¹ Haasil fi ayam ta Melik Amraplel, melik ta Shanaar, Ariock, melik ta Ellasar, Kedorlaomer, melik ta Elam, wa Tidal, melik ta Jouwem, ² umon amulu harib did Bare, melik ta Sodom, Birsha, melik ta Gomorrah, ,shinab, melik ta Admah, Shemebar, melik ta sabuoim, wa melik ta Bali (al bardu bi nadi Sukhar ³ Kamsa muluk al awel de limu sawa fi nus tab wadi Seddim (al bardu bi nadi Bahar ta mileh). .( ⁴ Itnashasr sena umon ishtakal abid le Kedorlaomer, lakin fi sena nimra talatashar umon itmarad. ⁵ Yala fi sena nimra arbatashar, kedorlaomer wa muluk al kan fi ma uwu ja wa hujum Rephaim fi Ashteros Garnaim, wa nas Zuzeen fi Ham, wa Emmeen fi Shawa Gartaim, ⁶ wa Hurreen fi jebel tuomon Seir, le safa ta Faran, al gerib ma sahara. ⁷ Umon rija wa ja le En Mishfat (al bardu isim tuo Kadish), wa gilibu kulu beled ta Amalik, wa Amoreen al bi geni fi hussun ta Tamar. ⁸ Yala melik ta Sodom, ma melik ta Gomorrah, ma melik ta Admah, ma melik ta Sabuoim, wa melik ta Bali (al isim tuo Sukar) ruwa wa jahisu le harrib fi jebel Seddim ⁹ did kedorlaomar, melik ta Elam, Tidal melik ta Juwim, Amraphel, melik Shanaar, Ariock, melik ta Ellasar; arba muluk did kamsa. ¹⁰ Jebel Seddim kann maliam abiyar ta ziffit, ze ma muluk ta Sodom wa Gomorrah gi jere, umon waga hinak. delin al fadul umon jere le jibal. ¹¹ Yala muluk delin shilu kulu hajad wa mumtalakat ta Sodom wa Gomorrah, wa ruwa fi sika tumon. ¹² Umon kaman shilu Lot, jena ta aku ta Abram, al bi geni fi Sodom, sawa ma mumtalakat tuo. ¹³ Wahid zol al tefes ja wa weri le Abram al Ebbrani. Uwu kan gi keni fi Balutat Mamra, al Amorri, al aku ta Eshkol wa Aner, al umon kulu kan fi tiffagiya ma Abram. ¹⁴ Zaman Abram asuma inu nas addu gubudu ahal tuo, uwu tal ma 318 nas tuo al mudarabin wa la weledu fi bet tuo, wa turuju wara jama de lahadi fi safa ta Dan. ¹⁵ Uwu gesimu nas tuo did jama delin be bilel wa hajimu umon, wa turuju umon lahadi safa ta Hoba safa sherik ta dimashk. ¹⁶ Uwu rija kulu mumtalakat, wa ahal tuo Lot wa hajat tuo, wa kaman nusuwan tuo wa bagi nas. ¹⁷ Baat ma Abram gilibu kedorlaomer wa muluk al kan ma uwu, melik ta Sodom tala bara ashan bi limu ma fi jebel Shawa (al bardu bi nadi jebel ta melik). ¹⁸ Melkisadik, melik ta Shalim, jibu rekif ma kumor. Uwu kan Kahin ta Allah al Fuk. ¹⁹ Uwu bariku uwu wa kelim, ''Mubarak Abram min Allah al fuk, al kalagu sama wa ard. ²⁰ Mubarak Allah al fuk, al selimu addu taki fi idden taki.'' Yala Abram wei le uwu Ashara min kulu haja. ²¹ Melik ta Sodom kelim le Abram, ''Wedi le ana nas wa, wa shilu mumtalakat le nefsa taki.'' ²² Abram kelim le melik ta Sodom, ''Ana arfa idden tai le Yahweh fuk, Allah al fuk, al kalagu sama wa ard, ²³ inu ana ma bi shilu wele kait, wele habil ta sifinja, wele ayi haja taki, ashan itta bi ja kelim gali, 'Ana kutu Abram tala ganian.' ²⁴ Ana ma bi shilu ayi haja ile bes al shabab tai akulu wa nisba ta rujal al ruwa ma ana. Kede Aner, Eshkol, wa ''.Mamra shilu nisba tumon