¹ Fi sena al awel le hukom ta Darios jena ta Ahshoweros min usra ta Madii, al hazimo mamlaka ta Babil. ² Fi awel sena le hukom ta Darios ana, Daniel, kan bi deriso kutum al fogo kalam ta Yahuwa, kelimat al wori le nebi Armiah. Ana lahizo ino bi kon sebein sena yala karab al fi Orshalim de bi kalaso. ³ Ana aglibo wosa tai le sead Rabuna Allah, ashan bi fetisho huwo be salawat wa tilbat, be seiam, ma libiso mash (gomash min jelid ta Jemel), wa geni fi rumad. ⁴ Ana seli le Yahuwa Allah tai, wa ana iterif be khataya ta nina. Ana kelimo, "Malis, Rabuna - ita yao Allah al azim wa ajeb - al bi hafizo ahad wa amin fi mohaba ta delin al bi hibo ita wa le del al bi amolo haja al ita amiro humon kede amolo. ⁵ Enna amolo katia. Enna amolo batal wa itmaradna, tala bara min gawanin wa talimat taki. ⁶ Enna ma asoma le khudam taki anbia al bi wonuso be isim taki le molok tanna, kadda tanna, abuhat tanna, wa kulu nas al fi Israel. ⁷ Le inta, Rabuna, birr de taki. Alela, fadiya le enna- le shab ta Yahuza wa le delin al bi geni fi Orshalim, wa le Israel kulu. Kaman le del al gerib wa al beid fi kulu makan al ita sheteto humon. De kulu ashan khiana al kebir al enna amolo le ita. ⁸ Ya Yahuwa, fadia le enna, le molok tanna, le kadda tanna, wa le abuhat tanna - ashan amolo katia did ita. ⁹ Le Rabuna Illah tanina rahma wa gufran, ashan enna merid did huwo. ¹⁰ Enna ma asoma le sot ta Yahuwa Illah tanin be daoro fi gawanin al huwo wodi le enna be wasat anbia khudam tou. ¹¹ Israel kulu aliso ganon taki wa mealo jamba, aba ashan bi asoma le sot taki. Kubo le enna lanaa wa halifa al katibo fi ganon ta Mosa, khadam ta Allah, ashan enna amolo katia did ita. ¹² Yahuwa nefizo kalamat tou al huwo wonuso bi hasil le enna wa le hukam tanna, ino damar kebir bi ja le enna. Ashan mafi haja batal goduro zede hasil tehet samawat ze ma hasil le fi Orshelim. ¹³ Ze ma katibo fi ganon ta Musa, kulu kharab de hasil le enna, lisa enna ma asalo rahma min Yahuwa Illah tenna be rija nwara min amolo batal wa kuto bala fi hag taki. ¹⁴ Ashan keda Yahuwa jahizo le enna kharab de wa jibo le enna, leano Yahuwa Illah tenna baar fi kulu amail al huwo amolo, lesa enna ma bi asom le sot tou. ¹⁵ Hasa, Rabuna Illah tanna, ita talao enna min ard ta Masir be iten taki al guwi, wa ita kutu isim taki biga amrouf, ze fi ayamat de. Lakin lisa fi de enna amolo katia; enna amolo hajat batal. ¹⁶ Rabuna, ashan kulu amail taki al nedif, kede ita shelo zalan taki al shedid min medina ta Orshalim, jebel taki al mukadas. Ashan katia tenna, wa ashan shar ta abohat tenna, Orshalim wa shab tou biga misal ta khrab le kulu deal al bi geni jambo enna. ¹⁷ Hasa, Illah tenna, asoma le salawat asado rahma ta khadam taki; ashan ita Rabuna, kede wosa taki wala fi haikal taki al demiro. ¹⁸ Illah tai, fata adana taki wa asoma; fata ena taki wa aino. Demiro enna; aino le medina al nadi be isim taki. Enna ma bi asalo mosada taki ashan shokol nedif tenna, lakin ashan rahma taki al kebir. Rabuna, asom lenna! ¹⁹ Rabuna afi enna! Rabuna, kutu bala wa amolo haja! ashan ita, mata akir, Illah tai, ashan medina taki wa shab taki gi nadi humon be isim taki." ²¹ Fi zaman ana bi seli wa iterif be katiya tai wa katiya ta shab Israel, wa gedimo tilbat tai gidam Yahuwa Illah tai fi kalam ta jebel tal Allah al mukadas- ²⁰ Fi zaman ta salawat, malaika Jebrael, al ana aino fi rauya al fi bidaya de, tire be sura le ana, fi zaman ta zebiha al bi gedimo be misa. ²² Huwo fahimo ana gali,"Daniel, ana ja hasa ashan bi wodi le ita hikma wa fihim. ²³ Zama ita bada seli wa asalo rahma, talao amr wa ana ja ashan bi wori le ita ijaba de, ashan hibo ita shedid. Ashan keda rekiz fi kalam de wa fahimo rauya de. ²⁴ Gatao gedia ino sebeien isbo bi timo le shab taki wa medina taki almokadas ashan bi nedifo katia wa najasa, wa bi jibo bir al ma indo nihaya, bi kalam ta ruwya wa nubuwa, wa bi nedifo makan al mokadas. ²⁵ Arufu wa fahimo be ino min zaman al talao karar de le abino wa sala ta Orshelim lahadi ma al zol al momsoh (Messih), bi kon saba isbo wa itnen wa sitin isbo. Bi rijao abino Orshelim be be khalij tou, bi kon fi waja shedid. ²⁶ Bad itnen wa siten isboo, bi demiro al momsoh wa bi shelo kulu haja min huwo. Jesh ta hakim al gi ja bi deminro medina de wa mahal al mokadas. Nihaya tou bi ja ze fedan, wa bi kon fi harib mostamir lahadi nihaya. Allah yao kariro ino jesh ta addo de bi demiro ai haja. ²⁷ Huwo bi amolo itifagia ma nas ketir le fatra ta wahid isboo. Fi nos ta isboo huwo bi wogifo zabiha wa tegdima le Allah. Bad ma huwo amolo hajat batal, zol tani bi ja koto sanam fi mahal al mukadas. Bi geni zede lahadi ma Allah bi demiro zol al kuto hajat de kulu."