¹ Lakin shaab Israel kan ma amini umon amulu kiana be kusus hajat ta haram al kan kede demiro. Akahan weled ta Karmi weled ta Zebedi weled ta Zarih al min gebila ta Yahuza shilu min hajat ta haram, wa zalan ta Yahwah nezil fi Israel. ² Yashu rasulu rujal min Ariha le Ai, al kan gerib ma Bet Aun, safa sherik ta Bet il. Huwo kelim le umon ''Ruwa takum wa jesisu wata de.'' Yala rujal de ruwa wa jesisu Ai. ³ Zaman umon rija le Yashu, umon kelim le huwo, ''Mata rasulu nas de kulu ashan kede ruwa fi Ai. Bes kede ita rasulu itnin aw talata alf rujal al bi ruwa wa hajimu Ai. Mata sibu nas de kulu bi ruwa fi tab ta harib, lanu jama de adad tumon besit.'' ⁴ Bes talata alf rujal al ruwa min jesh, umon jere min gidam ta Ai. ⁵ Rujal ta Ai katulu sitta wa teletin rajil wa turujdu umon min medina le musafa ta jada hajer, wa katulu umon ze ma umon be nezil safa ta murtefe. Gulub ta shaab kulu zub ze wa biga ze moyo. ⁶ Yala Yashu sheretu gumash tuo. Huwo ma Shiuk ta Israel wa kutu turab fi ras tumon wa dengir usa tumon gidam tabot ta Yahwah, lahadi asia. ⁷ Yala Yashu kelim, ''Ah, Yahwah Rabuna, malu Ita jibu nas de be safa ta Urdon fi jebel? Ashan bi selimu anina le iden ta Amoriin ashan bi demiro anina? Aker kan kan anina rudu geni safa ta Urdon al tani de! ⁸ Rabuna ana bi kelim shunu, baat ma Israel gilibu tahar tumon le adu tumon? ⁹ Lanu Kanaanin ma kulu nas al bi geni fi beled de bi asuma kalam de. Umon bi gufulu anian wa bi siba dunia kulu bi nesitu isim ta nina. Ita bi amulu shunu le isim taki al azim? ¹⁰ Yahwah kelim le Yashu, ''Gum fuk! malu ita bi dengir usa taki tihit? ¹¹ Israel amulu katiya. Umon kasur ahad tai al Ana weri le umon. Umon seregu hajat ta haram. Umon seregu wa kaman amulu katiya be kutu hajat al umon seregu de fi nus hajat tumon. ¹² De yao netija, shaab Israel ma bi ageder wegif gidam ta adu tumon. Umon gilibu tahar tumon le adu tumon ashan umon be nufus tumon biga muharam. Ana bi ruwa kon ma iatkum ile kan itakum demiro hajat al der edmiro min nus takum. ¹³ Gum fuk! wa kadisu nas de le Ana wa weri le umon , 'Kadisu takum badun takum le bukura. Ashan Yahwah, Ilah ta Israel kelim, ''Fi hajat ta haram lisa fi nus takum ya Israel al der kede demiro. Itakum ma bi ageder wegif gidam adu takum ile kan itakum demiro hajat ta haram min nus takum.'' ¹⁴ Sabah sabah, kede itakum ja hasab gabeil takum. Gebila la Yahwah bi iktar bi ja gerib sawa ma abuwab tumon. Wa bab al Yahwah bi iktar bi ja usar tumon. Wa usar al Yahwah bi iktar bi ja wahid wahid. ¹⁵ Usara al bi ilktaru, al shilu hajat ta haram de, bi aragu zol de, ma ayi haja tuo, ashan huwo kasuru ahad ta Yahwah asahn huwo amulu haja shen fi Israel.''' ¹⁶ Yala Yashu gum sbah bederi wa limu Israel, gebila be gebila, wa gebila ta Yahuza yao iktaro. ¹⁷ Yashu jibu abuwab ta Yahuza gerib, bab ta Zarahiin yao shilu. Huwo jibu rujal ta Zarahiin kulu, wa Zabadi yao shilu. ¹⁸ Huwo jibu usar ta Zabadi gerib, zol, zol, wa Akahan, weled ta Karmi, weled ta Zabadi, weled ta Zarih, min gebila ta Yahuza, yao iktaro. ¹⁹ Yala Yashu kelim le Akahan, ''Weled tai, wunuso hagiga gidam ta Yahwah, Ilah ta Israel, wa kede ita iterif le Huwo. Arujuk weri le ana haja ala ita amulu. Mata dusu min ana.'' ²⁰ Akahan juabu le Yashu, ''Hagiga, Ana amulu katiya did Yahwah, Ilah ta Israel. De yao haja al ana amulu: ²¹ Ana ayinu fi nus ta ganaim fi gumash giyafa min Babilion, wa miten shagil ata fidda, nia tai waga fugu umon wa ana shilu umon. Ana dusu umon fi nus fi wata fi nus kaima tai, wa fidda de fi tihit tumon.'' ²² Yashu rasulu zol kede ruwa fi kaima fi makan al dusu hajat de fugu. Zaman umon fetishu, umon ligu dusu fi kaima ta ta tuo, wa fidda tihit tumun. ²³ Umon shilu hajat de min nus ta kaima wa jibu le Yashu wa le kulu shaab Israel. umon kubu hajat de bgidam ta Yahwah. ²⁴ Yala Yashu, ma kulu shaab Israel, shilu Akahan weled ta Zarih, ma fidda de, wa gumash de, wa lisan ta dahab, wa awlad wa banat tuo, wa bagarat, wa hamir, wa kurfan, wa kaima tuo ma kulu hajat al huwo indu, wa umon jibu le wadi Akhor. ²⁵ Yala Yashu kelim, ''Malau ita waskanu anina? Yahwah bi waskanu ita aleela.'' Israel kulu luku huwo be hujar. Yala bagi nas de umon luku be hijar wa aragu umon be nar. ²⁶ Umon limu hujar keitr fi ras tuo al fi lahadi yom ta aleela. Yala Yahwah rija min zalan tuo. Ashan kida isim ta mahal de kutu Wasi Akhor lahadi yom ta aleela.