¹ Wakti umon milan ab abidu katifu maana te kalama ab ja wedi neena. ² Je namna ab umon ja kelem neena anas ja abidu min fi awlan kun ligo umon shuhada ligo umon ya gi rasulu me kalama. ³ Wakti ana ja kutu kulu geeri bakan wayi min fi awlan ana kaman ayinu je seme katifu neeta teefiro ab kuwesi zaidi namna ab ja kutu geeri geeri. ⁴ Ya ini kede ita ja faham maana te kalama ab ja alimu ita. ⁵ Fi wakti te Kerode sultan te nas Yudaaya kan fi kebir te diin ab asma to kan Zakariya min family te abiya okan endisi mariya ab kan min yal bana te Aron asma to ya kan Elizabeth. ⁶ Mon kulu tinen kan anas ab adil gi Rabana mon gi masi tete amri to umon kulu me fi kalama te Hidaaya ab te Rabana ligo umon ma endisi batal yoyote. ⁷ Mon kan ma endisi nyereku kalam EEliabeth kan ma gi weledu mon tinen kulu kan kala ja ajusi fi umri toumon. ⁸ Wakti bakan tim ligo uwo giso kazi ab te kebir te diin fi gidam te Rabana ligo zaman to ya tim. ⁹ In ya kura waga fugu uwo je adab te kubarina te din je kan fi dakal fi kanisa te Rabana kede ita wala liban. ¹⁰ Wakti kawm te anas kulu ligo gi womba bara fi wakti te ligo dakun to ele. ¹¹ Ini ya malaika te Rabana beenu nouwo ligo uwo agifu fi jiha te naari ab gi ligo fogo lata hari. ¹² In ya Zakariya wakti ayinu uwo gelba to abidu kun me wasi wasi okafu. ¹³ Lakin malaika kelem nowo mata kafu Zakariya kalam koore taki asma mariya taki Elizabeth bija weledu neeta nyereku ab Yowele te bija kutu nowo asma Yokana. ¹⁴ Ita bija furayi ita bija shereheya me anas milan ab bija furayi weledu to. ¹⁵ Kalam obija kun kebiri gidam te Rabana oma bija asurub merisa sala sokol te sakarian bija amla nowo roho ab nedifu min fi batna te mama to. ¹⁶ Milan min yala te Israel obija arja umon gidam Rabana toumon. ¹⁷ Bija kun ligo uwo ya bi kun gidam uwo min roho me gudra te Eriya arja gelba te wazze ne wazuku toumon. Me anas ab ma gi asma kede umon kun ligo umon gi masi tete gudra te anas ab adil ¹⁸ In ya Zakariya ja kelem ne malaika gali ana bija arufu kefin wede? Kalam ana ajusi me mariya tayi kaman ajusi. ¹⁹ Ini ya malaika abidu kelem nowo je ana ya Gabriel ab gi agifu gidam te Rabana ab ya rasulu kede ana ja wonusu neeta me kelem neeta kalama dolde ab kuwesi. ²⁰ Ayinu ita bija askutu ligo ita ma ager wonusu ladi yom kan bija tim kalam ita aba amin me kalama tayi ab bija kutu fi saa to. ²¹ Anas ab kan gisteenu Zakariya umon hairu namna ab uwo toolu fi kanisa. ²² Wakti uwo tala uwo aba wonusu noumon mon faham gali uwo ayinu hidaaya min kanisa otoolu ligo uwo gi ponyesha umon ida ligo uwo ligo uwo lisa yegif ouwo hairu. ²³ Wakti bakan tim ligo muda to teso kidima kala kalasu. ²⁴ Wakti yom futu mariya to Elizabeth amilii odusu uwo shahar5, ligo ogi kele gali. ²⁵ Ya jede Rabana so ne ana fi yom ab uwo ayinu ana fogo amurugu min ana haya tena te anas. ²⁶ Fi shahari te sitta malaika Gabdieyeri Rabana rasulu uwo fi medina te Galilaaya ab asma to Nazareth. ²⁷ Ne biniya ab bikra ab kan gi teesa me ragi wayi asma to Yusufu ab te juwa te Daudi, me asma te biniya Mariyam. ²⁸ Ya odakal fi juwa to okelem gal amani ita ab wedi neeta baraka, Rabana fi bakan wayi me ita. ²⁹ Lakin uwo ligo wasi wasi me kalam wedede ofekeri me namna ab selem wede fogo. ³⁰ In ya malaika kelem noowu gali mata kafu Mariyam kalam ita ayinu huruma te Rabana. ³¹ Ayinu ita bija kun amili, te bija weledu nyereku Yowele, asma to bija kun Yesu. ³² Obija kun kebiri bija naadi uwo nebi te ajol ab fi fo Rabana bija wedi nowo bambara ab ta Daudi jidi to. ³³ Obija hukum juwa te Yakobo muda kulu me mamlaka to ma bija kalasu. ³⁴ In ya Mariyam kelem ne mlaika gali bija kun kefen, kalam ana ma arufu ragi? ³⁵ Me malaika arja fogo okelem Roho ab nedif bija ja neeta me gudra te ajol ab fi fo bija juru ita: sokol ab bija weledu ya bija nadi ab nedifu nebi te Rabana. ³⁶ Ayinu? Elizabeth akutaki, okaman amili nyereku Yowele fi ajusito, wede ya shari to te sitta ab