¹ . Kakame gin kitieko iwi kede bin kiko ngeno be cula nono oudo kolulongo be melita. ² . Di jokame bin tie kuno li oko nyuto ne wa kisa moro akadi katitidi. Pien gin bin kimoko mac di kiko gamo wan dedede iye pi kop me kot kame bin tie cwei kede pi ngico. ³ . Kakame Paulo ocoko kede yen di eko keto gi imac emosoga oko wok ilieto di eko tukere icinge. ⁴ . Kakame jo kame bin yie kuno oneno kede emosoga di tie liero icing Paulo di gin kiko donyo yamo idiere gi kengi ken gi be kur obedunu kede abuinikin dano ni tie nganek akadi bed bala ebwot kinam, do culo cwor likame yei ne kuo. ⁵ . Di en eko lakaro tulol nono imac di li eudo awanon. ⁶ . Gin bin kiko dong neno be kom Paulo oyaro popongun, amoto ebino poto piny awaka-awaka di eko to do kakame bin gin kidaro kede pi kare moro alalal di liame kiko neno awanon moro tic ikome omio gin kiko loko tam gi di kwaco be Paulo obedo Rubanga. ⁷ . Kabedo acel nono oudo bin obedo lobo me ngadwong me cula kame bin nyinge pubulio en ngat kogamo wa di eko gwoko wa pi ceng adek. ⁸ . Kare oko tuno ame tuo oko mako papa me pubulio tuo me musuja kede diebo remo ngat kame Paulo odonyo iot bute di ko lego ne, eko keto cinge iwie di ko cange. ⁹ . Kakame man otieko timere kede jo ace da kame bin tie kede tuere icula nono obino di oko cango gi. ¹⁰ . Jo kame bin omio wa wor atek kakame bin wan otie do yai kede gin kiko mino wa jamini kame mitere ne wa. ¹¹ . Ingai dwete adek wan bin oko yai kede emeri me Alekesanderia kame bin otieko kare me ngico icula ame bin tie anen me kasta kede polak. ¹² . Kakame owok kede idog nam me Sirakuse oko bedo kuno pi ceng adek. ¹³ . Wan bin oko yai kikuno oko ot Regio ingei ceng acel yamo me tu piny oko buko wa di oko tuno puteoli iceng kalubo. ¹⁴ . Kikame wan oko udo imiegu kede amiegu di oko iwongo wa bedo kede gi pi ceng kanyare di do wan oko mede ot Roma. ¹⁵ . Kikanono di imiegu kede amiegu owinyo kop ikom wa, gin kiko bino riamakin kede wa di otie kakabor ame olwongo be Apaya poram, kede ude adek kakame Paulo oneno gi kede eko pwono Rubanga di eko udo nwang cuny. ¹⁶ . Di wan otuno Roma ngadwong oko mino mabus icing ngat kame telo jo kame gwoko gi, do Paulo bin oko yei ne bedo kene di sirikale acel en kame gwoke. ¹⁷ . Ingei ceng adek Paulo bin di ko lwongo jo tel me Iyudayan karacel, di bin kitieko cokere karacel en eko waco negi be jona imiegu kede imieguna akadi di liame tie ginoro kame ango atimo ne jo, amoto itok me jo akwari wa do pwodi ko kwanya ki Yerusalem bala mabus di oko kela icing jo me Roma. ¹⁸ . Di gin kipepenyo ango bin gin kiko mito na ot pien likame tie gimoro ikoma kame yei na to. ¹⁹ . Do kakame Iyudayan oyamo kede ikom kop ni di oko dina jurao but kakisari bed bala oudo ango likame atie pido ateker na. ²⁰ . Pimano pi tien kop ni omio ango alwongou pinenou, kede pi yamo kedeu, piento pi gen me Israel en omio kotwea kede eriko. ²¹ . Di gin kiko waco ne be wan likame oudo baluan mogo ame eyai kiyudaya kame maki, amoto imiegu kede amiegu obino oko nyuto newa arabo yamo ne wa kop moro ikomi. ²² . Do wan omito winyo kibuti gi ame in iparo amaka ekodet ni pien wan ongeo be ikabedo dedede oyamo kop arac ikome. ²³ . kakame gin kitieko mo ne kede ceng jo atot di ko bino kakame en ebuto iey di en eko bedo tatamo negi di emio gi ijura ikom ajakanut ka Rubanga di etamakino loko tamgi ikom Yesu kede ikom iswil ka Musa kede me inabin cako me odiko tuno otieno. ²⁴ . Di jo mogo oko yei kop kame owaco do jo mogo li oko yei. ²⁵ . Kakame gin likame kiko yei winyere kede ken-gi ken-gi gin kiko sarakin icen ngei Paulo yamo kop acel ame waco be cuny kacil riki oyamo kibut enabi Isaya kede kibut jo akwariwa. ²⁶ . di waco be ot but jo gi di iko waco negi be winyo iyarunu winyo do likame ibinunu niang, neno ibinunu neno do liame ibinunu niang. ²⁷ . Pien jogi cuny gi odoko nwang it gi da ocule liame winyo, wang gi da oumere me wek kur kinen kede wang gi kede kur kiwiny kede it gi di kiko niang kede cuny gi di gin kiko lokere di ango ako cango gi. ²⁸ . Pimano miunu kop ni ngeere nutu be alako ka Rubanga ocwao but jo kalikame me Iyudayan me wek gin kiwinyi. ²⁹ . Kakame en etieko waco kope gi Iyudayan di ko Sarakin di kitie kede peny adongo - adongo idiere gi ken-gi ken-gi. ³⁰ . Paulo di kobedo iot kame epango piw wmakini are di egamo jo dedede kame bino bute. ³¹ . di etuco kop me ajakanut ka Rubanga di epwonyo kop kame mako Rwot Yesu Kirisito kede nwang abongo ngat kame genge.