¹ Zaman Adoni Sadig, melik ta Urshelim asuma inu Yashu gubudu Ai wa demiro ta kulu kulu (ze ma huwo amulu le Ariha ma melik tuo), wa kaman huwo asuma kef nas ta Jabeon amulu salam ma Israel wa biga bi geni ma umon. ² Nas ta Urshelim ka kaifin lanu Jabeon de medina kebir, ze wahid min mudon al mulakia. Uwu kan kebir min Ai, wa rujal tuo kulu kan nas ta harib al saab. ³ Doni Sadig, melik ta Urshelim, rasulu risala le Hoham, melik ta Habron, le Firam melik ta Yarmut, wa le Yafi, melik ta Lachish, wa le Dabir, melik ta Ajlon: ⁴ ''Taal takum saido ana. Kede anina hajimu Jabeon lanu umon amulu salam ma Yashu wa shaab Israel.'' ⁵ Kamsa muluk ta Amoriin, melik ta Urshelim, melik ta Habron, melik ta Yarmut, melik ta Lachish, ma melik ta Ajlon ja sawama jesh tumon. Umon ja haribu Jabeon. ⁶ Nas ta Jabeon rasulu risala le Yashu, wa le jesh ta Jilja. Umon kelim, ''Taal guwam, mata amsuku iden taki min abeed taki. Taal le anina guwam wa kalisu anina, Saido anina, lanu muluk ta Amoriin kulu al bi geni fi jebel limu sawa ashan bi hajimu anina.'' ⁷ Yashu ruwa min Jiljal ma kulu rujal ta harib, wa rujal ta shakila. ⁸ Yahwah kelim le Yashu, ''Mata kafu min umon. Ana selimu umon fi uden taki. Mafi zol min umon bi wegif gidam taki.'' ⁹ Yashu ja le umon faja, huwo duoru bilel kulu min Jiljal. ¹⁰ Yahwah shewishu adu de gidam ta Israel, wa Israel katulu umon kalis fi Jabeon wa turudu umon be sika al bi ruwa le Bet Horon, wa umon katulu umon fi sika al bi ruwa le Azikah wa Maggida. ¹¹ Ze umon bi jere min Israel, le safa ta jebel min Bet Horon, Yahwah jada hujar kubarin min sama fi ras tumon sika kulu lahadi Azigga, wa umon mutu. Ketir nas tumon mutu be de min al katulu be sef be rujal ta Israel. ¹² Yala Yashu wunuso le Yahwah fi yom al Yahwah wedi nusra le shaab Israel did Anoriin. De kalam al Yashu kelim le Yahwah gidam Israel, ''Ya shemish, kede ita wegif fi Jabeon, wa gamara, fi wadi Ailon.'' ¹³ Shemis fadulu fi mahal tuo, wa gamara wegif lahadi shaab de integim min adu tumon. Kalam de ma katibu fi kitab ta Yashir? Shemis wegif fi nus ta sama; ma nezil tihit le fetera ta yom kamil. ¹⁴ Mafi yom al hasil ze de gubal kida wele baat kida, yom al Yahwah asuma fugu suot insan. Lanu Yahwah haribu bidal ta Israel. ¹⁵ Yashu ma Israel kulu rija le Jiljal. ¹⁶ Hasa muluk al kamsa de jere dusu badun tumon fi hufura fi Magida. ¹⁷ Weri le Yashu, ''Ligu umon! kamsa muluk al dusu badun fi hufura fi Magida!'' ¹⁸ Yashu kelim, ''Lizu takum hajer kebir fi kasma hufura de wa kutu takum asakir kede harisu umon. ¹⁹ Matakum geni itakum. Turudu takum adu takum wa hajimu takum umon min wara. Matakum sibu umon dakalu fi mudon tumon, lanu Yahwah Ilah takum sekimu umon fi iden takum.'' ²⁰ Wekit Yashu wa shaab Israel kalasu katulu tumon lahadi umon kalasu kulu; bes besitin yao jere le mudon al kubarin. ²¹ Yala jesh kulu rija le Yashu fi Maggida be salam. Mafi zol hawil wunuso kelima did ayi zol min shaab Israel. ²² Yala Yashu kelim, ''Fata takum bab ta hufura wa jibu takum