¹ Wululu le medina la malian be dom! kulu malain ma kizib wa hajat al seregu; dahaya daimen fugu. ² Lakin Hasa fi iziaaj wa sout ta kura ta markibat wa hasin, wa markibat. ³ Fi hinak nas ta hasin al bi hajimu, wa lehib ta siuf, wa meleng meleng ta laharbat, nas al augu ketir, wa maiteen fi ayi mahal. mafi nihay le jisim tumon; Nas al bi hajimu umon bi sedimu sedimu umon. ⁴ De bi hasil be sabab ta amaiel ta shahuwa zaniya al giyafa, muharin ta kujur, al bi tebiu oual be zinna tuo, wa nas be wasat amaiel ta kujur tuo. ⁵ ''Ayinu takum, Ana did intakum de elaan ta Yahwah Rab al junud Ana bi arfa gumash taki le usa taki wa bi zahiru jisim taki al ma bi ayinu le umam, wa fadiya taki le mamalik. ⁶ Ana bi jada wasaka fugu inta wa Ana bi amulu ihana le inta, wa Ana bi kutu inta deris le ayi zol. ⁷ Yala bi hasil inu ayi zol al bi ayinu le inta bi jere min inta wa bi kelim, 'Nenawa demiro; munu yao bi kuer uwu? Ana bi ligu zol al bi azzi uwu wen?'' ⁸ Nenawa, hala inta afdal min hetta al abinu fi taraf bahar al indu moyo hawili hiya, al bahar yao kan hetta tuo? ⁹ Kush wa Masir yao kan guwa tuo, wa mafi nihaya le uwu; Fut wa Lubim kan musada tuo. ¹⁰ Lakin hetta de kan arfau bara; shilu hiya fi zaman harib; iyal tuo al sukerin gata gatau sukerin fi gidam ta ayi sika; adu tuo jada gura le nas tuo al kubarin, wa kulu nas tuo al uazama rubutu fi ganazir. ¹¹ Inta kaman bikun sakaran; inta bi hawil dusu, wa inta bi fetishu mahal ta dusu min adu taki. ¹² Mayadin taki kulu bi kun ashajar tin ma ashjar al awel: Kan hizu umon, umon binwaga fi gashma ta akila. ¹³ Ayinu, shaab al fi nus takum de nusuwan; abuwab ta beled taki fatau kebir le adu taki; nar akulu abuwab tumon. ¹⁴ Ruwa takum jibu moyo le hisar; guwi hetta taki; dakalu juwa teen wa durur fugu malat; salau muna ta tub. ¹⁵ Nar bi akulu inta hinak, wa sef bi demiro intakum. Bi aragu intakum ze jarad al bi akulu ayi haja. Zidu takum badun takum ketir ze jarad, ketir ze jarad ta al kubar. ¹⁶ Tujar taki biga kutar aktar min nujum fi samawat; lakin umon ze jarad al sukerin: umon nakamu beled wa bi tiri baieet. ¹⁷ Ruwasa taki ketir ze jarad al kubarin, wa musulin taki ze mujumuwa ta jarad al bi limu fi hetta fi zaman ta sekete. Lakin kan shemish tala umon bi tiri le mahal al ma maruf wen. ¹⁸ Melik ta Ashur, ruwa taki naimin; hukam taki bi num tihit bi akudu raha. Shaab taki shetetu fi jubal, wa mafi zol al bi limu umon. ¹⁹ Mafi ilaj al mumkin le dabara taki. Dabarat taki saab kalis. Ayi zol al bi asuma kabarat taki bi duku idenat tumon be farah fugu inta. Munu yao ma murur be sher taki al daimen?