudo timere. ¹⁴ Kakame joor kame oudo tie Yerusalem oko winyo kede be jo me Samaria ogamo kop ka Rubanga, gin kiko cwano Petero kede Yokana but gi. ¹⁵ Kame gin kiko tuno kede kuno, gin kiko lego ne gi tetekeny kiud Tipo Kacil, ¹⁶ pien oudo pwodi likame ebino i kom ngatamoro kikom gi, do kenekene oudo kobatiso gi i nying Rwot Yesu. ¹⁷ Di do Petero kede Yokana oko keto cing gi i wi gi, di gin kiko pong kede Tipo Kacil. ¹⁸ Kakame Simoni oneno kede be Tipo Kacil obino i kom jo, pien joor oudo oketo cing gi i wi gi, en eko kwanyo ne gin sente. ¹⁹ Di ewaco be, “Okwe miunu ada twer noni, me wek ngat acelacel kame ada aketo cinga i wie, eud Tipo Kacil.” ²⁰ Do Petero oko waco ne be, “Sente ni rweny karacel kede in, pien in iparo be giamia ka Rubanga kowilo kede sente! ²¹ In ili kede gikame opoko ni arabo dul moro ikom tic wan ni, pien cunyi likame opoore i nyim Rubanga. ²² Pi mano, swilaro ikom gikarac ni, di iko kwano Rubanga wek amoto eko sasiro in ki tam kame tie i cunyi. ²³ Pien ango atieko neno be in itie kede cuny akec, doko dub otieko tweni idoko epasoit mere.” ²⁴ Di do Simoni oko dwoko di ewaco be, “Legunu Rwot pira, me wek kur gimoro kikom kope kame in iwaco go timere i koma.” ²⁵ "25 Di do gin, ingei mino caden kede pwonyo kop ka Rwot, gin kiko dok Yerusalem, di kiko donyo tuco ejiri i calere atot me Samaria. ²⁶ Di malaika ka Rwot oko yamo ne Pilipo di ewaco be, Yai di iko ot tetu ongalimake, i yongayo kame yai ki Yerusalem ot Gasa; kame beo i tim. ²⁷ En eko yai di eko ot, neni, icuo moro me Abisinia obedo ebwacit, kame oudo obedo ngatic adwong kame lo kakame okano iye lim ka Kandes abaka me Abisinia, kame oudo obino ilega Yerusalem ²⁸ En oudo do etie dok di ebedo i wi cabala mere di etie somo itabu ka enabi Isaya. ²⁹ Tipo Kacil oko waco ne Pilipo be, “Nyinyiko ingete, ot idony i cabala no.” ³⁰ Pilipo oko ringo bute, en eko winyo di esomo itabu ka enabi Isaya, en oko penye be, “In itie niang kop kame itie somo go?” ³¹ En eko dwoko ne Pilipo be, “Atwero niang benyo ka dano moro likame okonya?” En eko kwano be Pilipo yit malo eko bedo kede en i wi cabala. ³² Adul me iwandik kacil kame en oudo etie somo: somere kaman, “Kotie tere bala oromo kame kotie tero ot ngolo, bala atin oromo kame ling alinga kame kotie nyaro yer mere, en likame engamo doge akadi acel. ³³ Kocao dwongo mere, di oko dagi ngolo ne kop me ateni; ngai kame twero mino tatamo dub me jo me lwak mere? Pien kotieko kwanyo kuo mere ki wi lobo.” ³⁴ Di ebwocit oko dwoko ne Pilipo be, “Ango akwai, waca enabi tie yamo kope gi i kom ngai, i kom en, arabo ngat apat?” ³⁵ Pilipo oko cako yamo, di egeo kede kop ikom dul nono, di do eko tuco ne kop Aber amako Yesu. ³⁶ Di bin gin kitie ot, kiko tuno kakame i pii moro oudo tie iye, di ebwocit oko waco be, “Neningo, pii ine kan, nyo do kame romo genga udo batisimu?” ³⁷ Pilipo oko waco be, “Ka in iyei kede cunyi dedede, mano gire twerere.” Icuo nono oko dwoko ne be, “Ango ayei be Yesu Krisito en Wot ka Rubanga.” ³⁸ Di en eko ciko be mi cabala kong cungi: gin kiko ot donyo ii pii, Pilipo kede ebwocit, di Pilipo oko batiso en. ³⁹ Kakame do gin kiwok kede ki pii, Tipo ka Rwot oko tingo Pilipo otero, en likame bobo oko nene, di ebwocit oko meede kede ot mere di elelo. ⁴⁰ Do Pilipo oko neeno ki Asota; di en eko bebeo i bomban dedede di etuco ejiri naka en donyo Sisiria.