¹ Kalam ta Yahwa ta nas kulu ja le ana, gali, ² "Yahwa ta nas kulu kelim kida: Ana agid be Sahyun be guwa wa Ana agid min huwo be zalan kebir! ³ Yahwa ta nasa kulu kelim kida: Ana bi rija le Sahyun wa Ana bi geni fi nus ta Orshelim, ashan bi nadi Orshelim gali JEbel al Mukadas! ⁴ Yahwa ta nas kulu kelim kida: Rujal ajusin wa nusuwan ajusin bi geni tani mara fi sika ta Orshelim, wa ai zol der kede indu asaya fi idan bito ashan huwo raba biga ajus. ⁵ Sikat ta medina bi kun maliyan be awlad wa banat bi alabu fogo. ⁶ Yahwa ta nas kulu kelim kida: Kan fi haja bi beinu saab fi ena ta bagi nas del fi ayam dak, kaman bi agder ashan kun saab fi ena tay? - de yau kararat ta Yahwa. ⁷ Yahwa ta nas kulu kelim kida: Aynu takum, biga gerib ashan Ana bi kalisu nas Tai min wata al shemis bi tala fogo wa min wata al shemis bi waga fogo! ⁸ Wa Ana bi rijau humon wara, wa humon bi geni fi nus ta Orshelim, wa humon tani mara bi kun shaab Tai, wa Ana bi kun Allah tomon fi hagiga wa wa fi bir. ⁹ Yahwa ta nas kulu kelim kida: Itakum al hasa bi istemir asuma nefsu kelimat al ja min kasma ta anbiya wokit kutu asas ta bet Tai - bet Tai de, Yahwa ta nas kulu: Sedidu idanat takum ashan kede abinu haikal de. ¹⁰ Ashan kan gubal ayam dak mafi zol agder limu mahasil, mafi ujura le zol wole haywan, wa kaman mafi salam min adu le ai wahid al bi ruwa wole bi rija. Ana kutu ai zol ai wahid did jeran bito. ¹¹ Lakin hasa ma bikun ze ta ayam al kan, Ana bi kun ma bagi shaab del - de kararat ta Yahwa ta nas kulu. ¹² Ashan buzur ta salam bi shetetu; shejera ta inab al bi nutu fogo bi wodi simar bito wa wata bi wodi intaj bito; wa sama bi wodi nada bito, wa Ana bi kutu bagi shaab del bi worisu hajat del kulu. ¹³ Itakum kan misal le bagi duwal tanin ta laana, bet ta Yahuza wa bet ta Israel. Wa Ana bi kalisu itakum wa itakum bi kun baraka. Matakum kafu; kede idanat takum geni gowi! ¹⁴ Ashan Yahwa ta nas kulu kelim kida: Bes ze Ana katitu ashan bi duru itakum wokit kan judud takum hariku zalan Tai - Yahwa ta nas kulu yau kelim - wa ma kafifu, ¹⁵ wa kaman Ana bi katitu fi ayam de ashan bi amulu kuwes tani mara ma Orshelim wa bet ta Yahuza! Matakum kafu! ¹⁶ Del yau hajat al itakum kede amulu: Wonusu hagiga, aizol ma jeran bito. Hukumu be hagiga, adala, wa salam fi abuwab takum. ¹⁷ Mata katit ashan amilu batal fi geliba takum did ai wahid tani, wa matakum hibu ashan bi halifu be kidib - ashan de yau hajat al Ana bi akrahu - de yau talimat ta Yahwa." ¹⁸ Biga kalam ta Yahwa ta nas kulu ja le ana, gali, ¹⁹ "Yahwa ta nas kulu kelim kida: Siyam ta shahar nimira arba, shahar nimira kamsa, shahar nimira saba, wa shahar nimira ashara bi kun zaman ta farah, mokosut, wa hafla ta farah le bet ta Yahuza! Ashan kida muhaba hagiga wa salam! ²⁰ Yahwa ta nas kulu kelim kida: Nas bi ja tani mara, sala del al bi geni fi medinat barau barau. ²¹ Sukan ta medina wahid bi ruwa fi medina tani wa kelim, 'Kede nina be sura ruwa asalu gidam wusa ta Yahwa wa fetisu Yahwata nas kulu! Nina zatu kaman bi ruwa. ²² Nas kutar wa duwal gowin bi ja ashan bi fetisu Yahwa ta nas kulu fi Orshelim wa bi asalu musaada ta Yahwa! ²³ Yahwa ta nas kulu kelim kida: Fi ayam dak ashara rujal min kulu rutan wa doula bi amsuku danaba ta gumash takum wa bi kelim, 'Kede nina ruwa ma itakum, ashan nina asuma gali Allah fi ma itakum!"