¹ Hasa Yahweh wunusu le Abram, ''Ruwa min beled taki, wa min ashira taki, wa min beat ta abu taki, le beled al Ana bi weri le itta. ² Ana bisibu itta tala umma azum wa Ana bi bariku itta wa bi arufa isim taki, wa itta bikun baraka. ³ Ana bi bariku delin al bi bariku itta, lakin delin al bi lanu itta Ana bi lanu umuon. Bewasat taki usar ta dunia kulu bi bariku.'' ⁴ Yala Abram rowa, ze ma Yahweh kelim le uwu kede amulu, wa Lot ruwa ma uwu. Abram kan Kamsa wa sebein sena zaman uwu sibu Haran. ⁵ Abram shilu Sarai, mara tuo, Lot, jena ta aku tuo, ma kulu mumtalakat tumon al umon indu, wa nas al umon imteliku fi Haran. Umon tala bi ruwa le beled ta Kanaan, wa umon ja le beled tav Kanaan. ⁶ Abram mururu be beled ta Shekim le Mora. Fi zaman dak Kanaanin kan bi ish fi beled de. ⁷ Yahweh zahir le Abram, wa kelim, ''Ana bi wedi beled de le iyal taki.'' Yala Abram abinu mazbah le Yahweh, al zahir le uwu. ⁸ Min hinak uwu ruwa le beled murtefe safa sherik ta bait Il, mahal al uwu dugu kaima tuo hinak, ligu bait Il safa garib wa Ai safa sherik. hinak uwu abinu mazbah le Yahweh wa nadi be isim ta Yahweh. ⁹ Yala Abtram istemir rihila, tuo le safa ta junub. ¹⁰ Kan fi jian fi ard, yala Abram ruwa le Masir ashan bi geni hinak, lanu jean kan saab fi al ard. ¹¹ Zaman uwu biga gerib bi wusulu le Masir, uwu kelim le sarai mara tuo, ''Ana aruf itta mara giyafa. ¹² Kan Masrien ayinu itta umon bi kelim de, 'De mara tuo,' wa umon bi katulu ana, lakin umon bin sibu itta hai. ¹³ Kede kelim Itta ukut tai, ashan bikun kues le ana be kalam taki, ashan haya tai bi hafiso be kalam taki.'' ¹⁴ Hasil zaman Abram dakulu Masir, Masrien ayinu Sarai kan giyafa kalis. ¹⁵ Ruasa ta Farauon ayinu uwu, wa bada wunusu le farauon kalamat kues an Sarai, yala shilu uwu fi bet ta Farauon. ¹⁶ Farauon amulu kues le Abram be kalam ta Sarai, Abram ligu ganamayat wa bagarat, wa hamir, wa kadamin al rujal, wa nusuwan, wa hamir abu nusuwan, ma jimal. ¹⁷ Yala Yahweh dugu Farauon ma bet tuo kulu be ayanat al kaab ashan kalam ta Sarai, mara ta Abram. ¹⁸ Farauon nadi Abram wa, wa kelim, ''De shunu al itta amulu le ana de? Malu itta ma kelim le ana uwu mara taki? ¹⁹ Malu itta wunusu, Uwu ukut tai; laman ana shilu uwu mara le ana? Hasa yau mara taki. Shilu uwu, wa ruwa fi sika taki.'' ²⁰ Yala Farauon wedi awamir le nas tuo be .kusus ta Abram, wa umon tala uwu bara, ma mara tuo wa kulu hajat al uwu indu