¹ Bad sita ayam Yesua shilu ma huwo Butrus, Yakub, wa aku Yohana, wa jabu umon fi jebel fok be nufusum. ² Wusa bitou geiru gidam umon. Wusa bitou bi lama ze shemis, wa gumas bitou abiad ze nur. ³ Fi mahal dak, Musa wa Elia zahiru wa bi wonusu ma huwo. ⁴ Butrus juwabu wa kelim le Yesua, ''Rabana, Huwo bikun kwes ashan nina nakun hina. Kan inta deir, Ana bi abinu talata rokuba wahid le inta, wa wahid le Musa, wa wahid le Elai.'' ⁵ Fi zaman huwo bi wonusu, sihaf lama khati umon, bad dak fi shot bi kelim fi sihaf, ''De weled bitai al Ana bi hibu, ashan huwo Ana moksut( farhan). asma le huwo.'' ⁶ Zaman talamiz asma kalam de, umon waga wa wosum tehet wa kan kaifin. ⁷ Bad dak Yesua ja wa lemesu umon wa gal, ''gum fok wa mata kun kafu.'' ⁸ Bad dak umon ainu fok lakin mafi ai zol ile Yesua. ⁹ Zema umon nazilin min jebel, Yesua wodi le umon wosia, gal, ''Mata kun kabaru ai zol lahadi Ibin al Insan gam min al mut.'' ¹⁰ Talamiz tou asalu huwo, gal, ''Le bad kida mulamin ta sheria bi kelim be-inu Elia lazim bi ja awel?'' ¹¹ Yesua juwabu wa gal, ''Hagiga Elia bi ja wa kutu haja be nizam. ¹² Lakin Ana bi wori le intum, Elia ja kalas, lakin umon ma bi agder zekiru huwo. Lakin, umon amulu ai haja al umon dieru le huwo. Be nefsu teriga, Ibin al insan kaman bi ligo taab fi idan bitomon. ¹³ Bad dak talamiz fahim be-inu huwo bi wonusu le umon an Yohana Mahmadan. ¹⁴ Zaman umon ja le jamahir, zol ja le huwo, degir gidamu, wa gal, ¹⁵ ''Rabana, Amul rahma le weled bitai, Huwo ayan be marad shara wa taban shedid. Bad marat huwo bi waga fi nar wa moya. ¹⁶ Ana jibu le talamiz bitak, lakin umon ma bi agder ashan bi aliju.'' ¹⁷ Yesua juwabu wa gal, jil al ma amin wa bita fasat, Ana bi kun ma intum lahadi miten? Ana bi ithamal ma intum lahadi mtin? Jibu takum le ana. hina.'' ¹⁸ Yesua wobiku roho sherir de, wa roho sherir tala minu, wa weled de ligo ilaj min nefsu sah. ¹⁹ Bad dak talamiz ja le Yesua wa gal, ''Lee nina ma bi turuju roho sherir bara?'' ²⁰ Yesua kelimu le umon, ''Le-anu ashan iman bitakum al saher. Ana bi kelim le intum hagiga, Izakan intum idakum iman hata kan saheir ze bizra al saheir, Intum bi kelim le jebel de, 'Harik min hina le hinak,' wa huwo bi harik, wa mafi ai ²¹ haja ma mustehil le intum.'' ²² Fi zaman umon gaidin fi Jelil, Yesua kelimu le talamiz, ''Ibin al Insan bi stelimu fi idan ta nas, ²³ wa umon bi katulu huwo, wa fi yom al talid bi goumu huwo.'' Talamiz biga ma murtahin. ²⁴ Zaman umon ja le Capernaum, Zol al bi limu daraib bita haikal ja le Butrus wa gal, Hal mualim bitakum ma bi dafa deriba bita haikal? ²⁵ Huwo gal ''nam,'' Zaman Butrus ja fi bet, Yesua kelimu le huwo gal, ''Inta bi fekir sunu, Samaan? Muluk bita ard bi limu daraib min munu? Min iyal tomon wele nas tanin?'' ²⁶ ''min nas tanin.'' Butrus juwabu. Bad kida iyal hur,' Yesua gal. ²⁷ Ashan kida nina ma bi kutu nas ta daraib keli ma amulu katiya, Amsi fi bahar, jadau jabada, wa amsuku awel samak al bital fok. Bad inta kan fata kasuma tou, inta bi ligo gurus min fida. Shilu wa dafa le nas daraib tai wa taki.''