¹ Mbahanda mutchive okutia otchilua tchi ndjinatcho tchi mituhihha konue otchinene kowo kolaundicheiya nakombenha havendji. ² Opó oymbungo zheni zhikae zhakola kokuendea pamu kotchihando nokoulombe womukalo wokolitea nokuiva okupopia otcha Huku engu eli Clistu. ³ Mue muaholekua oulombe watcho auhe owounongo nowokulitea. ⁴ Mimuhele opó hapaningi engu memukelenga nomalaka etutu. ⁵ Owolho ami henaónue kolutu, koMphepo tupamu ndjilemua unene okumuna otchitumino nokutakamifha mekolelo lheni ku Clistu. ⁶ Ngatchi muatambula Clistu Tate Kulu endemii Mue ⁷ ya Mue kolekemii nekolelo nkhe mualongelue mukae mamupandula. ⁸ Fuenipo opó hapaningi engu mekemupaka koupika nounongo wae novipuka vietutu novituwo viovazhiu ngatchi tchaka ovizhilika vietutu embi heli ovia Clistu; ⁹ Mokonda Mue muka olutuluatcho aluhe komukalo wa Huku. ¹⁰ Ya Mue engu eli omutue woyonkhono zhatcho azhihe tchi tchemutuala komukalo. ¹¹ Mokonda Yae naonue muahita moviyumbo hakuhita moviyumbo koinha kuningua nomavoko ovazhiu ku kutetua, okuhita moviyumbo okua Clistu. ¹² Onue muafhifhilua pamu na Clistu okuyavama momande ya Mue mututulifhua mekolelo koyonkhono zha Huku, Engu emututilifha komba vatchua. ¹³ Tchi muali ovatchue koyopekalo zheni ya nakuhahita moviyumbo komalutuemii wemupa omunhu okulikuatea pamu Nae, okuevela ovituwo vietu avihe; ¹⁴ Yesu wavela oyonkhunga zhatcho azhihe enphi nkhu zhahonikilua otue movizhilika Viae. É avihe embio apono evipapele mekuluxu. ¹⁵ É wahandula ókaputu noyonkhono ya eveta motchimbiula okuvepikulula mekuluxu. ¹⁶ Pae hakuna engu mekemukoyefha pokulia nopokunua, pamu povitenha viovipito, pamu opua omuezhi waviala, pamu omotchachapalo. ¹⁷ Atchihe tcho omuluile wovipuka embi mavikeyako, pae otchatchili óClistu. ¹⁸ Hapaningi engu nge mekemuwoteka okumukelenga okunga welipuvifha, okuyimba koyoandju, ovanthu vatcho ombo velipaka kokunga vei unene Huku noyondunge zhawo, veyula unene omapita, ¹⁹ ya owo kavelizhikie mu Clistu Engu aninga olutu luatcho aluhe mokonda lukuwamaamiikua ku luapewa na Huku. ²⁰ Tchi muatchua pamu na Clistu kovipuka viomouye, mokonda muka muatavela ovipuka viomouye ngaimbi: ²¹ Hamukuata, hamulolo, hamuvizhako? ²² Avihe ovituwo embio malilongefho ovanthu epopei nokupoyola. ²³ Ovizhilika eembio vielifha nounongo, nomalilongefho ó etutu okulipundifha kohi okuetutu, okukoleka olutu; otcho hatchichiliviyile kokuluifha oholo yolutu.