kan gi nadi mugumba ³⁷ Kalam mafi kalam ab gi tala min Rabana ab bija woduru gudra. ³⁸ Mariyam dukur kelem gali ayinu ana kadim, te sidi tayi kede kun fi ana je namna ab ita kelem de in ya malaika wassa min uwo. ³⁹ In ya fi wakati wedede Mariyam gum dukur oruwa fi bele tegala fi bele te Yuda. ⁴⁰ Odakal fi be te Zakariya oselem Elizabeth. ⁴¹ Wakti bakan tim Elizabeth asma salam te Mariyam nyereku dukur nutu nutu min juwa batna to, Elizabeth dukur amula fugu uwo Roho ab nedifu. ⁴² Owonus me sauti ab fo okelem gali wedi neeta baraka min nuswana me fawakih ab fi fija batna taki wedi noouwo baraka. ⁴³ Ana kaman kalam wedede tala weri mama sidi tayi kede ja ne ana. ⁴⁴ Kalam ayinu sawti te salam to wakti dakal fi dam tayi nyereku dukur nutu nutu min juwa batna tayi laajal te furayi. ⁴⁵ Wedi nowo baraka ab ji rudu kalam bija rasulu wakti kalama ab ita ja kelem ne Rabana. ⁴⁶ Mariyam dukur kelem gali gelba tayi gi sifa Rabana. ⁴⁷ Me Roho tayi furayi ne Rabana sidu hidaya tayi. ⁴⁸ Kalam uwo ayinu miskin te kadim to kalam ayinu abidu te naare me kawm kulu bija naadi ana je ajol ab wedi nowo baraka. ⁴⁹ Kalam ajol ab agder oso ne ana kalama ab kubarain me asma to nedif. ⁵⁰ Me huruma to fi fi anas ab gi kafu uwo zaman me zaman. ⁵¹ Oweri gudra me ida to, osetetu anas kulu abendisi geemu fi adul gelba toumon. ⁵² Ofuruyu nas hukuma ab gi losegu fi kurishi toumon owedi ne anas ab gi taya. ⁵³ Anas ab endisi jiyan osabanisha umon me tajirin oturuju umon ligo umon ma endisi sokol yoyote. ⁵⁴ Uwo awum Isael labi to kede okum buka huruma to. ⁵⁵ Je namna abuwo ja kelem (nana jidi jidi to) ne Ibrahim me nyereku to zaman kulu. ⁵⁶ In ya Mariyam kalas shari 3 uwo arja fibe toumon. ⁵⁷ Wakti te Elizabeth bakan tim te weledu oweledu nyereku Yowele. ⁵⁸ Jirana to me familiya to mon asma je Rabana arfa daraja to me huruma to mon furayi bakan wayi. ⁵⁹ Wakti bakan tim fi yom te 8, mon ja fitaaru nyereku, mon kan aju kutu nouwo asma te jidi to Zakariya. ⁶⁰ Mama dukur arja fogo uwo abba, bija nadi uwo Yokana. ⁶¹ Kelem nowo gal mafi ajol te family taki ab lisa nadi uwo me asna jewede. ⁶² Asadu baba to namna ab uwo aju nadi, ⁶³ Dukur uwo aju sokol te katifu fogo okatifu okelem asma to Yokana mon kulu hariu. ⁶⁴ Gwam kede kasma to fata me lisan to fata owonusu ligo ogi shukur ne Rabana. ⁶⁵ Mon kulu ab kan fi geeri na mon kafu uwo me kalama wedede dukuru setetu fi duniya tamam fi gala te Yudaaya. ⁶⁶ Me anas kulu ab ja asma mon kulu kutu fi gelba toumon mon kelem nyereku wede bija kun sunu? Kalam Roho ab nedif kaman fi bakan wayi moowo. ⁶⁷ Baba to Zakariya dukur amla uwo me Roho ab nedif dukur owonusu fogo Rabana te Israel kalam odooru ne anas to uwo amurugu umon min woduru. ⁶⁸ Kate asma te Rabana wonusu fogo Rabana te Israel kalam odooru ne anas to uwo amurugu umon mon woduru. ⁶⁹ Wa kaman uwo arja neena gurun te hidaaya fi juwa te Daudi. ⁷⁰ (Je namna ab uwo wonus fi kasma te nas ne bija to ab nedifu ab kan fi min wakti ab duniya de abidu fi. ⁷¹ Hidaaya min aduya teena me fi ida te anas dolde kulu ab je aba, ina. ⁷² Timiza huruma to ab uwo ja ahidi mo nas jidi jidi to me kumbuka ahadi to ab nedifu. ⁷³ Timiza ahadi ab uwo ja alifu ne jidi teena Ibrahim. ⁷⁴ Wedi neena kan ina ligo hidaaya min ida te aduya teena dukur kede ina abidu so nowo kidima ligo ina magi kafu sokol yoyote. ⁷⁵ Fi nedifu me fi hidaaya fi ena to wakti teena kulu. ⁷⁶ Meeta, nyereku, bija nadi ita nebi te sidi ab fi fo zaidi: Kalam ita bija kun giso kidima to ligo ita gi adul sika to; ⁷⁷ Kelem ne anas hidaaya, batal toumon kede ja amurugu mon umon. ⁷⁸ Kalam sabab te hueuma te sidi teena ab seme ya tayinu sobura te min subu gi fata neena ligo gi tala min to. ⁷⁹ Wala nuru ne anas ab gi gen fi duluma me tete dulu ab te bakan mutu weri hidaaya ne kura teena fi sika ab te amari ⁸⁰ Nyereku dukur raba zidu noowo gudra fi roho, ogen fi bakan ab pengele adi yom tim te weeri uwo ne nas Israel.