¹ Hajat al Ashaya jena ta Amos ayinu fi ruya, be kusus Yahuza wa Urshelim. ² Bi hasil ayamat al akir inu jebel ta bet ta Yahwah be asisu ze jebel al ali min jibal kulu, wa bi arfau uwu fuk murtafaat kulu, wa umam kulu bi jere le uwu. ³ Nas ketir bi ja wa kelim, ''Taal takum, kede anina ruwa fuk fi jebel ta Yahwah, le bet ta Allah ta Yagub, ashan huwo bi derisu le anina baad min sikat tuo, wa anina bi duru fi sika tuo.'' Lanu ganoon bi tala min Sahiun, wa kelima ta Yahwah min Urshelim. ⁴ Huwo bi hakimu bainu umam wa bi shilu garar le shaab ketir; umon bi dugu siuf tumon ashan bi tala alat ta zira; wa laharbat tumon bi kun manajil; ma duola bi arufa sef did duola tani, wele umon be deribu nas le harib tani mara. ⁵ Bet ta Yagub, taal takum, kede anina durur fi nur ta Yahwah. ⁶ Lanu inta aba shaab taki, bet ta Yagub, lanu umon malian be adat min sherik wa umon bi marisu kujur ze Falastiniin, wa umon bni selimu ida ma iyal ta ajanib. ⁷ Idenat tumon malian be fidda wa dahab, mafi hudud le shukul ganiyan tumon; beled tumon kaman malian be hasin, mafi hudud le arabat tumon ta harib. ⁸ Beled tumon malian be asnam; umon bi abudu haja al umon yao amulu be iden tumon, hajat al asabi tumon yao amulu. ⁹ Nas bi dengir tihit, wa afrad tanin bi waga tihit; ashan mata arafa umon fuk. ¹⁰ Ruwa takum le makan al hajer wa dusu takum fi wata min shukul kebir ta Yahwah wa min mejid ta azama tuo. ¹¹ Arafa nefsa ta insan bi nezilu tihit, wa kibiria ta insan bi jibu tihit, wa Yahwah baru yao bi arfau fi yom dak. ¹² Lanu yom ta Yahwah ta junud bi ja did ayi zol al mutkebir wa bi arfa nefsa fuk, wa didi ayi zol al bi dala bi nezilu tihit - ¹³ wa did kulu ashjar ta Lobnan al klubarin wa tuwalin, wa kaman kulun ashjar balut ta Bashan. ¹⁴ Yom ta Yahwah de bi kun did kulu jibal al ali, wa did kulu murtafaat al arfau fuk, ¹⁵ wa did ayi amara al tuwil, wa kulu hush al abinu guwi, ¹⁶ wa did kulu sufun ta Tarshish, wa did kulu alamat ta bahar al giyafa. ¹⁷ Kibiria ta insan bi nezil tihit, wa arfa nefsa ta nas bi waga tihit tihit; Yahwah barau yao bin arfau fi yom dak de. ¹⁸ Asnam kulu kulu bi demiro ta kulu kulu. ¹⁹ Insan bi dakulu fi hufurat ta hujar wan hufurat ta wata, min shukul kebir ta Yahwah, wa min mejid ta azama tuo, kan huwo gum ashan bi kuofu dunia. ²⁰ Fi yom dak de nas bi jada bara asnam tumon ta fidda wa dahab al amulu le badun tumon ashan bi abudu- umon bi jada jada umon le jurzan wa watwat. ²¹ Nas bi ruwa fi shuguk ta hujar wa hufurat ta hujar. min shukul kebir ta Yahwah wa min mejid ta azama tuo, kan huwo gum ashan bi kuofu dunia. ²² Sibu takum kutu sikah fi insan, la nefes ta haya tuo fi anafa tuo, shunu yao huwo bi kun le inta?