¹ Paulo fata ena to ne anas te hafla, okelem noumon rujala akwana, ana gi si kalama ligo ana fi ana me Roho kulu al fi gidam ta Rabbana, ladi fi ym wede. ² Kebir te din ananiya uwo amrisha anas ab kan lif uwo dukur dugu uwo fi kasma. ³ Paulo dukur kelem gali, Rabbana bija obigita ita tub juwa ab masa ab nedif, ita gen kede ita hukum ana je shariya fi ita wedi amri kede dugu ana giben ja shariya ma fi? ⁴ Anas al kan gen geeri nowo mon asadu uwo ita gi sitim kebir te din gidam Rabbana? ⁵ Paulo arja fogo okelem gali ana kan ma, arfu, akwana wede ya kebir te din a kebir, kalam ja katifu uwo gali mata gi wonus batal fi rasu te anas taki. ⁶ rLakin Paulo wakti faham ja nus te bakan de te nas sadu kayi me nus taani te nas fali sayo owonus foo me sauti gal rujala akwana, ana mufali saayo nyereku te nas Falisayo, hukum naana kalam feker fi gum te anas al mutu. ⁷ Wakti owonus jede kun naa koro koro bayina te nas Falisayo me sadu kayo dukur ja maa de ferteku. ⁸ Kalam nas Sadukayo gi kelm gal mafi toru anas baada te mutu, ata malaika ma, wala muzimu, lakin nas Falisayo mon gi gi kelem kulu tinen. ⁹ Dukur kun naa juru laabil misan, anas te katif fi jiha te nas Falisayo mon yegifu mon gi juru laabil gaali, ina magi ayinu batal fi ajol wede wu bija kun kefin kalam muzim to wonus nowo aw malaika. ¹⁰ Wakti kun naa koro koro milan, ragi ab kebir, okatu Paulo ligo oguru kutu asmaa to foo. Uwo amrisha kawm kede amurugu uwo, fi ustu toomon. ¹¹ Ina ya fi filel te tinen, sidi tena yegif bakan wayi okelem nowo, gal gelba taki kede kun gow, kalam je namna ab ita wonus kalam tayi fi Yerusalem, ya kaman aju uwo kede ita wonus asma ayi kaman fi Roomei. ¹² Wakti lata saba nas Yudaaya kutu ahadi mon kelem, ina ma bi akul wala asurub, laadi umon bi katul Paulo. ¹³ Anas al wafiki kalam wede mon kan gi futu (40) ¹⁴ Mon dukur ja na kubarina te din, me nas wazze mon kelem noumon gal, ina alif abba akul sokol yoyote haadi ina katul Paulo. ¹⁵ Yalla itakum me kawm, kelem kun ne ragi ab kebir okede jibu uwo falata ne itakum ja anas ab lisa aju arufu hakki te kalama to, ina kaman tayari kan uwo lisa ma ja gidam in ligo ina kalam katul uwo. ¹⁶ Lakin kan fi nyereku te aku biniya te Paulo uwo asma fitna de oruwa ne Paulo okelem nowo. ¹⁷ Paulo naadi wayi min kubarina okelem gali, sulu yowele wede ne ragi ab kebir kalam uwo endis kalam ab uwo aju kelem nowo. ¹⁸ Dukur suluwo ne ragi ab kebir okelem gali Paulo womba naana kede ana jibu neita yowele wede kalam uwo endis kalam ab uwo aju kelem neita. ¹⁹ Ragi ab kebiri wamsuku ida tomon ruwa fi torofu fi siri uwo asadu uwo kalam yatu ya ita aju asadana? ²⁰ Okelem nowo nas Yudaya mon wafiki kede umon ja dugu rukuba neita kede saba te jibu Paulo wansi saba je ajol ab gura akil ne ina kalam to. ²¹ Ana gi womba neita mata rudu, kalam anas toumon, ab fi ( 40) mon gi steenu uwo mon alif akul ma, me asurub maa, laadi mon katul uwo, umon tayari mon gi steenu ita kan bi rudu. ²² In ya ragi ab kebir sokwa heeri ne yowele dukur owomba nowo kede uwo ma kelem ne ajol yoyote kalam dolde ab ita kelem naana. ²³ Onaadi anas tinen min rujala okelem noumon gali adul tokum as keriya (200) mon kede ruwa fi kayisaria, me anas te faras (70) me anas te laaruba (200), fi saa tarata te fileli. ²⁴ Kede wedi ne itakum laam gaba kede kutu fogo Paulo, kede sulu uwo me amaani ne ferikisi ab te (saza) ²⁵ Okatif waraga fi namna wede. ²⁶ Kulaw diyo Lusiya oselem kebir te (saza) ab kuweesi zaidi felikisi. ²⁷ Ajol de wakti kala amsuku uwo me nas Yudaaya wakti gura katul uwo ana ja bakan ab umon fogo ana sulu uwo min umon kalam ana faham je uwo min nas Rome. ²⁸ Yala wakti ana aju faham kalam sunu ya ligo badum ab rasul hadi aju katul uwo, dukut ana sulu uwo fi kawm toumon. ²⁹ Ana ayinu ja gali asiki uwo fi woduru sharuya toumon lakin ligo mafi sabab te katul to wala robutu to. ³⁰ Wakti kelem naana gal gi gata nowo agil te katul uwo, gawm ana rasul uwo neita ana amrisha anas ab asika uwo kede uwo asiki uwo gidm ita. ³¹ As kariya so je namna ab amrisha umon, sulu Paulo filel rasul uwo fi (antipaatuuli) ³² Lakin fi yom te tinini mon seebu anas te faras kede ruwa mowo mon arja fi bakan ab umon tala fogo. ³³ Anas dolde wakti rasul fi Kayisariya mon wedi ne kebr te saza waraga dukur umon weeri nowo Paulo. ³⁴ Wakti okalas agara waraga, uwo asadu (saza) ab uwo tala fogo kelem nowo gali otala fi Kirukiya. ³⁵ Okelem gali ana gi asma itakum gi asiki ana bija asma ita anas ab gi asiki ita kan umon ja. Uwo amrisha gi asiki ita kan umon fi juwa te Kerode.