¹ Yesua wonusu be amsal tanimara le umon, gal, ² ''Molokut ta samah ze melik tani al jahizu ihtifal ta iris le weled bitou. ³ Huwo rasulu khudam bitou ashan bi nadi nas al kan rahibu(wodi le umon dahuwa) ashan bi ja le iris, lakin umon ma ja. ⁴ Melik de tanimara rasulu khudam tanin, gali, 'Wori le del al rahibu, ''Ainu, Ana jahizu asha bitai. Dabau(katulu) teiran wa abugar bitai al sumanin, wa jahizu hajat kulu taalu le ihtifal bita iris.''' ⁵ Lakin umon ma kutu balum wa umon masha,(rua), Wahid le mazra, wa tani le tijara bitou. ⁶ Nas tanin del gobudu khudan ta Melik, umon amulu amalia batal le khudam, wa katulu umon. ⁷ Melik tala zalan, wa huwo rasulu jesh bitou wa katulu del al kan mukatilin wa haragu medina tomon. ⁸ Bad dak huwo kelimu le khudam bitou, 'Iris de jahis, lakin del al kan rahibu le iris ma kwesin. ⁹ Bad de amshi(rua ta kun) fi tagatu bita shawari kubar wa nadi nas kutar ali intum ligo ashan ja hadir iris.' ¹⁰ Khudam del masha le shawari kubar wa umon limu nas kulu ali umon ligo, nas al batalin wa al kwesin. Mahal al kan bita iris de biga malyan be diyuf. ¹¹ Lakin fi wokit(zaman) melik de ja le diyuf, huwo ainu zol al ma libisu gumas bita iris. ¹² Melik de kelimu le huwo, ' Sabi, inta ja kef hina bidun gumas bita iris?' Lakin zol de kan ma agder wonusu. ¹³ Bad dak melik de kelimu le khudam. 'Robutu kura wa idan bita zol de, wa jadau huwo fi duluma, fi mahal al bikun fi kore wa adi sunun.' ¹⁴ Nas kutar bi nadi, lakin besitin yau bi azilu.'' ¹⁵ Bad dak Pharisiyin masha wa katitu kef umon bi sherigu Yesua fi kalam al huwo wonusu. ¹⁶ Bad dak umon rasulu le huwo talamiz bitomon, ma nas al min hizib bita Herodos. Umon kelimu le Yesua, ''Mualim, nina arufu inta sah, wa inta bi derisu sika ta Allah be haigiga. Inta ma bi kutu bal bitak le raya ta zol tani, wa inta ma bi ferigu nas. ¹⁷ Bad kida wori le nina, inta bi fekir kef? Hal huwo ganuni (sah) ashan nina bi dafa deriba le Keisar?'' ¹⁸ Lakin Yesua fahim fikra bitomon al sherir wa gal, Le intum bi jeribu ana, intum al mumesilin? ¹⁹ Wori le ana al giris.'' Bad dak umon jibu le huwo dinar. ²⁰ Yesua kelimu le umon, Sura wa kitaba de ta munu? ²¹ Umon kelimu(juwabu) le huwo ''Bita Keisar.'' Bad dak Yesua kelimu le umon, ''wodi le keisar hajat bita Keisar, wa wodi le Allah hajat bita Allah. ²² Fi zaman umon asuma kalam de, umon tala mustagrabin, Bad dak umon sibu huwo wa masha. ²³ Fi nefsu yom Saddukiyin tanin, al bi kelimu gali mafi giyama, ja le huwo. Umon asalu huwo, ²⁴ bi gul, ''Mualim, Musa gal, 'Iza kan zol mat, ma indu iyal, aku tou lazim bi zowuju mara be isim bitou wa bi weledu iyal le aku.'(huwo) ²⁵ Kan fi saba akwan. Al awel zowuju wa bad dak mat. Ma sibu iyal, huwo sibu mara tou le aku tou. ²⁶ Bad dak aku nimra itnin amulu nefsu kalam, bad dak nimra talata, lahadi wosulu le aku nimra saba. ²⁷ Bad umon kulu matu, mara de kaman mat. ²⁸ Hasa fi giyama, mara de bikun bita munu min saba akwana de? Fa umon kan kulu zowuju (hiya) mara de.'' ²⁹ Lakin Yesua juwabu wa kelimu le umon, ''Intum galtanin le a-anu intum ma arufu kitab al mukadas wele guwa ta Allah. ³⁰ Fa fi giyama umon ma bi zowuju wele bi wodi zol tani le zuwaj. Ashan kida umon bikun ze malaikat fi samah. ³¹ Lakin le giyama ta meitin, intum ma agara kalam ali Allah wonusu, gal, ³² Ana Allah bita Ibrahim, Allah bita Isaka, wa Allah bita Yakobo'? Allah ma Allah bita meitin, lakin bita nas al hayin.'' ³³ Fi zaman(wokit) jamahir asuma kalam de, umon tala mustagrabin be dirasa tou. ³⁴ Lakin fi zaman Pharisiyin asuma be inu Yesua sakitu Saddukiyin, Umon limu fi mahal wahid. ³⁵ Wahid min umon, kibar ta ganun, asalu huwo sual, bi jeribu huwo- ³⁶ Mualim, wasaya yatu al akbar fi ganun?'' ³⁷ Yesua kelimu le huwo, '''Hibu Rabana Allah bitak be kulu gelbak wa kulu nefsak, wa be kulu fikra bitak.' De yau akbar wa awel ³⁸ wasaya. ³⁹ Wa wasaya al tani huwo ze de- 'hibu jeran bitak ze nefsak.' ⁴⁰ Itnin wasaya del yau asas ta kulu gawanin wa al anbiya katabu.'' ⁴¹ Fi zaman ali Pharisiyin lisa bi limu bad bitomon, Yesua asalu umon sual. ⁴² Huwo gal ''Intum bi fekir sunu an al Mesih? Huwo weled(jena) ta munu?'' Umon kelimu le huwo, ''weled bita Daud.'' ⁴³ Yesua kelimu le umon, ''Bad de kef Daud bi nadi huwo fi Roho Rabana, Gali, ⁴⁴ Rabana kelimu le Rabana bitai, Ogot(geni) fi yemin bitai, lahadi Ana bi kutu adu taki fi tehet kura bitak'''? ⁴⁵ Izakan Daud bi nadi Al Mesih 'Rabana,' Huwo bi kun weled bita Daud kef?'' ⁴⁶ Mafi zol al bi agder juwabu huwo, wa ma zol tani al deir asalu huwo ai sual tanimara min fi yom dak.