¹ Yahuwa wonusu(kelimu) le Musa, gal, ² wonusu le Aaron wa le awulad tou, wori le umon keli geni beid min hajat al mukadisin bita nas bita Isreal, al umon kutu kas le ana. Umon kede ma alisu isim bita al mukadas. Ana Yahuwa. ³ Kelim le umon, Izakan ai wahid min usra bitak fi kuku ajial ja gerib le hajat al kudusyiin al nas bita Israel kutu kas le Yahuwa, fi zaman huwo nijis, lazim zol dak kede abusu beid min ana(min kidma): Ana Yahuwa ⁴ Mafi zol min usra bita Aaron al indu marad jildia al bi rahalu(intekil), au tasamum min jisim tou, bi akulu ai zebiha jahizu(amulu) le Yahuwa lahadi huwo biga nedif. Ai zol al lemesu ai haja nijis be wasat lemesu meit, au lemesu zol al indu sahil monowi, ⁵ au ai zol lemesu ai haiwan al bi douru be batna al bi kutu huwo nijis, au ai najasa al fi- ⁶ Bad dak gesis al lemesu ai haja nijis bikun nijis lahadi misah. huwo lazim ma bi akulu ai hajat al mukadisin ile kan huwo istahama(hamam). ⁷ Fi wokit semis nazal(bita misah) huwo bad dak bikun nedif. baad al misah huwo bi akulu min hajat al kudus, le-anu del akil tou. ⁸ Huwo lazim kedei ma akulu ai haja al ligo meit au haiwan al wais katulu, be teriga al huwo bi wasaku nefsu. Ana Yahuwa. ⁹ Gusus lazim kede tabi tojihad(kalamat) bitai, au umon bikun galtanin be katiya wa bi mutu ashan alisu ana. Ana Yahuwa al kutu umon yekun mukadisin. ¹⁰ Mafi zol bara min usra bita gesis, edafa an diyuf bita gesis au kudam bitou al ajiru, bi akulu ai haja al kudus. ¹¹ Lakin izakan gesis istara ai kadam be gurus bitou, Kadam dak bi akulu min hajat al kutu kas le Yahuwa. Ada bita usra bita gesis wa kudam al weledu fi bet tou, umon kaman bi akulu ma huwo min hajat dak. ¹² Izakan bit bita gesis zowuju zol tani al ma gesis, hiya ma bi akulu ai haja al mukadas al barau hataya. ¹³ Lakin izakan bit bita gesis armala, wele talagu, wa izakan hiya ma indu jena, wa izakan hiya raja ashan geni fi bet bita abu tou ze hiya kan shaba, hiya bi akulu min akil bita abu tou. Lakin ma zol al fi usra bita gesis bi akulu min akil bita gesis. ¹⁴ Izakan zol akulu akil al mukadas bi dun huwo ma arufu, Bad dak huwo bi dafa le gesis; huwo lazim bi zidu kamsa fi miya fogo wa bi wodi le gesis. ¹⁵ Nas bita Israel lazim keli ma alisu hajat al mukadas al umon arfa wa gedimu le Yahuwa, ¹⁶ wa sabab le umon ashan arafau katiya al kutu umon galtanin fi akulu akil al mukadas, Ana Yahuwa al kutu umon mukadisin."' ¹⁷ Yahuwa wonusu(kelimu) le Musa, gal, ¹⁸ Wonusu le Aaron wa awulad tou, wa le nas kulu bita Israel. Kelim le umon, 'Ai Israeli, au ajnabi al gaid fi Israel, fi wokit umon bi gedimu zebiha- hata kan bi kamilu tegdir, au hata kan hataya al zol bi wodi be nefsu, au umon bi gedimu hataya be teriga bita harik le Yahuwa, ¹⁹ Izakan huwo bi gabilu, umon lazim bi gedimu haiwan al rajil(zukur) bidun eeb min abugar, korufan, au ganamayat. ²⁰ Lakin lazim intum kede ma gedimu ai haja al indu eeb. ²¹ Be niyaba bitak Ana ma bi gabilu Ai zol al gedimu zebiha bita musharaka min gita bita bahaim le Yahuwa ashan bi kamilu tegdir, au ze hataya al inta bi gedimu be niya bitak, huwo lazim bi gabilu bidun eeb. Lazim kede haiwan de ma endu eeb. ²² Inta lazim kede ma gedimu haiwan al amiyan, mukasar wele awugu, au al indu amrad jildia. Inta lazim kede ma gedimu del le Yahuwa ze zebiha be nar fi mambar. ²³ inta mumkin bi gedimu be niya bitak hataya tor au koruf al mazur au suker, lakin hataya ze dak al gadiru ma bi gabilu. ²⁴ Mata gedimu ai haiwan le Yahuwa al indu jara, al sedimu, sheretu, au gatau kisia tou. Mata amulu kalam de fi ardi bitak. ²⁵ Inta lazim keli ma gedimu kubs(rakif) bita Allah bitak min idan bita zol ajnabi. Haiwanat dak mazurin wa indu eeb fi jisim tomon, ma bi gabilu umon min inta."' ²⁶ Yahuwa wonusu(kelimu) le Musa wa gal, ²⁷ Fi wokit jena bagar au jena koruf au jena ganamaya weledu, huwo lazim keli geni sabah ayam ma uma tomon. Bada dak fi yom nimra tamaniya, huwo mumkin bi gabilu ze zebiha le tegdim al haragu be nar le Yahuwa. ²⁸ Mata katulu bagara au koruf ma iyal bitomon al sukerin, kulu itnin fi nefsu yom. ²⁹ Fi wokit inta bi gedimu zebiha ze tegdim bita sukur le Yahuwa, ³⁰ Inta lazim bi gedimu zebiha fi teriga al bi gabilu(rudu). Lazim bi akulu fi nefsu yom al gedimu zebiha. Inta lazim ma bi sibu wahid min umon le sabah . Ana Yahuwa. ³¹ Bad kida inta lazim bi hafisu wasaya bitai wa nafisu. Ana Yahuwa. ³² Inta lazim keli ma alisu isim bitai al kudus. Lazim keli nas bita Israel arufu ana kudus. Ana Yahuwa al bi kutu intum ashan yekun kudus, ³³ Al jibu intum bara min ardi bita Masir ashan bikun Allah bitakum: Ana Yahuwa."