¹ Yahwah kelim Yashu, ''Mata kafu; wa kede geliba taki ma karabu. Shilu ma Inta nas ta harib kulu. Ruwa le Ai. Ayinu, Ana selimu le inta melik ta Ai, ma nas tuo , wa medina tuo, wa ard tuo. ² Inta bi amulu le Ai ma melik tuo ze ma inta amulu fi Ariha ma melik tuo, ile hajat al bi shilu ganima wa mawashi le badon takum. Amulu kemin be wara medina.'' ³ Yala Yashu gum wa shilu rujal ta harib kulu wa ruwa le Ai. Yashu iktar teletin alf rajil- guwi wa shuja, wa huwo rasulu umon bilel. ⁴ Huwo kelim le umon, Ayinu takum, itakum kede amulu kemin did medina, be wara tuo. Matakum ruwa bait min medina de, lakin itakum kulu kede kun jahiz. ⁵ Yala Ana ma kulu rujal al ma ana be ruwa le medina de, kan umon tala der hajimu anina, anina bi jere min umon ze kan hasil. ⁶ Umon bi jere wara ta anina lahadi anina bi juru umon bait min medina. Umon bi kelim, 'umon bi jere min anina ze kan umon jere mara al fat.' Yala anina bi jere min umon. ⁷ Yala itakum bi tala min mahal dusu takum, wa itakum bi gubudu medina de. Yahwah Ilah takum bi wedi le iden takum. ⁸ Kan itakum gubudu medina de, itakum bi aragu kulu. Itakum bi amulu ligu itakum bi teii wesiya al wedi be kelima ta Yahwah. Ayinu Ana weri le itakum.'' ⁹ Yashu rasulu umon bara wa umon ruwa le mahal tumon ta kemin, umon dusus bainu Bet Il wa Ai le safa garib ta Ai. lakin Yashu num bilel taki fi nus ta shaab. ¹⁰ Yashu gum sabah bederi wa jahizo asakir tuo, Yashu ma shiuk ta Israel, umon hajimu nas ta Ai. ¹¹ Kulu rujal ta harib al kan ma huwo ruwa wa safa ta medina. Umon ja gerib wa nezil fi safa shamal ta Ai. Hasa kan fi wadi bain umon wa Ai. ¹² Huwo rasulu ze kamsa alif rujal ashan bi amulu kemin fi safa garib ta medina bainu Bet Il wa Ai. ¹³ Umon wazau asakir de kulu, jesh al ketir fi safa shamal ta medina, wa Saga safa garib ta medina.Yashu geni bilel dak kulu fi wadi. ¹⁴ Zana melik ta Ai ayinu kalam de, huwo gum ma jesh tuo gum sabah bederi wa tala bara guwam guwam ashan bi hajimu Israel fi mahal isim tuo Miaad fi wadi nahar Urdon. Huwo ma aruf fi kemin be wara ta medina. ¹⁵ Yashu ma Israel kulu jere gidam tumon, le safa ta sahara. ¹⁶ Kulu nas al kan fi medina nadi ashsn bi turuju umon, wa umon jere wara ta Yashu lahadi jurur umon bait min medina. ¹⁷ Mafi ayi rajil al sibu fi medina ta Ai wa Bet Il al ma jere wara ta Israel. Umon sibu medina fadi wa umon jere wara ta Israel. ¹⁸ Yahwah kelim le Yashu, ''Mido harba al fi iden taki le safa ta Ai, lanu Ana bi ruwa selimu Ai fi iden taki.'' Yashu mido harba al kan fi iden tuo le safa ta medina. ¹⁹ Asakir al kan bi dusus fi kemin tumon tala guwam min mahal tumon ze huwo bi mido iden tuo. Umon jere wa dakalu medina wa gubudu medina de. Umon wala nar guwam fi medina. ²⁰ Rujal ta Ai lefet wa ayinu wara. Umon ayinu dukahan bi tala min medina, wa umon biga ma ageder jere be sika de wele sika dak. Lanu shaab Israel al kan bi jere min umon gilibu le umon al bi jere wara tumon. ²¹ Zaman Yashu ma jesh al ma huwo ayinu kemin de gubudu medina be dukahan bi tala fuk, umon rija wa katulu rujal ta Ai. ²² Wa tanin de tala min medina did umon, ashan bi gubudu umon fi nus, umon biga fi nus ta shaab Israel, tanin be safa de wa tanin be safa dak. Israel hajimu rujal ta Ai; mafi zol min umon al tal hai aw jere. ²³ Umon gubudu melik ta Ai hai wa jibu le Yashu. ²⁴ Wekit Israel kalasu katulu kulu nas al bi geni fi Ai al jere wara tumon le sahara, wa zaman umon kulu katul, le lahadi akir zol, katulu be sef, Israel kulu rija fi Ai. Umon hajimu Ai be sef. ²⁵ Delin al katulu fi yom dak, rujal wa nuswan, kan itnashar alf, kulu nas ta Ai. ²⁶ Yashu ma nezilu iden tuo al huwo arfa be harba, lahadi huwo kalasu demiro nas ta Ai kulu. ²⁷ Israel bes shilu mawashi wa ganiaim min medina le nefus tumon, ze Yahwah weri le Yashu. ²⁸ Yashu aragu Ai wa sibu Ai biga kum lel abad. Karabu Ai le yom ta aleela. ²⁹ huwo haligu melik ta Ai fi kashab le asia. zaman shemis biga bi waga, Yashu kelim le umon kede nezilu jisim ta melik min kashab wa kede jadaw gidam abuab ta medina. Umon limu hujar ketir fi ras ta tuo. Kum ta hujar de fadulu hinak lahadi yom ta aleela. ³⁰ Yala Yashu abinu mazbah le Yahwah, Ilah ta Israel, fi ras ta jebel Ebal, ³¹ ze Mosa kan weri le shaab Israel, ze kan katibu fi kitab ta ganoon ta Mosa: ''Mazbah min hujar al kues al mafi zol arfa fugu hadid.'' Huwo gedim fugu zabaih mahruk le Yahwah, wa umon gedimu zabaih ta salama fugu. ³² Gidam ta shaab Israel, huwo kaibu fi hujar nuskah min ganoon ta Mosa. ³³ Israel kulu, shiuk tumon, ruasa, wa guda tumon wegif fi itnin safa ta tabot gidam ta Kahana wa Lawin al bi arfa tabot ta ahad ta Yahwah ajanib wa nas al weledu hinak nus tumon wegif gidam ta jebel Jerizim wa nus tani wegif gidam jebel Ebal. Umon bariku shaab Israel, ze ma Mosa kadam ta Yahwah kelim le umon min bidaya. ³⁴ Yala Yashu agara kulu kelimat ta ganoon, barakat wa lanat, ze ma katibu fi kitab ta ganoon. ³⁵ Mafi kelima al fi kitab ta Mosa la Yashu ma agara gidam ta shaab Israel, sawa ma nusuwan, wa iyal sukerin, ma ajanib al bi geni fi nus tumon.