¹ Yahwah kelim le ana, ''Shilu luhu wa katibu fugu, 'Maher-Shalal-Hash-Baz.' ² Ana bi ashhad le ana shuhud umana, Urish al kahin, wa Zechariah weled ta Yabriiah.'' ³ Ana ruwa le nebiya, wa hiya hamil wa weledu weled. Yala Yahwah kelim le ana, ''Nadi isim tuo Maher-Shalal-Hash-Baz. ⁴ Lanu gubal jena de bi arufu kure, 'Abu tai,' wa Uma tai,' shukul ganian ta Damashek wa ganima ta Samira bi shilu be melik ta Ashur.'' ⁵ Yahwah wanusu le ana tani, ⁶ ''Ashan nas de aba moyo al kues ta Shiloah wa, wa farrhan be Resin wa Ramaliah, ⁷ ashan kida Rabuna der jibu fugu umon moyo ta bahar, azim wa ketir, melik ta Ashur wa mejid tuo. Uwu bi ja fugu kulu wa bi wusulu mustawa al fuk. ⁸ Bahar de bi ruwa gidam lahadi Yahuza, seal wa mururu ta moyo, lahadi bi wusulu le ragabta taki. De jinah ta hawa bi mala nefes ta ta beled takum, Immanuel.'' ⁹ Gum takum ya shaab wa kasuru takum hita hita. Asuma takum, intakum kulu mahalat al bait : jahizu badun takum le harib wa kasuru takum hita hita. ¹⁰ Katitu takum, lakin ma bi hasil; wedi takum awamir, lakin ma bi amulu, lanu Allah fi ma nina. ¹¹ Yahwah wunuso le ana, be iden tuo guwi fugu ana, wa anziru ana kede ana ma duru fi sika ta nas de. ¹² Mata nadi fitna ayi haja al bi nadi fitna, matakum kafu haja al umon bi kafu, wa kede ma kuofu intakum. ¹³ De Yahwah Rab al junud al intakum bi akrimu ze mukadas; huwo yao kede intakum kafu, wa huwo barau yao kede intakum wedi haiba. ¹⁴ Huwo bi kun makdas; wa hajer al nas bi sedimu fugu,- le bet ta Israel, wa kaman bi kun sharak le shaab ta Urshelim. ¹⁵ Ketirin bi dugu kura wa bi waga wa bi kasuru, wa bi gubudu umon be jabada. ¹⁶ Lifu shihada tai, wa katimu ganoon, wa wedi le talamis tai. ¹⁷ Ana bi istena le Yahwah al bi dusu usa tuo min bet ta Yagub; Ana bi kutu sikha tai fugu huwo. ¹⁸ Ayinu ana ma awlad al Yahwah wedi le ana le ajieb wa mijizat fi Israel min Yahwah Rab al junud, al bi geni fi jebel Sahiun. ¹⁹ Umon bi kelim le intakum, ''Shawiru takum delin al bi wunuso ma maitin wa arwah,'' delin al indu shafaka wa muthamisin. Lakin hal shaab kede ma shawiru Allah? Hal kede umon shawiru maitin bidal nas al haiein? ²⁰ Le ganoon wa shuhuda! kan umon ma wunuso ze de, ashan umon ma indu nur ta sabah. ²¹ Umon bi mururu be wasat ta beled fugu karaba wa jian azim. Kan umon jianin, umon bin tala zalanin wa bi laano melik tumon wa Allah tumon, ze umon gairu usa tumon le fuk. ²² Umon bi tuwgu fi wata wa bi ayinu karaba, duluma, wa taab ta waja. Bi shilu umon le ard ta duluma.