¹ Alikhu istemir wa kelimo, ² "Sibu kede ana zedu kalam shueya, wa ana bi wori le juzu min hajat shan ana indo ziada kalam al bi dafi ann Allah. ³ Ana bi wori maarafa tai al azim; ana bi zekiro ino al Khalig huwo bar. ⁴ Be hagiga, kelimat tai ma fugu kedib; zol al rabaa fi maarafa yao ma ita. ⁵ Aino, Allah huwo kebir, wa huwo ma bi alisu zol; huwo kebir (Kamil) fi marafa ta kulu haja. ⁶ Huwo ma bi hafizo haya ta nas al sherir lakin bi amulo al sah le dealin al fi tab. ⁷ Huwo ma bi shelo ena tou min nas al abrar lakin bi kutu humon fi kursi ze muluk lel abad, wa bi arufa humon fok. ⁸ Kan rubuto humon be ganazir wa waga fi hubal ta waja, ⁹ biga huwo bi zahir le humon haja al humon amulo, wa katia tumon wa takabur tumon. ¹⁰ Huwo kaman bi fata adana tumon le inzarat tou, wa amiru humon ashan bi rija wara min katia. ¹¹ Kan humon asuma le huwo wa abidu huwo, humon bi ish ayam tumon fi najah, seneen tumon fi aman. ¹² Lakin, kan humon ma asuma, bi dofuno humon be sef; humon bi mutu ashan humon ma indo maarfa. ¹³ Deal al aba rabuna be geliba bi hafizo zalan le nefsa tumon; humon ma bi kore le musada kan Allah akibu humon. ¹⁴ Humon bi mutu fi shaba tumon; nihaya ta haya tumon fi ibadat ta zena. ¹⁵ Allah bi ankizo nas al fi taab min taab tumon; huwo bi fata adana tumon fi zaman ta waja. ¹⁶ Hagiga, huwo der tala min waja le makan kebir ma fogo waja wa al fogo terbeza taki malian be akil al tamam. ¹⁷ Lakin ita malian be hukom ta shrar; hukom wa adala amsugu ita . ¹⁸ Mata sibo zalan taki wodi ita ashal aliso, aw rashwa al kebir shelo ita min hagiga. ¹⁹ Hal ita istefi min sarwa taki, ashan ita ma bi kon hazin, aw kulu guwa taki al azim saido ita? ²⁰ Mata istena bilel kede ja, ashan ita bi amolo katia, fi zaman al talao nas min beyot tumon. ²¹ Amolo hisab taki kede ita ma rija fi katia ashan jeribo ita be waja ashan ita bi sibo katia. ²² Aino, Allah bi mejido fi guwa tou; mono mualim ze huwo? ²³ De mono gebl keda wori le huwo sika? De mono gebl keda kelimo le huwo, 'Ita amolo galat?' ²⁴ Zekiro kede ita azimo amail tou, al nas guna fogo. ²⁵ Nas kulu aino , lakin humon aino min bead. ²⁶ Aino, Allah kebir, lakin enna ma fahim huwo tamam; senin tou am bi agder iddo. ²⁷ Fa huwo bi limo bukhar ta moyo le suhob wa nezil motoro, ²⁸ suhob de bi nezil motoro ketir le kulu insan. ²⁹ Be jed, fi zol bi agder fahim kef suhob bi waza nefsa fi sihab wa sagga bi dugo? ³⁰ Aino, huwo wazao nur hawil huwo wa kati juzo ta bahar. ³¹ Be tariga de huwo bi motoro le kulu wahid wa wodi akil kifaya. ³² Huwo bi mala iden tou be nur ta sagga amiro ashan bi dugo makan al sah. ³³ Sagga tou bi wori ino fi hawa jai, bagarat kaman bo agder asoma ja ta tou.