¹ Wa ana bada lifu wa arfa ena tai wa ana aynu arba arabat ta harb bi tala bara min nus itnin jebel; wa itnin jebel del salau min nihas. ² Awel arabiya fogo husan ahmar, arabiya al tani fogo husan aswed, ³ arabiya al talit foo husan abiad, wa arabiya al rabi fogo husan ramadi abu nuktat. ⁴ Biga ana juwabu wa kelim le malaika al wonusu ma ana, "Del sunu, ya sidi tai?" ⁵ Malaika de gum juwabu wa kelim le ana, "Del yau arba habub ta sama al tala min mahal al kan humon bi wogif fogo gidam Rabuna ta duniya kulu. Al fogo husan aswed de bi ruwa le duwal al fi safa shimal; ⁶ husan al abiyad del bi ruwa le duwal al fi safa ta garib; wa husan al ramadi abu nukta de bi ruwa leduwal al fi safa ta junub." ⁷ Husan gowin del humon ta wa bi fetisu wa bi lifu fi duniya, malaika gum kelim, "Ruwa lifu fi duniya!" wa humon ruwa le duniya kulu. ⁸ kaman huwo nadi ana wa wonusu le ana gali, "Aynu le del al bi ruwa le duwal ta safa ta shimal; humon bi aburudu roho Tai be sabab ta duwal ta shimal." ⁹ Wa kalam ta Yahwa ja le ana, gali, ¹⁰ "Shilu ataya min nas ta siba - min Heldai, wa min Yedaia - wa ruwa fi nefsu yom dak wa shilu fi bet ta Yushiya jena ta Sofniya, al ja min Babil. ¹¹ Wa kaman shilu fida wa dahab, salau taj wa kutu fi ras ta Yeshu jena ta Yahusadek, reis ta kahana. ¹² Wonusu le huwo wa kelim, "Yahwa ta nas kulu kelim kida: Zol de isim bito Gusun! Huwo bi raba fok fi mahal al huwo fogo wa kaman bi abinu haikal ta Yahwa! ¹³ De huwo yau al abinu haikal ta Yahwa, wa bi libisu huwo be gumash al kuwes ta melik, wa bi geni wa bi hukumu fi kursi bito. Huwo bi kun kahin fi kursi bito, wa huwo bi kun mustishar ta salam fi nus ta itnin del. ¹⁴ Taj de bi wodi le Heldai, Tobiya, Yedaia, wa le Hen jena ta Sofniya ze zikra fi haikal ta Yahwa. ¹⁵ Wa biga del al beid kalis bi ja wa bi abinu haikal ta Yahwa, ashan intakum bi aruf gali Yahwa ta nas kulu yau rasulu ana le intakum; de bi hasil kan intakum sei asuma le sot ta Yahwa Allah takum."