¹ Wa biga nina bi kelimu shunu? sei kede nina istemir fi katiya ashan neima bi zidu? ² De ma bi agder, nina al mutu an katiya, kef nina lisa bi ish fogo? ³ Inta lisa ma arufu gali nina al akudu mamudiya fi Yesuah de amidu nina fi mutu Bito. ⁴ Biga dofunu nina ma Huwo be wasat mamudiya ta mutu, de hasil ashan Yesuah bes kan gum min mutu ma aejid ta Abu, ashan nina kaman bi dourufi haya al jedid. ⁵ Ashan kan nina biga wahid ma Huwo fi sura ta mutu, nina kaman bi bi kun wahid ma Huwo fi giyama. ⁶ Nina arufu zede, gali jisim ta nina selibu ma Huwo, ashan kida jisim ta katiya bi demiru, de bi hasil ashan nina ma bi kun tani mara abid ta katiya. ⁷ Ashan kulu zol al mutu kutu huwo adil min katiya. ⁸ Lakin kn nina mutu ma al Mesi, nina amin gali nina kaman bi hai ma Huwo. ⁹ Nina arufu gali, al Mesi baad ma Huwo gum min mutu, Huwo ma bi mutu tani mara. Mutu ma indu sulta tani mar fogo Huwo. ¹⁰ Lianu mutu al kan Huwo mutu de ashan katiya, Huwo mutu wahid mara le nas kulu, wa haya al kan Huwo bi ish, Huwo bi ish le allah. ¹¹ Be nefsa teriga, inta kaman bi aynu nefsa inu mutu fi katiya, lakin hai le Allah fi al Mesi Yesuah. ¹² Ashan kida matakum sibu katiya bi hukum jisim takum al mutu. Ashan bi ihterimu shahwat towo. ¹³ Matakum wodi ada ta jisim takum le katiya, ashan adawat al bi istamilu le katiya , lakin wodi takum jisim takum le Allah ze nas al kan jibu min mutu le haya, wa wodi ada ta jisim takum le Allah ze adwat al bi istamilu le kuwes. ¹⁴ Matakum sibu katiya ashan bi hukum intakum, ashan intum ma tehet namus, lakin tehet neima. ¹⁵ Biga shunu? hal keli nina amulu katiya ashan nina ma tehet namus? La de ma bi agder. ¹⁶ Hal intum ma arufu inu le zol al intum gedimu nufus takum le huwo ze abit de yau zol al intum bi ihterimu ? De yaual hagiga aw inta bikun abit le katiya al bi wodi inta le mutu, aw abit ta ihteram al bi wodi le kuwes. ¹⁷ Lakin shukuran le Allah ashan kan intum abit le katiya, lakin intum ihterimu min geliba shikil ta taalim al kan wodi le intum. ¹⁸ Kan hariru min katiya, wa biga amulu intum abit ta shokol kuwes. ¹⁹ Ana wonusu ze insan ashan sokol duf ta jisim takum ashan intum bes gedimu baad min ada ta jisim takum le najasa wa katiya, be nefsa teriga hasa gedimu takum ada ta jisim takum ze abit ashan tahara. ²⁰ Ashan zaman kan intum fi katiya kan intum ahrar min shokol adil. ²¹ Fi zaman dak min hajat takum al ta fadiya de simar towo shunu? netija ta hajat del huwo mutu. ²² Lakin hasa hariru intum min katiya wa intum biga abit le Allah, intum indu simar ta kadasa al netija towo haya al abadiya. ²³ Lianu ujura ta katiya huwo mutu, wa lakin hadiya ta Allah huwo haya al abadiya fi al mesi Yesuah Rabuna ta nina.