le ana kamsa muluk de.'' ²³ Umon amulu ze huwo wunuso. Umon le huwo kamsa muluk de min hufura, melik ta Habron, melik Yarmut, melik Lachish, wa melik Ajlon. ²⁴ Wekit umon jibu muluk de le Yashu, huwo nadi ayi rajil min Israel. Huwo kelim le nas kubarin ta asakir al ruwa ma huwo fi harib, ''Kutu takum kuren takum fi ragabta tumon.'' Yala umon ja wa kutu kura tumon fi ragabta tumon. ²⁵ Yala huwo kelim le umon, ''Matakum kafu wa kede gulub takum ma karabu. Kede itakum kun mushajiin. De haja al Yahwah bi ruwa amulu le adu takum kulu al itakum bi ruwa shakila ma umon.'' ²⁶ Yala Yashu katulu muluk de. Huwo aligu umon fi kamsa kashab. Aligu umon fi kashab lahadi asia. ²⁷ Zaman shemish waga, Yashu kelim kede nezilu umon min kashab wa kede jadu umon fi hufura al kan umon dusu fugu. umon kutu hujar kubarin fi kasma hufura de. Hujar de fadulu lahadi yom ta aleela. ²⁸ Be triga, Yashu gubudu Maggida fi yom dak wa katulu ayi zol hinak be sef, sawa ma melik tuo. Huwo demiro ayi zol fi medina de. Huwo ma sibu zol hai hinak. Huwo amulu le melik Maggida nefsa haja al huwo amulu le melik ta Ariha. ²⁹ Yashu ruwa ma shaab Israel sawa min Maggida le Lebna. Huwo harib ma Lebna. ³⁰ Yahwah bardo selimu fi iden ta Israel sawa ma melik tumon. Yashu drubu umon be sef wa ayi zol al fi medina de. Huwo ma sibu zol hai hinak. Huwo le melik tuo ze ma huwo amulu le melik ta Ariha. ³¹ Yala Yashu ma kulu israel ma huwo mururu min Libna le Lachish. Huwo nezil hinak wa shakila ma umon. ³² Yahwah wedi Lachish fi iden ta Israel. Yashu gubudu medina de fi yom nimra itnin wa drubu be sef, wa ayi zol al fugu, ze ma huwo amulu le Libna. ³³ Yala Horam, melik Jazir, ja ashan bi saido Lachish. Yashu drubu huwo ma jesh tuo lahadi mafi zol al fadulu hai. ³⁴ Yala Yashu mururu ma Israel min Lachish le Ajlon. Umon nezil hinak wa haribu medina de, ³⁵ wa gubudu medina de fi nefsa yom. Umon drubu medina de be sef wa demiro ayi zol hinak, zev ma Yashuamulu le Lachish. ³⁶ Yala Yashu ma kulu Israel mururu min Ajlon le Habron. Umon haribu medina de. ³⁷ Umon gubudu wa dururbu be sef, sawa ma melik tuo wa gura tuo, wa nas tuo kulu. Umon ma sibu zol hai. Bes ze umon amulu le Ajlon, umon demiro ta kulu kulu wa kulu al fi fugu. ³⁸ Yala Yashu rija ma jesh ta Israel kulu ma huwo, wa mururu be Debir wa haribu medina de. ³⁹ Umon gubudu medina de ma melik tuo wa kulu gura al gerib. Umon durubu umon be sef wa demiro ayi zol hinak ta kulu kulu. Umon ma sibu zol hai. Umon amulu le Debir ma melik tuo ze ma umon amulu le Libna ma melik tuo wa le Habron. ⁴⁰ Yashu drubu kulu bilad safa jebel, wa safa ta Junub, mahalat al tihit, wa murtefaat. Be muluk tumon kulu guwo ma sibu zol hai. Huwo demiro ayi haja hai, bes ze ma Yahwah, Ilah ta Israel, weri le huwo. ⁴¹ Yashu drubu min Gadish Berni le Gaza, wa kulu ard ta Joshan le Jabeon. ⁴² Yashu gubudu muluk de kulu ma ard tumon fi zaman wahid ashan Yahwah, Ilah Israel, shakila le Israel. ⁴³ Yala Yashu ma kulu Israel ma huwo, rija fi mahal tumon fi Jijal.