¹ Bat kamsa ayom, Ananias al rais kahana, shiuk tanin, wa muhami ismu Tertullus rua inak. Rujal del jibu tohumat dit Bulis gidam al hakim. ² Zaman Bulis wogif gidam al hakim, Tertullus bada be tahamu uwo wa kelim le al hakim, "Ashan be ita nina indu salam kebir, wa hikma taki jibu islah kuwes le beled ta nina; ³ kida ma kulu shukur wa tegdir nina gi rahibu ayi haja al ita amulu, said al akbar Felix. ⁴ Ashan kede Ana ma akiru ita aktar, Ana gi asalu ita kede asma besid le ana ma nia al kuwes. ⁵ Nina kalas ligo al rajil de yau batal wa uwo sabab le kulu al Yahudin fi dunia itmarat. Uwo yau rais ta mojumu ta al Nasirien. ⁶ Uwo hata hawil nigisu al haikal, kida nina gobudu uwo. ^{7 8} Ita kan asalu Bulis an hajat de kulu, ita bi agder aruf an tohumat al nina jibu dit uwo." ⁹ Al Yahud kaman limu fi al tohumat, mutuakitin gali tohumat de hagiga. ¹⁰ Lakin zaman al hakim wedi fursa le Bulis wonusu, Bulis juabu, "Ana aruf gali le senawat ketir ita gudi le beled de, wa be kida Ana mokosut wadi nefsa tai le ita. ¹¹ Ita bi agder ligo wadi gali ma aktar min itinasar ayom mini Ana rua le ibada lakadi Urshelim. ¹² Zaman umon ligo ana fi al haikal, Ana ma nakis ma ayi wahid, wa Ana ma limu al jumhur, la fi al majajame, wele fi al medina. ¹³ Umon mabi asbitu le ita al tohumat umon hasa amulu dit ana. ¹⁴ Lakin Ana bi akit de le ita, gali ala hasab al Sika al umon gi nadi al taiifa, fi nefsu terik de Ana gi abidu Allah ta abuhat ta nina. ¹⁵ Ana bi amin be kulu al fi al ganun wa al kutub ta al ambia. Ana indu al nefsu shiga fi Allah ze rujal del, gali badin bi kun fi giama ta kulu al abrar wa al asrar. ¹⁶ Be kida Ana daiman gi hawil ligo al demir wadeh gidam Allah wa kaiinat al baseria. ¹⁷ Hasa bat sinin ketir Ana ja le jibu musaada le beled tai wa hadia ta gurush. ¹⁸ Zaman Ana amulu zede, Yahudin tanin min Asia ligo ana fi iktifal ta tathir fi al haikal, ma be al jumhur wele al muzaharat. ¹⁹ Nas del kan kede kun gidan taki hasa wa kelim sunu al umon indu dit ana, iza umon indi ayi haja. ²⁰ Ya kaman, nefsu rujal del kede kelim de sunu yau batal umon ligo fi ana zaman Ana wogif gidam al mejles al Yahud, ²¹ ille lu an haja wahid al Ana kore shedid bara zaman Ana kan wagif fi nus tomon, ' De yau an al giama ta al maitin yau Ana biga gi hukumo gidam ita alela."' ²² Biga Felix, uwo al kan bi aruf tamam an al Sika de, ajilu al istima. Uwo kelim, " Kan Lysias al kait ja min Urshelim, Ana bi karir al gedia taki." ²³ Biga uwo amiru al dabit gali Bulis kede kun tehet hirasa, lakin kede wodi le uwo juzu min huria ashan gali kede ayi min sabihat tou ma abusu min jibu le uwo ehtiajad. ²⁴ Bat ayom besid, Felix rija ma mara tou Drusilla, al Yahudi, wa uwo gum rasulu le Bulis ashan uwo der asma min uwo an iman fi al Mesih Yesua. ²⁵ Lakin zaman Bulis kelim ma uwo an sokol bir, dabt al nefs, wa al dainuna, Felix biga kan kaif wa kelim, " Rua bara min hasa. Lakin kan Ana ligo fursa badin tani, Ana bi rasulu ashan kede nadi ita." ²⁶ Kan fi nefsu zaman, uwo kan gi itmana gali Bulis bi wodi le uwo gurush, de yau kef uwo daiman gi nadi uwo wa wonusu ma uwo. ²⁷ Lakin zaman itniin sena futu, Borisius Festus ainu biga wali bat Felix, lakin ashan Felix azu kede rudu uwo le al Yahud, be kida uwo sibu Bulis kede istemir tehet harast