¹ Zaman jibu nina kuwes, nina ja aruf gali al jezira ismu Malta. ² Al nas ta mahal de gedimu le nina sokol kuwes a l ma adi, lakin umon wala nar wa rahibu nina kulu ashan matar wa berid al mustemir. ³ Lakin zaman Bulis kan limu kasab wa kutu fi al nar, debiba tala bara ashan sakana wa lifu fi ida tou. ⁴ Zaman nas ta mahal de aiynu al debiba al lifu fi iden tou, umon kelim le badun tomon, "Rajil de uwo katil hagiga al nafat min al bahar, Adala ma bi sibu uwo hai." ⁵ Lakin biga uwo nofutu al debiba de fi jua al na wa ma asir. ⁶ Umon kan gi istena le uwo gali sim ta debiba bi amulu huma au sutfa bi waga mait. Lakin bat umon ragibu uwo le fetera towil wa aiynu gali mafi haja gair adi le uwo, umon gairu afkar wa kelim gali uwo kan allah. ⁷ Inak gerib ma makan dak fi wata al tabi le rajil al sultan ta al jezira, al rajil ismu Bablius. Uwo rahibu nina wa sedid talabat le nina le talata yom. ⁸ Kan hasil gal abu ta Bublius kan ayan ma huma wa dusuntaria. Zaman Bulis rua le uwo, uwo seli, kutu iden le uwo, wa aliju uwo. ⁹ Bat de hasil, bagi nas tanin fi al jezira al kan ayanin kaman ja wa kan aliju. ¹⁰ Al sab kaman karamu nina ma karamat ketir. Zaman nina kan jahisu le safar, umon wodi le nina sunu la nina deru. ¹¹ Bat talata sahar nina istemir safir fi sefina al kan gedi al karanga fi al jezira, sefina ta Iskandaria, ma "al aliha al timan" ze remzi ras tou. ¹² Bat nina wosulu le al medina ta Syracuse, nina geni inak talata ayom. ¹³ Min inak nina safir wa wosulu le al medina ta Rhegium. Bat yom wahid hawa min junub gum fok, wa fi itniin yom nina ja le al medina t Puteoli. ¹⁴ Inak nina ligo juzu min akuwana wa kan rahibu le geni ma umon le saba ayom. Fi teriga de nina ja le Roma. ¹⁵ Min inak al akuwana , bat umon asma an nina ,ja le gabilu nina musafa baid ze al Suk ta Appius wa al Talata Tarvens. Zaman Bulis aiynu al ikuwa, uwo shukuru Allah wa biga suja. ¹⁶ Zaman nina dakalu fi Roma, Bulis kan sibu kede geni barau ma al askeri al kan gi arisu uwo. ¹⁷ Biga kan bat talata ayom Bulis nadi sawa rujal delin al umon kan al kada fi nus Yahudin. Zaman umon ja sawa, uwo kelim le umon, "Ikuwa, hata lu Ana ma amulu haja galat dit al sab au al adat ta abuhat ta nina, Ana kan gedimu ze mosjun min Urshelim le al ayadi ta al Romanien. ¹⁸ Bat umon asalu ana, umon itmana le sibu ana hur, ashan kan mafi sabab le hukum be al mut fi gedia tai. ¹⁹ Lakin zaman al Yahudin wonusu dit rakba tomon, Ana asuru le gedimu le Kaesar, hata lu ze Ana ma kan gi jibu ayi tuhuma dit beled tai. ²⁰ Le sabab de, lizalik, Ana nadi ashan ayinu itakum wa wonusu ma itakum, zema uwo bes ashan al raja ta Israil al Ana hasa labis genzir de." ²¹ Biga umon kelim le uwo, "Nina ma akudu juabat min Yahudia an ita, wele ayi min al ikuwa ja wa kabaru au kelim ayihaja batal an ita. ²² Lakin nina azu asma min ita sunu ita fekir an taiifa de, ashan uwo biga maruf ma nina gali gi wonusu didu fi ayi mahal." ²³ Zaman umon kan kutu al yom le uwo, nas ketir ja le uwo fi mahal al uwo bi geni fogo. Uwo gedimu al modu de le umon, wa sahidu an al molokut ta Allah. Uwo hawil agna umon an Yesua, kulu min al ganun ta Musa wa min al ambia, min sabah lakadi ashia. ²⁴ Juzu kan muktenein an al hajat al kan kelimu, ama akirin ma amin. ²⁵ Zaman umon kan ma tafik ma bat, umon rua bat Bulis kan kelim kilima wahid zede: " Roho Al Kudus wonusu kuwes be wasat Aseiah al nebi le abuhat takum. ²⁶ Uwo kelim, 'Rua le nas de wa klim, "Ma asuuma itakum bi asma, lakin itakum ma bi fahim; wa ma ayinuu itakum bi ayinu, lakin itakum ma bi istaoab. ²⁷ Lianu al gelib ta nas de kalas biga daif, wa ma adana tomon umon gowi asma, wa umon kalas gofulu uyun tomon. Kan ma kida umon bi akder ayinu ma uyun tomon, wa asma ma adanat tomon, wa fahim ma gelba tomon wa gilibu tani, wa Ana bi aliju umon." ^{28 29} Ashan kida, kede itakum aruf gali kulasa ta Allah de kalas rasulu le al Umamien, wa umon bi asma." ³⁰ Bulis geni le senaten kamil fi bet al ajiru le uwo barau, wa uwo rahibu kulu nas al ja le uwo. ³¹ Uwo kan gi besiru al molokut ta Allah wa kan gi derisu al hajat an al Rabana Yesua Al Mesih ma jahara bidun muakasat.