¹ "Fi yom dak bi fatau ena ta moyo le bet ta Daud wa nas al bi gei fi Orshelim, be kalam katiyat wa najasa tomon. ² Fi yom dak - de elan ta Yahwa ta nas kulu - Ana bi gatau bara asami ta asnam min wata, wa ma bi zekiru humon tani mara. Ana bi agilibu anbiya ta wa roho ta najasa bara min wata. ³ Kan ai zol lisa bi istemir fi nobuwat, abu bito wa uma bito al weledu huwo bi kelim le huwo, 'Inta ma bi hai, ashan inta bi wonusu kidib fi isim ta Yahwa!' Yala biga abu wa uma al weledu huwo de bi atanu huwo kan huwo bi naba. ⁴ Fi yom dak ai nebi bi ligo fadiya fi ruwiya bito kan huwo der naba. Anbiya del tani mara ma bi libisu jelebiyat abu shaar, ashan bi kabasu nas. ⁵ Ai wahid bi ja kelim, 'ana ma nebi'! Ana zol al bi ishtakal fi turab, ashan wata de yau shokol tai min zaman ana lisa kan suker!' ⁶ Lakin wahid zol tani bi ja kelim le huwo, 'De dabarat ta sunu zede fi nus idanat taki? Huwo bi juwabu, 'Kan awgu ana sawa ma del al fi bet ta sabihat tai'. ⁷ Ya seif! gum neshitu gisim taki did ruwa Tai, zol al bi wogif tuwali jambu Ana - de elan ta Yahwa ta nas kulu. Dugu al rayi, wa ganamayat kulu bi shetetu! ashan Ana bi lifu idan Tai did del al tabanin. ⁸ Baad dak bi hasil fi kulu mahal - de yau elan ta Yahwa ta nas kulu - gali tiliten min humon bi gatau bara! Nas del bi mutu: bes bi fadulu hinak tilit wahid. ⁹ Ana bi jibu tilit dak de be wasit nar Ana bi safau humon ze fidda al safau: Ana bi aburu humon ze dahab al aburu. Humon bi nadi isim Tai: wa Ana bi juwabu humon, wa bi kelim, 'Del nas Tai!, wa humon bi kelim, 'Yahwa yau Allah tai!"