¹ Molokut ta samah huwo ze zol mosul ta bet al masha(rua) saba bediri ashan bi ajiru nas ta sokol le jinena tou. ² Bad huwo tafik ma nas ta sokol de be wahid dinar yomiyan, huwo rasulu umon le jinena tou. ³ Huwo masha tanimara bad talata sahat wa ainu nas tanin ta sokol wagifin sakit fi suk. ⁴ Huwo kelimu le umon, 'Intum kaman, amshi fi jinena, wa ana bi wodi le intum ai haja al kwes.' Bad de umon masha le sokol. ⁵ Huwo masha tanimara baad sita sahat wa tanimara baad tisa sahat, wa amulu nefsu kalam. ⁶ Huwo masha tanimara baad idasar sahat wa ligo tanin bi wogif sakit. Huwo kelimu le umon, Malu intum wagifin sakit nahar de kulu?' ⁷ ''Umon kelimu le huwo, le-anu mafi zol wodi le nina sokol.' Huwo kelimu le umon, 'Intum kaman amshi fi zira.' ⁸ Zaman misa ja, zol al mosul ta jinena de kelimu le zol tou al idari, Nadi umal del wa dafa le umon gurus tomon, abda min al akir le awel,' ⁹ Zaman umal al ajiru baad idasar sahat de ja, kulu wahid min umon akudu wahid dinar. ¹⁰ Zaman umal al awel de ja, umon fekir gali umon bi akudu gurus ketir, lakin kulu wahid min umon bardu akudu wahid dinar ¹¹ Zaman umon akudu gurus tomon, umon gedimu sokwa tomon le zol al mosul ta zira. ¹² Umon gal Umal al akir del istakal bes wahid sah, lakin inta dafa le nina gurus sawa, nina al akudu tegila nahar kulu wa be shemis al sukun.' ¹³ Lakin zol al mosul de juwabu wa kelimu le wahid min umon, hal intum kan ma tafik mai be wahid dinar? ¹⁴ Shilu hajat takum wa amshu(rua takum). Ana azilu ashan wodi le umal al ana ajiru de sawa zema ana wodi le intum. ¹⁵ Hal Ana ma indi hak ashan ana bi amulu ma mumtalakat(hajat) al indi? Wele indakum ghira ashan ana kerim? ¹⁶ Ashan kida al akir bikun awel, wa al awel bikun akir.'' ¹⁷ Zema Yesua mashi lahadi Urselim, huwo shilu talamiz al intnasar beid, wa fi sika huwo kelimu le umon, ¹⁸ ''Ainu, nina mashin lahadi Urselim, wa Ibin al Insan be estelimu le kebir ta kuhana wa mualmin ta sheria. Umon bi wonusu batal didu(yedin huwo) le mut ¹⁹ wa bi istelimu huwo le nas al geir Yahudiyiin bi ataku ma huwo, bi dugu huwo be shot, wa bi selibu huwo. Lakin fi yom a talit bi goumu min al mut.'' ²⁰ Bad dak uma bita awaulad ta Zebedayo ja le Yesua ma awaulad tou. Hiya dengir tehet gidam huwo wa asalu haja min huwo. ²¹ Yesua kelimu le hiya, inta deir sunu?'' Hiya kelimu le huwo, ''Wodi wosiya le awaulad bitai del keli geni, wahid fi yemin taki wa wahid fi shamal taki, fi molokut bitak.'' ²² Lakin Yesua juwabu wa gal, ''Inta ma bi arufu haja al inta bi asalu. Hal inta bi agder asurubu Kubaya al ana bi ja asurubu de?''Umon kelimu le huwo, ''Nina bi agder. ²³ Huwo kelimu le umon, ''Hagiga kubaya bitai intum bi asurubu. Lakin ashan inta bi geni fi yemin bitai wa shamal bitai ma ana yau bi wodi, lakin huwo le del al Abu bitai jahizu le umon.'' ²⁴ Fi zaman talamiz al ashara tanin del asuma kalam de, umon tala zalanin be akwana itnin de. ²⁵ Lakin Yesua nadi umon wa gal, Intum arufu be-inu hukam bita nas al geir Yahud bi hakimu umon be guwa, wa nas bitomon al mohimin bi marisu sulta fi ras bitomon. ²⁶ Lakin keli ma kun be teriga de fi nus bitakum. Afrud ai zol al tala kebir min nus bitakum lazim bikun kadam, ²⁷ wa ai zol al deir yekun awel fi nus bitakun lazim bi kun kadam bitakum, ²⁸ Bes ze Ibin al Insan ma ja ashan bi kadimu le huwo, lakin ashan bi kun kadam, wa ashan bi wodi haya tou bidal nas kutar.'' ²⁹ Zema umon tala min Ariha, adad kebir ta jamahir masha wara huwo. ³⁰ Fi kan itnin nas amiyanin bi geni fi taraf sika. Fi zaman umon asuma be-inu Yesua kan bii yemsi gerib ma umon, umon korek bi shot aali, ''Rabana, Ibin Daud, arhamna.'' ³¹ Jamahir wobiku umon, kelimu le umon keli askut, lakin umon korek biga shedid, ''Rabana, Ibin Daud arhamna.'' ³² Bad dak Yesua wagaf wa nadi umon wa gal, ''Intum deir ashan ana bi amulu le intum sunu?'' ³³ Umon kelimu le huwo, ''Rabana, ashan uyun bita nina bi fata.'' ³⁴ Bad dak Yesua, indu hinia ,lemesu uyun bitomon. Tawali umon biga bi shuf wa masha wara huwo.