¹ Yala Yashu limu kulu gabaiel Israel fi Shekim wa nadi shiuk ta Israel, mugedimin tumon, wa guda tumon,wa ruwasa tumon, wa umon ja gidam ta Allah. ² Yashu kelim le kulu shaab, ''De haja al Yahwah, Ilah ta Israel, kelim' Aba takum fi sinin wara umon geni fi Nahar al Farat- Tarih abu ta Abrahim wa Nahor wa umon abodu rabunat tanin. ³ Lakin Ana shilu abu takum min Nahar Farat wa shilu huwo le ard kanaan wa wedi le huwo iyal ketir be wasat ta jena tuo Aizak. ⁴ Wa le Aizak huwo wedi Yagub ma Esau. Ana wedi le Esau jebel Seir miras, lakin Yagub ma iyal tuo ruwa fi Masir. ⁵ Ana rasulu Mosa wa Haron, wa drubu Masriin be darabat. Baat kida Ana tala itakum bara. ⁶ Ana tala aba takum bara min Masir, wa itakum ja le bahar. Masriin turudu umon be arabat wa hasin tumon ta harib lahadi Bahar al ahmar. ⁷ Wekit aba takum kure le Yahwah, huwo kutu duluma bainu itakum ma Masriin. Huwo sibu bahar rija fi ras tumon wa kati umon. Itakum ayinu haja al Ana amulu fi Masir. Yala itakum geni fi sahara zaman tuwil. ⁸ Ana jibu itakum le ard ta Amoriin, al bi gene fi safa tani ta Urdon. Umon shakila ma itakum, wa Ana selimu umon fi iden takum. Itakum werisu ard tumon, wa Ana demiro umon gidam takum. ⁹ Yala Balak jena ta Safur, melik ta Moab, gum wa hajimu Israel. Huwo rasulu kede nadi Balaam jena Baor, ashan bi lannnu itakum. ¹⁰ Lakin Ana ma asuma le Balaam jena ta Baor, huwo bariku itakum. Ana angizu itakum bara min iden tuo. ¹¹ Itakum ruwa len Urdon wa ja le Ariha. Ruwasa ta Ariha shakila did itakum, sawa ma Amoriun, wa Ferziun, wa Kanaaniun, wa Haissiun, wa Jarjashiun, wa Hawiun, wa Yabusiun wa Ana selimu umon fi iden takum. ¹² Ana rasulu zanabir gidam takum, al drudu umon wa itnin muluk ta Amoriun min gidam takum. De ma hasilbe sef wele neshab takum. ¹³ Ana wedi le itakum ard al itakum ma taban fugu wele itakum abinu, wa hasa itakum bi geni fugu umon. Itakum akulu simar wa zaitun ta jinenat al itakum ma zarau.' ¹⁴ Hasa kafutakum Yahwah wa abudu huwo be kulu istigama wa amana; demiro takum rabunat al aba takum abudu safa nahar Farat wa fi Masir, wa abudu takum Yahwah. Kan bi zahir batal fi ena takum ashan bi abudu Yahwah, ¹⁵ kede itakum iktar min yom ta aleela munu al itakum bi abudu, kan de rabunat al aba takum abudu fi safa nahar Farat, wele rabunat ta Amoriun, al itakum bi geni fi ard tumon. Lakin ana wa bet tai, anina bi abudu Yahwah.'' ¹⁶ Shaab juabu wa kelim, ''Anina ma bi sibu Yahwah ta kulu kulu ashan bi abudu rabunat tanin, ¹⁷ lanu de Yahwah Ilah ta nina al jibu anina wa aba ta anina min ard Masir, bara min bet ta abudia, al amulu azaim fi iyon ta anina, wa hafisu anina fi kulu sikat al anina ruwa fugu, wa min nus kulu shaab al anina mururu be nus tumon. ¹⁸ Yala Yahwah drudu shaab kulu bara min gidam ta anina, sawa ma Anoriun al bi geni fi ard de. Ashan kida anina kaman bi abudu Yahwah, ashan huwo Ilah ta anina.'' ¹⁹ Lakin Yashu kelim le shaab, ''Itakum ma bi ageder akdim Yahwah, ashan huwo Ilah Kudus; huwo Ilah ta girra; huwo ma afi kataya zunub takum. ²⁰ Kan itakum sibu Yahwah Yahwah wa abudu rabunat ta ajanib, yala huwo bi rija amulu itakum kaab. Huwo bi demiro itakum, baat ma huwo amulu kues le itakum.'' ²¹ Lakin shaab kelim le Yashu, ''La, anina bi abudu Yahwah.'' ²² Yala Yashu kelim le shaab, ''Itakum shuhud did nufus takum itakum iktar le badun takum Yahwah, ashan bi abudu huwo.'' Umon kelim, ''Anina shuhud.'' ²³ Sibu takum rabunat al garib al fi ma itakum de, wa rija gulub takum le Yahwah, Ilah ta Israel.'' ²⁴ Shaab kelim le Yashu, ''Anina bi abudu Yahwah Ilah ta anina. Anina bi asuma le sout tuo.'' ²⁵ Yashu amulu waad ma shaab fi yom dak. Huwo kutu le umon ganoon sabit fi Shekim. ²⁶ Yashu katibu kelimat ta kitab ta ganoon ta Allah. Huwo shilu hajer kebir wa kutu hinak tihit shejera ta Balota al kan jambu makdas ta Yahwa. ²⁷ Yashu kelim le shaab kulu, ''Ayinu takum, hajer de bikun shahid le anina. Lanu uwu asuma kulu kelimat al Yahwah kelim le Anina. Ashan bikun shahid did itakum, ashan itakum ma bi anguru Yahwah ta kulu kulu. ²⁸ Yashu rasulu shaab bara, kulu zol le mahal tuo. ²⁹ Baat hajat de kulu Yashu weled gta Nun, kadam ta Yahwah, mutu ligu umor tuo 110 sena. ³⁰ Umon dufuno huwo fi hudud ta miras tuo, fi Timna Sarih, al fi jebel Afraim, shamal jebel Jaiesh. ³¹ Israel abudu Yahwah fi ayamat ta Yashu, wa kulu ayamat ta shiuk al ish aktar min Yashu wa al ektebir ayi haja ala yahwah amulu le Israel. ³² Udam ta Yusuf, al shaab Israel jibu sawa min Masir- umon dufuno fi Shekim, fi gita ta wata al Yusuf ishteri min iyal ta Hamor, abu ta Shekim. Huwo isteri be miya gita ta fidda, wa biga werisa le iyal ta Yusuf. ³³ Aliazar weled ta Haron kaman mutu wa dufuno huwo fi Jibaa, medina ta Fenihas jena tuo, al kan wedi le huwo. Kan fi jebel Afraim.