¹ Yala Yahuwa nadi Ayob min hawa al shedid wa keilmo, ² "De mono de yao jibo duloma fi khutat tai be wonuso kalamat bedon maarafa? ³ Hasa wogif gowi ze rajil ashan ana bi asalo asila, ita lazim bi jwuabo ana. ⁴ Ita kan swen wokid ana kutu asasa ta alam? Wori le ana, kan ita indo maarafa al kamil. ⁵ De mono hadido giasat tou? Wori le ana, kan ita bi arufo. De mono yao mido fogo khat ta migias? ⁶ Fi shuno asasat tou bi wogif? Mono kuto hajer zawia tou ⁷ zaman nujum ta sabah guna sawa wa kulu awlad (malikat) ta Allah kore bi farah? ⁸ De mono sakito bahar be bawabat fi zaman huwo tala bara, ze kaano huwo tala bara min rihim - ⁹ zaman ana amolo gumash le sihab, wa sherit al bi lifo ma duluma al shedid? ¹⁰ Zaman ana kutu hudod le bahar, wa wokit ana sabito hajis wa abwab ta tou, ¹¹ wa zaman ana kelimo le huwo, 'Ita bi ja lahadi hini, lakin ma akter min hini; hini yao ana bi kutu hudod le tekabor ta amwaj taki.' ¹² Hal ita wodi talimat le sabah, aw wori le fagr (sabah bedri) makan tou, ¹³ ashan bi gobudo atraf ta ard wa nofudo ashrar bara min huwo? ¹⁴ Ard bi shekil jisem tou ze tin bi gero nefsa tehit khatim; kulu hajat fogo bi zahir nedif ze gita ta gumash. ¹⁵ Le nas al ashrar nur tumon shelo bara; iden tumon al arufao fok kasuro. ¹⁶ Hal ita ruwa le masder ta moyo ta baha? Hal ita dauro fi tehid makan ta muhiet al amiq? ¹⁷ Hal wori le ita abwab ta muto? Hal ita aino abwab ta dul ta muto? ¹⁸ Hal ita fahim kef ard de wasi (kebir)? Wori le ana, kan ita bi arufo hajat de kulu. ¹⁹ Weno sika al bi wodi le makan raha ta nur- kaman makan ta duluma wen? ²⁰ Ita bi agder gedimo nur wa duluma me makan shokol tumon? Kaman sika al bi rija le biyot tumon? ²¹ Bedon shak ita bi arufo, ashan ita kan fi fi zaman al ana kalago humon; Adad ta ayam al ita ish ketir! ²² Hal ita dakalo fi makhazin ta telij, aw hal ita aino makhazin ta berid, ²³ hajat del al ana hafizo le zaman ta mashakil, fi zaman ta harib wa shakila? ²⁴ De yato sika le nur ta sagga bi inteshir aw le wen riyah ta bi waza min sheriq ala ard? ²⁵ De mono afura kanawat le siyol ta motoro, aw mono amolo sika le sagga, ²⁶ bi kutu motoro nenzil fi makan al mafi zol fogo, wa fi sahra, al ma fogo nas, ²⁷ ashan bi kutu ard shabaan min moya, wa kuto gesh raba fi ard? ²⁸ Hal motoro indo abu, aw, muno weledo nada? ²⁹ Telij ja min batna ta mono? De mon yao weledo berid al bi jemid ai haja (sagie) ta sama? ³⁰ Fi shetaa, moya bi jemid wa bi tala gowi ze hajer; sath ta bahar bi jemid. ³¹ Ita bi agder rubuto Sureia be jenzer, aw fiko rubat ta Jawza? ³² Ita bi agder wori le nujom wa kawakib kede zahir fi zaman al monasib? Ita bi agder kutu nujom fi shikil mojmowat kubarin wa sukerin? ³³ Ita bi arufo nizam al fi sama? Ita bi agder nezimo sulta ta sama le ard? ³⁴ Hal ita bi agder arufa sot taki fok le sihab, wa amiro ashan motoro ketir bi kati? ³⁵ Hal ita bi agder rasulo nur ta sagga le ard wa dugo makan al ita der? Hal humon (nur ta sagga) bi kelimo le ita, 'Ita der kede ennd dugo wen?' ³⁶ De mono kuto hikma le sihab aw wodi maarafa le dabab? ³⁷ De mono bi agder ido nujum be hikma tou? Mono bi agder kubo moya min sama, ³⁸ zaman turab bi tala gowi tin wa kutala ta tin limo badon sawa? ³⁹ Hal ita bi agder gubodo ferisa le ased abo mara (lobwa) aw askut jian ta ashbal tou. ⁴⁰ Fi zaman al humon duso nefsa wa istna fi gesh ashan gobudo ferisa tumon? ⁴¹ De mono yao bi wodi akil le ghurab zaman iyal tou bi kore le Allah wa bi doro taban min jian?