¹ Yahuah kelim le Musa, gali, ² ''Kan ayiwahid akta wa amulu haja al ma kuwes dit Yahuah ma kabasu jeran tao besabab ta haja amusuku fi siika, au kan sibu fi musaulia tao, au an haja al kan seregu, au kan uwo asuru jeran tao, ³ au uwo kan ligo haja al kan jeran tao woduru wa wonusu kidib fogo, au kan uwo alifu be teriga ta kidib, au fi ayi hajat ze delin al yau gi sibu nas amulu katia, ⁴ wa kan uwo amulu katia wa ligo galtan, uwo lazim bi rija ayihaja al silu be nyakama au asuru, au ayihaja al kan wokilu le uwo, au haja al kan woduru lakin gali uwo kalas ligo. ⁵ Bel idafa, fi ayi haja fogo al uwo alifu be kidib, uwo lazim bi rijau haja de be kamil wa uwo lazim bi zidu wahid-kamsa ta al kima tao wa dafa uwo kulu le al sidu fi al yom al uwo yau ligo galat. ⁶ Yela uwo lazim bi jibu tekdima ta galat tao le Yahuah, al koruf ma indu asar min al bahaim al indu taman mukeyem, ze tekdima ta galat le al kahin/abuna. ⁷ Al kahin bi amulu bedil/kafara le uwo gidam Yahuah, wa uwo biga bi afi min ayihaja uwo kan biga galtan amulu.'' ⁸ Biga Yahuah wonusu le Musa, kelim, ⁹ ''Amiru Harun wa awulat tao, kelim, 'De yau al ganun ta al tekdima bi haragu: Al tekdima al bi haragu lazim bi kun ala gelib ta al mazbah kulu lel lakadi sabah, wa al nar ta al mazbah bi kun muwale tawali. ¹⁰ Al kahin bi libisu gumas tao al abiat, wa uwo kaman bi libisu gumas al aitat be jua. Uwo bi arfa fok al rumat al kan sibu bat al nar kalas haragu al tekdima fok al mazbah, wa uwo bi kutu al rumat de fi taraf al mazbah. ¹¹ Uwo bi agila bara gumasat tao al abiat wa libisu gumasat tanin le silu al rumat le bara al kema le al mahal al nedif. ¹² Al nar ala altar kede istemir wala. Uwo lazim kede ma batulu, wa al kahin bi aragu kasab fogo uwo kulu sabah. Uwo bi nizamu al tekdima al bi aragu ze deiru fogo, wa uwo bi aragu fogo al zet ta tekdimat ta al salam. ¹³ Nar lazim kede wala fok al altar mustemira. Uwo lazim ma bi batulu. ¹⁴ De yau al ganun ta al tekdima ta dura. Al awulat ta Harun bi gedimu uwo gidam Yahuah gidam al altar. ¹⁵ Al kahin bi silu fok iden malian ta al degit kuwes ta tekdim ta al dura wa ta al zet wa al bahur al yau fok al tekdima ta dura, wa uwo bi aragu uwo fok al altar le antiju riha al hilu ze gi mesilu tekdima. ¹⁶ Harun wa awulat tao bi akulu sunu al yau fadulu min al tekdima. Uwo lazim bi akulu bedun kemira fi makan mukadas. Umon bi akulu uwo fi gidam ta al kema ta intima. ¹⁷ Uwo lazim ma bi kabisu ma kemira. Ana kalas wodi uwo ze juzu tomon ta tekdima tai al amulu ma nar. Uwo yau kudus kalis, ze tekdimat al katia wa tekdimat al galat. ¹⁸ Ayi weled fogo al ajial ta Harun bi akulu min fogo, ze kararat lel abat abri kulu ajial takun, silu min al tekdimat nar amulu le Yahuah. Ayizol lemesu umon bi kun kudus.''' ¹⁹ Biga Yahuah wonusu le Musa tani mara, kelim, ²⁰ ''De yau al tekdima ta Harun wa awulat tao, al umon bi gedimu le Yahuah fi al yom kan ayi welet yau mashu: al nisba asara ta juzu ta kimiat ta degit al kuwes ze tekdimat ta dura daiman, nus tao fi sabah wa nus tao ta uwo fi al misa. ²¹ Uwo bi amulu ma zet fi tawa. Zaman uwo kalas ajinu, ita bi jibu uwo fi jua. Fi gitaat mukaba ita bi gedimu al tekdima ta dura ashan le antiju riha hilu le Yahuah. ²² Al welet ta al rais kahana al uwo yau bija kun al rais al kahana al jedit min wasat awulat tao bi gedimu uwo. Ze amiru leleabat, kulu min uwo bi aragu le Yahuah. ²³ Ayi tekdimaat dura ta al kahin bi aragu bara kulu. Uwo lazim ma bi akulu.'' ²⁴ Yahuah wonusu le Musa tani, kelim, ²⁵ ''Wonusu le Harun wa le awulat tao, kelim, 'De yau al ganun ta al tekdimat katia: Al tekdimat katia lazim bi katulu fi al makan ali al tekdima al aragu yau katulu gidam Yahuah. Uwo yau kudus kalis. ²⁶ Al kahin al bi gedimu uwo le katia bi akulu. Uwo lazim bi akulu fi makan al mukadas fi gidam ta al kema ta intima. ²⁷ Ayisnu lemesu laham tao bi kun kudus, wa iza al dom yau rusu fogo ayi gumas, ita lazim kasulu uwo, al juzu al kan rusu fogo, fi makan al kudus. ²⁸ Lakin al guruma min tiin al rakabu fogo uwo lazim bi kasuru. Iza yau kan rakabu fi guruma ta nihas, uwo lazim ma bi istamilu tani mara bat ma kasulu fi moyo nedif. ²⁹ Ayi rajil finus al kahana bi akulu juzu min fogo lianu uwo yau kudus kalis. ³⁰ Lakin ayi tekdimat katia al dom yau jibu fijua al kema ta intima le amulu kafara fi al makan kudus lazim ma bi akulu. Uwo lazim bi aragu.