¹ Allah kelimu le Yakub, ''gum, fok le Bethel, wa geni hinak. Abinu mazbaha hinak le Alah, al zahir le inta zaman inta jere min aku taki Esau. ² ''Biga Yakub kelimu le nas bet tou wa kulu nas al kan ma huwo, ''Sibu rabunat al garib al nus takum, nedifu nefsa takum, wa geru takum gumashat. ³ Yalla kede anina ruwa le Bethel. Ana bi abinu mazbaha hinak le Allah, al juwabu ana fi yom ta huzun , wa al kan ma ana fi aye mahal al ana ruwa fogo.'' ⁴ Fa huwomon wodi le Yakub kulu rabunat al garib al fi ard toumon, wa halag al kan fi adna toumon. Yakub dofunu huwomon tihit shejera ta balut al gerib ma Shechem. ⁵ Ze ma huwomon safir, Allah kutu kafu waga fi hawili medinat al jambo huwmon, fa keda nas del ma fetisu iyal ta Yakub. ⁶ Fa Yakub wosulu le Luz(de huwo Bet El), al fi ard ta Canaan, huwo wa kulu nas al kan ma huwo. ⁷ Huwo abinu mazbaha hinak wa nadi isimu mahal ta Bet El, leanu hinak Allah beinu nefsa tou le huwo, zaman huwo kan bi jere min aku tou. ⁸ Deborah, al bi ayenu warat ta Rebekah mutu. heya kan dofunu tihit bet El tihit shejera balut, fa kan nadi isim tou Allon Bakuth ⁹ Zaman Yakub ja min Paddan Aram, Allah zahir le huwo tani mara wa bariko huwo. ¹⁰ Allah kelimu le huwo, ''Isim taki Yakub, lakin isim taki tani bi nadi Yakub. Isim taki bi nadi Israel.''Fa Allah nadi isim tou Israel. ¹¹ Allah kelimu le huwo, ''Ana Allah al gadir. weledo takum ketir. nas ketir bi tala min inta, wa moluuk bi kun min nus ta iyal ta iyal taki. ¹² Al ard al ana wodi le Abraham wa Ishak, Ana bi wodi le inta. Le iyal ta iyal taki bad inta Ana kaman bi wodi al ard. '' ¹³ Allah ruwa bara min huwo fi mahal al huwo wonusu ma huwo. ¹⁴ Yakub sala amud fi mahal al Allah wonusu le huwo, amud ta hajer. Huwo kutu fogo zabeha wa kubo fogo zeit. ¹⁵ Yakub nadi isim ta mahal al Allah wonusu ma huwo fogo de Bet El. ¹⁶ Huwomon asfir min Bet El. Zaman huwomon lisa masafa min Ephrath, Rahael ruwa le welada. Heya kan ligo welada saab ¹⁷ Zaman welada bi ga saab le heya, daya kelimu le heya, ''Ma ta kafu, leanu hasa inta bi kun indo jena tani. ¹⁸ ''Ze ma nefes ta heya bi tala heya nadi isim ta jena Ben-Oni, lakin abu tou nadi isim tou Benjamin. ¹⁹ Rahael mutu wa kan dofunu fi ta Ephrath (al huwo, Bethlehem). ²⁰ Yakub sala amud fogo turuba ta heya. de huwo alama ta turuba ta Rahael lahadi yom ta alela. ²¹ Israel rahalu wa sala kaima tou wara ta buruj ta maragaba ta haiwanat. ²² Zaman Israel kan bi geni fi ard dak, Reuben num ma Bilhah shirika ta abu tou, wa Israel asuma an kalam de. Hasa Yakub indo etnashar awulad. ²³ Iya tou ta Leah Reuben, bikir ta Yakub, wa Simeon, Lawi, Yahuza, Yaskar, wa Zabalun. ²⁴ Iyal Rahael kan Yousif wa Benjamin. ²⁵ Iyal ta Bilhah, kadama ta Rahael, kan Dan wa Naftali. ²⁶ Iyal ta Zilpah, kadama ta Leah, kan Gad wa Asher. Del kulu kan iyal ta Yakub al kan weledo le huwo fi Paddan Aram. ²⁷ Yakub ja le Ishak, abu tou, fi Mamre fi Kiriath Arba (bes ze Hebron), al Abraham wa Ishak kan geni fogo. ²⁸ Ishak geni mia wa tamaniin sena. ²⁹ Ishak selimu roho tou wa huwo mutu, wa limu huwo ma judud tou al kubar. Esau wa Yakub, yau dofunu huwo.