¹ Pae vango vange avahandua ndjino otchizhimbuluko unene naonue ya ndjino ehambo nekolowa, pae ngatchi kaemii muatakamifha ku Tate Kulu, mapanga ovahandua. ² Mikumbu ku Evondia na Sentique okutia ngavatute pé tchi ku Tate Kulu. ³ Otchatchili nakove ndjikumba, epanga lhange omunhamunhu owokovininga: popila ovakai ombo, mokonda owokovininga omana avo emetikula lhomunhu. ⁴ Lemuemii apehe ku Tate Kulu; nkhe vali mikatia: lemuemii. ⁵ Otchihando tchemii ngatchiwe kotchipala tcho vanthu vatcho avehe. Tate Kulu upepei. ⁶ Hamuhulilua novipuka pé. pae okukumba kuemii ngakuiwe kotchipala tcha Huku, kokulikuambela nokukumba, nolupandu. ⁷ Ya ombebua ya Huku, endji ieta okulitea akuhe, Maikaholeka oyombungo zhemii, nokututa kuemii ku Yesu Clistu. ⁸ Pae vango vange atchihe tchi eli otchatchili, atchihe tchi tchahumbua, atchihe tchi eli otchouhunga, atchihe tchi eli otchimuni, atchihe tchi tchiholue, atchihe tchi eli otchiwa, atchihe tchi tchavelela, okutia kuna tchi ngematchiyimbilua, kovipuka embeo tutemii. ⁹ Ovipuka embeo wahanda, watambula, watea wamuna muami embeo vininga ya Huku nombembua maka naonue. ¹⁰ Ndjilemua unene ku Tate Kulu, mokonda apehe muavilula okunkhuata kuemii nawa, owoli poupe nkhu mutula ami, nkhu kapeyamunike oluvezhi luo kumphopila. ¹¹ Tcho hitchipopi mokonda yatchi mbachuka. Mokonda mbalongoka okuomba mbalemua naimbinha avihe ndjinavio. ¹² Ndjitchi tchi ouhepe ukala, ndjitchi tchi oulombe ukala. Apehe ya nokovipuka viatcho avihe, mbalongoka oviatchi nge muka mohali, natchi nge muka moulombe. ¹³ Ndjipondola ovipuka viatcho avihe kuinguinha ampha oyonkhano. ¹⁴ Pae waninga nawa okutalavaya naami moyohali zhange. ¹⁵ Onue owafilipeche, mutchi okutia pokufhimbika kondaka, tchi mbalua ko Machendonia, petupu ongelecha yamphopilile kotchikolo tcho kupa nokutambula, oonue pé. ¹⁶ Napua nkhu ndji Kotessalonica, onue muatumakamaa okumphopila kovichuka viange nkhe vali. ¹⁷ Hukutia ami mikatambula oviyumbo, tcho okutia ndjitale tchi matchivanakamaa kotchikando tchemii. ¹⁸ Ovipuka viatcho avihe ndjivitambula ami ya ndjino vingi. Mbatambula ku Epafelonditu ovipuka emiã viatumakanua naonue ovio oviluimba viokupepa vika nawa, oviyumbo embi viaviuka nawa ku Huku. ¹⁹ Huku yange mekemuamina kovichuka vieni avihe noulombe Wae koumbala mu Yesu Clistu. ²⁰ Pahe ku Huku yetu Tate oumbala ngaukaeko té komanima nomanima. Amém. ²¹ Popifhemii ombunga yatcho aihe ku YesuClistu. Ovango vange omba venaami nawo vemupopifha . ²² Ombunga yatcho aihe yemupopifha. Unene vali okombenha owondjuwo ya Chechali. ²³ Otchali tcha Tate Yesu Clistu ngaikae noMphepo yeni.