¹ . Mam ango abedo ngaor? Mam ango abedo dano kogonyere? Mam ang aneno Yesu Rwot wa? Mam wun ibedunu tc na Rwot. ² . Kame ango likame abedo ngaor ibut jo ace, do kibutun ango abedo ngaor! Pien kuo wu iRwot obedo gikame moko be ango abedo ngaor. ³ . Adwokini na but jo kame pepenyo ango en ine. ⁴ . Mam wan otie kede twero me camo kede mato? ⁵ . Mam wan otie kede twero me telo amin dako bala kame joor icegun kede imiegu ka Rwot kede kepa timo kede. ⁶ . Arabo ango kenekene kede Baranaba en kame olikede me kanyakino tic? ⁷ . Ngai kame ooto yi esawa moroni, di bobo eculere kene? Ngai kame puro olok di likame eko camo anyakini mere? Arabo ngai kame kwao romini di likame emato cak me romini? ⁸ . Benyo mam ayamo gi nogi bala dano? Ara likame iswil da waco gi? ⁹ . Pien kowandiko iye iswil ka Musa be kur itwei dog twon kame tie canyo kodi, mam Rubanga paro pi twonin? ¹⁰ . Benyo etie yamo kop nogi pir wa? Ateteni kop nogi kowandiko wek ngat kame puro pur kede gen, kede ngat kame canyo da poore bedo kede gen me udo iner me gen mere. ¹¹ . Ka wan ocuo kope me cuny butu, etwero bedo gi kame pire tek kame wada okao jamini wu me kom? ¹² . Ka jo ace tie kede twer me burao gi nogi kibutu mam wan do otie kede kame kalamo? Li Atwal wan likame otie kede twero noni, do okanyakino igi dedede tetekeny kur ogeng ejiri ka Kuristo. ¹³ . Mam wun ingeunu be jo kame tio tic kacil me Tempulo kuo kede jamini me Tempulo? Kede jo kame daro ialutari udo iner gi ialutari? ¹⁴ . Ecal kamanono da, Rwot ociko be jo kame tuco ejiri poore kuo kede ejiri. ¹⁵ . Do ango likame atio kede ginogi akadi acel, doko da likame awandiko ginogi me wek tima. Pien oudo eber nango do atoi akaka dano moro mino ewaka nango doko giame tic mere lii. ¹⁶ . Piento kame atuco ejiri, udo ali kede gikame awakere iye, pien udo otieko keto inyima gikame mitere atima. Do can kalikame atuco ejiri. ¹⁷ . Pien kame ango atie timo ginoni imit na; audo giamia me pwoc: do kalikame imit na udo aketo kare me ejiri buta. ¹⁸ . Nataman do giamia na me pwoc en nyo? En ine ta, kame atuco ejiri, atuco ejiri ka Kuristo abongo cul wek kur anywar twero na iye jiri. ¹⁹ . Akadi bed bala ango agonyere ibut jo dedede atieko yei bedo epasoit but jo dedede me wek alok jo atot. ²⁰ . Bobo da kame atie but Iyudayan, abedo bala ngayudayan, me wek alok Iyudayan; ibut jo kame swil pugo adoko bala ngat kame iswil pugo, me wek alok jo kame iswil pugo. ²¹ . Kibut jo kalikame iswil pugo abedo bala ngat kalikame iswil pugo (likame be ali kede iswil ka Rubanga, do alubo iswil ka Kuristo) me wek alok jo kalikame iswil pugo. ²² . Kibut jo nyapo adoko nganyapo, me wek alok jo nyapo: Ango adoko gi dedede but jo dedede tetekeny iyore dedede alak ace. ²³ . Ango atimo magi pi ejiri tetekeny anywak kede wu iginogi. ²⁴ . Likame wun ingeunu be jo kame ringo ipiem ringo dedede, do ngat acel en kame udo giamia? Aso ringi wek iudi. ²⁵ . Bobo da buli dano kamee piemo pi udo loc lubo idwilia me piem, gin kitimo kamano pi udo ocoro me deyo kame dubere mere, do wan kalikame dubere. ²⁶ . Ango da pimano likame arino atatai; aso ayi, likame bala ngat kame tie dongo yamo. ²⁷ . Do ango aketo koma iapuga, di ako kele iloc: me wek kame atieko tuco ejiri ne jo ace, kur abed ngat kame obino dagi.