¹ Wululu le delin al bi akudu raha fi Sahiun, wa le delin al be geni bidun kuf fi jebel ta Samira, nas al kubar ta umam, delin al bet ta Israel bija le umon le musada! ² Ruwasa takum kelim, ''Ruwa takum le Kalneh wa fetishu takum; min hinak ruwa takum le Hamah, medina al azim; yala nezil takum tihit le Jet ta Falastiniin. Hal umon afdal min itnin mamalik takum? Hal fi hudud al akbar min hudud takum?'' ³ Wululu le delin al bi baidu yom ta karisa wa bi jibu kuris ta zulum gerib. ⁴ Umon bi nom fi serir ta Aaj wa bi midu badun fi ras ferish tumon. Umon bi akulu kuruf min bahaim wa ujul min zeriba. ⁵ Umon bi guna guna al belid le musika ta rababa; umon kalagu le umon alat ze Dauod amulu. ⁶ Umon bi shurubu merisa wa bi masa masa badun tumon ma afdal zeat, lakin umon ma bi tala haznanin la karabu ta Yusuf. ⁷ Hasa umon bi ruwa fi sebi ma awel mujumuwa ta sebi, wa ataku ta delin al bi midu nefsa de bi wuduru. ⁸ ''Ana, Rabuna Yahwah, haalifu be nefsa tai de yao elaan ta Rabuna Yahwah, Allah ta junud, Ana akrah azama ta Yagub; Ana akrah Gusur tuo. Ashan kida Ana bi selimu medina de be kulu hajat ala fi fugu.'' ⁹ Bi kun kan fadulu ashara rujal fi bet wahid, umon bi mutu. ¹⁰ Kan ahal ta zol ja ashan bi shilu jisim ta zol de ashan bi shilu udam bara min bet kan huwo kelim le zol de al fi bet, ''Hal fi zol ma inta?'' Malu kan zol de kelim, ''La''? Yala huwo bi kelim, ''Askut sakit, lanu anina mai zekiru isim ta Yahwah.'' ¹¹ Ayinu, Yahwah bi wedi awamir, wa bet al kebir de bi kasuru gita gita, wa bet al suker de le hita hita. ¹² Hal hasin bi jere fi ras hajer? Hal fi zol bi kuruju be teran ta bagara? Lakin intakum hawilu shukul hagiga le sim wa samar ta bir le mur- ¹³ intakum al farhanin be Lo Dabar, al bi wunuso, ''Hal anina ma shilu Karnaim be guwa ta nina?'' ¹⁴ ''Lakin ayinu, Ana bi gum did intakum umam, bet ta Israel de elaan ta Rabuna Yahwah, Allah ta junud. Umon bi durubu intakum min bab ta Hamah le wadi Arabah.''