¹ De kelima ta Yahwah al ja le Jeremiah al nebi binisba le dual. ² Le masir: de an asakir ta Pharaoh Neeho, melik ta masir al kan fi carchemish fi taraf bahr ta Euphrates. De kan asakir al Nebuchadnezzar melik ta babylon agilibu fi sena nimura arba ta Jehoiakim weled ta Josiah, melik ta Yahuza. ³ Jahizu daraga al sokeirin wa al kubar kulu jahiz, wa ruwa gidam fi sakila. ⁴ Kutu zafira fogo khayl; arkab fogo khayl wa shilu mahal wuguf taki be tegiya fi ras, nedifu alarba, wa libisu kaki. ⁵ Fi sunu al ana gi ainu ini? Humon malian be rueb wa gi jere bara, leanu asakir toumon agilibu. Humon gi jere le imaya wa ma gi ainu wara. Rueb fi kulu mahal- De elan ta Yahwah. ⁶ Humon ma biakder jere be sura, wa asakir ma biakder tefes. Humon sedimu kura fi shamal wa waga fi taraf ta bahr ta Euphrates. ⁷ De munu yau gi gum zei nil de, al moyo gi jada fog wa tehet zei bahar? ⁸ Masir gi gum zei nil, zei nahar ta moyo al bi gum wa bi waga. Masir kelim, ana bi ruwa fog wa bi kati ardi, an bi demiru medina wa nas al gi geni fogo. ⁹ Ruwa fog ya khayl. Geni zalan ya markabat. Keli asakir ruwa bara, kush wa put, rujal al endu kebra fi daraga, wa ludim, rujal al endu kebra fi meilu nisab. ¹⁰ Yom de bikum yom ta dafa-dafa le Rabuna Yahwah ta junut wa huwo bi dafa be nebsu be ida tou. Shef de bi abula wa bi tala saban. Huwo bi ashirub dom toumon kifaya. Fa bikum fi zebiha le Yahwah Rabuna ta junut fi shamal ardi ta nahr Euphrates. ¹¹ Ruwa fi Gilead wa shilu dawa, Biniya ta masir al azra. Faida ta kutu dawa ketir fi jisim taki mafi. Inti maendu ilaj. ¹² Dual ketir asuma le fadiya taki ardi malian be kore taki, askeri gi sedimu gisim ma askeri tani; humon kulu gi waga sawa. ¹³ De yau kelima al Yahwah wonusu le nebi Jeremiah woki Nebuchadnezzar melik ta Babylon ja wa hajimu ardi ta masir. ¹⁴ Alinu fi masir, wa alinu fi migdol, memphis, wa Tahpanhes. Shilu mahata taki wa jahizu nebsak, leanu shef bi abula del al fi hauwli inta. ¹⁵ Le intum al aqwia de biga gi kutu wosh takum falata? Humon ma bi wogif leanu ana Yahwah lizu humon tehet. ¹⁶ Huwo zidu adad ta del al gi sedimu wa gi waga. Aiya askeri gi waga fi gisim ta tani al gerib ma huwo. Humon gi kelim nina rija wara le nas tanina, le ardi ta nina, keli nina sibu shef al gi dugu nina tehet de. ¹⁷ Humon alinu hinak, Pharaoh melik ta masir bes huwo iza aj sakit al sebu fursha tou futu bara. ¹⁸ Melik al isim bitou Yahwah ta junut alinu gali, zei ma ana lisa hai, zol bi ja zei jebel tabor wa jebel carmel al fi taraf bahr. ¹⁹ Limu shenta takum ashan intum bi arfa fi sebi, intum nas al aishin hinak. ²⁰ Masir de jena ta bagara al giafa, lakin fii ashara al gi adi gi ja min shamal huwo jai. ²¹ Asakir al ajiru fi wasat ta hia bi geni zei thawr-al-musman lakin humon bardo bi agilabu wa bi jere bara. Humon ma bi wogif sawa, le ano yom doumon ta dimar jai did humon, zaman ta eqab toumon. ²² Masir gi kore zei debiba wa gi zahf bara, leanu ada tou gi ja did hia. Humon maishin fi tijah tou zei nas al gi ruwa gata akshab be fas. ²³ Humon bi gata gaba de tehet, de elan ta Yahwah hata lo huwo tegil shedid. Leano ada de bi geni ketir foutu jarat al ma biakderu idu. ²⁴ Binia ta masir bi amulu le hia fadiya bi wodi hia fi ida ta nas al fi shamal. ²⁵ Yahwah ta junut, Allah ta Israel kelim, sufu, ana gerib bi wodi equab le Amon ta Thebes, Pharaoh, masir wa rabunat ta hia, muluk ta hia al Pharaohiin wa del al gi kutu siqa fogo humon. ²⁶ Ana gi wodi humon fi ardi ta nas al gi fetishu ashan bi katulu humon, wa fi ida ta Nebuchadnezzar melik ta Babylon wa kudam tou. Wa bad de baga nas bi bada geni fi masir zei ta zaman de. De yahwah yau gi alinu. ²⁷ Lakin inta, ya kadim tai Jacob, mata kafu mata geni fu zie ya Israel sufu, ana gerib bi jebu inta min mahal beit, wa bardo iyaal taki min ardi al asar. Jacob bi rija, biligo salam, wa bi geni muamin, wa mafi zol tani bi qoufu huwo. ²⁸ Inta, ya kadim tai Jacob, mata kafu, de Yahwah yau gi alinu-leanu ana ma inta, ashan kida ana bi jebu dimar kamil did kuhi dual al kan shetetu inta. Lakin ana ma bi demiru inta ta nihaya. Lisa ana bi adibu inta be adala wa bi sebu inta ligo ma wodi le inta eqab.”