¹ Zaman kulu muluk al bi geni fi gata nahar Urdon wa fi murtafat, wa fi tihit ta murtafat traf ta Nahar al azim le safa ta Lobnan- Al Hisiun wa Amoriun,wa Kanaaniun, wa Ferziun wa Hawiun wa Yabusiun- ² umon limu sawa be sout wahid ashan bi haribu Yashu wa Israel. ³ Zaman Sukan ta Jabeon asuma haja al Yashu amulu le Ariha wa Ai, ⁴ umon ja be kuta ta kidib. Umon ja ze nas al rasulu. Umon shilu gesh al gedim le hamir tumon. Wa gurumat al gedim al rubutu le kumur tumon. ⁵ Wa libisu naal al gedim, wa gumashat al gedim, gumashat al garabu. Akil tumon kulu kan yabis wa karabu. ⁶ Yala umon ruwa le Yashu fi Jiljal fi kaima tuo wa kelim le huwo wa le rujal ta Israel, ''Anina ja min beled bait kalis, kede itakum amulu tifagia ma anina.'' ⁷ Rujal ta Israel kelim le Hauwin, ''Ihtimal itakum bi geni gerib ma anina. Kef anina bi amulu itefagia ma itakum?'' ⁸ Umon kelim le Yashu, ''Anina abeed taki.'' Yashu asalu umon, Itakum nas munu? Itakum ja min wen? ⁹ Umon kelim le huwo, ''Abeed taki ja min beled al bait kalis, ashan kalam ta isim ta Yahwah Ilah taki. Anina asuma kabara tuo wa ayi haja al Huwo amulu fi Masir ¹⁰ wa ayi haja al huwo amulu le itnin muluk ta Amoriin fi gata nahar Urdon le Sihon melik ta Hashbon, wa le Oj melik Bashan al kan bi geni fi Ashtarus. ¹¹ Shiuk ta nina ma kulu sukan ta beled ta anina kelim le anina, ''Shilu takum akil ziada fi iden takum le sika. Ruwa takum gabilu umon wa kelim takum le umon, ''Anina abeed takum. Amulu takum itefagia ma Anina.'' ¹² De yao rekif ta anina, kan lisa kues zaman anina shilu min biut ta nina fi yom al anina bada musuwar ta nina ashan bi ja le itakum. Lakin ayinu hasa, biga yabis wa karabu. ¹³ Gurumat de kan jedid zaman anina maluo umon, ayinu hasa biga bi naga. Gumashat wa naal ta anina karabu be kalam ta mushuwar al tuwil.'' ¹⁴ Yala rujal ta Israel shilu min hajat ta nas de, lakin umon ma asalu Yahwah ashan bi gedimu umon. ¹⁵ Yashu amulu salam ma umon wa amulu itefagia ma umon, ashan bi sibu umon geni. Mugediminta nas delin kaman halifu le umon. ¹⁶ Baat talata yom baat ma Israeliin amulu itefagia ma umon, umon ja arufu inu umon jeranat tumon wa umon bi geni gerib. ¹⁷ Yala nas ta Israel limu wa ja le mudon tumon fi yom nimra talata. Mudon tumon de kan Jabeon, Kafira , Bairus, wa garia ta Yaarim. ¹⁸ Shaab ta Israel ma hajimu umon lanu mugedimin tumon halifu an umon gidam ta Yahwah, Ilah ta Israel. Israeliin kulu bi neng neng le ruwasa tumon. ¹⁹ Lakin ruwasa tumon kelim le umon, ''Anina ma bi ageder lemesu umon, ashan anina halifu le umon gidam ta Yahwah. ²⁰ Anina bi amulu le umon kida: Ashan anina ma bi sibu haja kaab bi hasil le anina be halifa al anina halifu le umon, anina bi sibu umon haiin.'' ²¹ Ruwasa kelim le nas tumon, ''Sibu takum umon kede ish.'' Umon bi kun nasa al bi gata kashab wa bi angulu moyo le Israeliin kulu. ²² Yashu nadi umon wa kelim le umon, ''Malu itakum kabsu anina zaman itakum kelim, Aninabait kalis min itakum', ligu itakum bi geni gerib ma anina? ²³ Ashan kalam de, itakum muluonin wa baad min itakum diaman bi kun nas al bi gata kashab wa bi angulu moyo fi bet ta Ilah tai.'' ²⁴ Umon juwabu Yashu wa kelim, ''Ashan weri le abeed taki inu Yahwah Ilah taki kelim le kadam tuo Mosa kede wedi le itakum wata de kulu, wa bi demiro sukan ta wata de kulumin gidam takum- ashan kida anina kan kaifin min le badun ta anina min itakum. De sabab al sibu anina amulu kida. ²⁵ Hasa, anina fi iden taki. Haja al ita bi ayinu kues wa sah ashan bi amulu le anina, amulu,'' ²⁶ Yaahu amulu le umon kida: Huwo angizo umon min iden ta Israeliin kede ma katulu umon. ²⁷ Yom dak de Yashu kutu Jabeoniin nas al bi gata kashab wa bi angulu moyo le mujtama, wa le mazbah ta Yahwah, lahadi yom ta aleela, fi mahal al Yahwah bi iktar.