1
Paulo, Silvano kodi Timothewo ri kanisa ma Thesalonika manitie i Were Baba kodi i Rwoth Yesu Kristo; Wor wobedi ri win kodi siem, wok bongi Were Bawan, kodi Rwoth Yesu Kristo.
2
Wafwoyo Were noknok ri wijoje, ka watuco win i kwayo mawan;
3
Ka wapoyo tic mewin ma yeyo ma wakikeng’, kodi tim ma mar, kodi diyo cuny mewin i Rwoth Yesu Kristo, ruwang’ Were Bawan;
4
Kareno wang’eyo, wutimere momar, paka Were odiero win.
5
Ato njir mawan kobino ri win nyaka i wac kende, to obino i men kodi i Cuny Maleng’ gi ridho paka wibende wing’eyo nger ji ma wabedo i dier win ri bero mewin.
6
To win wilokere jomaluwo wan kodi Rwoth, munyo wijolo wac i candirok madit, gi siem pa Cuny Maleng’:
7
Ng’ey wibedo giranena ri ji jie majoyeyo i Masedonia kodi Akaya.
8
To wac pa Rwoth owok bongi win ki i Masedonia kodi Akaya kende, to i kisi kamoro yeyo mewin i Were onyay wiloka ma wakidoki wanyal waco gimoro:
9
To jowegi jonyutho wan yo madonjo bongi win kodi paka wiwire bongi Were wok i lamo cal bino tic ri Were makwo aka maradier;
10
k'onyo wakuro Wode wok i polo mocerino wok i tho, obedo yesu, m'ogonyo wan kwong nge ma bino.