1
Wakti muda tim fi usbuusi ligo odakal fi juwa te nas kebir Falisayo wayi fi akulu wedi nowo
difan.
2
Ayinu fi ajol fi ena to al kan ayan werim batna.
3
Yesu arja wonusu me saabal shariya me
nas Falisayo ligo ogi kelem gali seme ponyesha yom sebbi wala ya jede ma?
4
Mon askutu dukur uwo amsuku fugu uwo opona dukur oseebu uwo.
5
Osadumon mun fustu itakum ab endisi punda to aw bagara to ligo waga min juwa moyo for usbuu wagder amurugu ma?
6
Ata umon
ma arja nowo fogo.
7
Ojib hadith anas ab naadi fi hafla de ab sulu nafsi toumon fi gen gidam,
okelem noumon.
8
Ajol kan bi nadi ita fi jooju te arusu mata gen fi bakan te gidam, min arufu kan
fi ajol ab gi shina ita me heshima ab uwo naadi.
9
Me ajol ab naadi ita okaman ja okelem ne ita
wasa min bakan wede kede wede dukur ita gi wasa haya haya ita gi arja wara
10
Lakin kan naadi
ita gen min wara, ajol ab naadi: ita kan uwo bija obi kelem neita gal saabi tayi, taal gen min
gidam in ya sidu hafla de bija sulu ita in ya ita bi gen me heshima me anas.
11
Kalam ajol yoyote
ab bi wedi nowo heshima bija arja uwo falta. Me ajol al ggi wedi heshima ne nafsi to bija arfa
uwo.
12
Okelem ne ajol ab naadi uwo gali ita kan rakabu akil te saa sita aw tesaa sita aw fileli
mata naadi sabiyan taki sala akwaana taki sala kan familiya taki sala kan jirana ta ab tajirin min
arufu kan umon ma ja nadi ita kaman dukur mon kede sulu je lipa neita.
13
Lakin kan ta rakab
joju naadi miskin ab kereng me anas ab gi juru umon falta me amiyanin.
14
Bija wedi neita
baraka kalam ata umon ma endisi sokol telipa ita kalam bija tooru ita fi gum te anas ab nedif.
15
Wayi min umon ab kan gen mowo fi akili wakti uwo asma kalam wede okelem nowo gali obija
kun me baraka ajol yoyote ab bija akul akil fi mamlaka te Rabana.
16
Okelem nowo gali fi ajol ab
rakab joju ab kebir onadi anas milan.
17
Orasul labi to wakti te joju ligo rasulu okede kelem ne
anas ab nadi de kede umon ja, kalam kala umon tayarisha.
18
Mon kulu me gelba wayi umon
waga waga kede sama zambi toumon tawlan dukur kelem nowo gali ana bija samba matooke
gi faa, naana kede ana ruwa ayinu ana gi womba neita samana.
19
Me ajol taani kaman kelem
nowo gali ana bija bandali te bagara kamusa ana gi ruwa ayinu, ana gi womba neita samana.
20
Me taanin kaman kelem gali ana jooju mariya ya bikun sabab te ja tayi ma.
21
Ini ya lai de ja oja
kelem ne sidi to ini ya sidu juwa de zalan okelem ne labi to ruwa tala bara fi sika me sika kulu te
medina, kede ita jibu naana ini miskin in ma ab kereng, me amyanin me anas ab gi juru umon
me batna.
22
Labi de dukur kelem sidi tayi kalam ab ita kelem de so kalas lakin lisa fi masafa.
23
Sidi to dukur kelem ne labi gali ruwa tala masi fi kila sika kede ita kutu umon amla fi juwa tayi.
24
Kalam ana gi kelem gali anas naade ab nadi de mafi ajol ab bi ayinu fi jooju tayi.
25
In ya kawm ab kebir ab kan giruwa mowo, ogeeru wagilibuwo okelem gali.
26
Ajol kan bija naana dukur oma alisa baba to wala mama to me mariya to me akwana to wele ma bana me maisha to uwo oma
agder kun wayi min swahaba tayi.
27
Kila ajol ab ma bi arfa musalaba to oja wara tayi, oma bigen
min swahaba tayi.
28
Kalam munu min itakum kan uwo aju abin juwa oma gi gen kede uwo
esabu kidi te abin de , aw kan uwo endisi sente te kala to?
29
Min aarufu kan kala uwo kutu abidu
ab kan uwo ma agder kalas to, mon kulu ab gi ayinu gi abidu ataku umon.
30
Mon gi kelem gali
ajol wede uwo ya abidu abin lakin uwo ma kalasu.
31
Aw sultan yatu kan kun uwo gi ruwa fi
dusman fi dusman me sultan taani ab ma gi agder gen kede uwo adul kalama de, aw kan uwo agder kun me 1,000,000 me wede uwo.
32
Kan maya jede ajol kan lisa boyi zaidi ogi rasulu anas
kede so maslaha.
33
Yala jedde kila wayi min itakum ab ma agder seebu kede uwo so hasara fi
sokolina ab uwo endisi oma agder kun swahaba tayi.
34
Yala mile semei lakin mile kan kalas
fogo hilu to kum bi arja fogo sunu?
35
Aja maseme ne tura ata ma seme ladi fi sokol ab gizidu fi
samba. Ajol ab endis adan kede uwo asma ajol al ma endisi kede uwo seebu.