¹ Baat kida Bulus sibu Asina wa ruwa le Korunsus. ² Hinak uwu limu ma Yahudi isim tuo Akela, min gebila ta Buntus, al ja gerib de min Italia ma mara tuo Biriskila, lanu kuludius wedi awamir inu Yahud kulu kede sibu Romia. Bulus ruwa le umun, ³ wa ashan uwu bi ishtakal nefsa tijara, uwu geni ma umun wa ishtakal, ashan umun kan amulu tijara ta salu kiam. ⁴ Bulus kan bi wunuso fi majama kulu yom Sebit. Uwu agana Yahud wa Yunanin. ⁵ Lakin zaman Sila wa Timusaus ja min Makadunia, Bulus kan aganiu ma Roho ashan bi shahidu le Yahud inu Yesua ya al Messih. ⁶ Wekit Yahudin aridu wa sitimu uwu, Bulus nufudu gumas tuo le umun wa wunuso le umun, ''Kede dum takum rija fi ras takum; Ana Beri. Min hasa le gidam ana bi ruwa le Umam.'' ⁷ Baat kida uwu tala min hinak wa ruwa fi baet ta Titus Yustus, raji al bi abudu Allah. Baet tuo gerib ma majama. ⁸ Kirisbus rais ta majama, amin fi Rabana, sawa ma delin al amin fi baet tuo; wa ketirin min Kurunsiin al asuma amin wa amidu umun. ⁹ Rabuna wunuso le Bulus be bilel be ruoya, ''Mata kafu, lakin wunuso wa mata askut. ¹⁰ Ashan Ana fi ma ita, wa mafi zol bi hawil awugu ita, lanu Ana indu nas ketir fi medina de.'' ¹¹ Bulus geni hinak le fetera ta Sena wa sitta shuhur, bi derisu kelima ta Rabana. ¹² Lakin wekit Galion biga wali ta Akaiiya, Yahud gum fuk sawa did Bulus wa jibu uwu gidam ta hukum; ¹³ umun kelim, ''Zol de bi agne nas kide abudu Allah bara min Namus.'' ¹⁴ Wa zaman Bulus der wunuso, Galion ke,lim le Yahud, ''Itakum Yahud, lu hagiga de kan muodu ta haja batal wel jerima, bikon fi sabab ashan Ana bi wunuso ma itakum. ¹⁵ Lakin madam de asila an kelimat wa asma wa namus takum, kele itakum hilu kalam de be nifus takum. Ana ma der kun gadi ta hajat de.'' ¹⁶ Galion turuju umun min kuris ta hukum. ¹⁷ Umun kulu gubudu rais ta majama Sustanis, wa dugu uwu gidam ta kuris ta hukum. Lakin Galion ma ihtam be haja al umun amulu. ¹⁸ Wa Bulus baat ma uwu geni hinak le ayam ketir, uwu sibu ikewa wa arkab sefina le Suriya ma Biriskila wa Akela. Wa guba uwu ma ruwa le Kangaria, uwu haligu ras tuo lanu uwu kan wedi halifa. ¹⁹ Zaman umun ja le Afasus, Bulus sibu Akela wa Biriskila Hinak, lakin uwu ma nefsa tuo ruwa fi majama wa nagishu ma Yahud. ²⁰ Wekit umun asalu Bulus kede geni ma umun zaman tuwil, uwu ma rudu. ²¹ Lakin uwu wadiu umun, uwu kelim, ''Ana bi rija le itakum tani kan de irada ta Allah.'' Baat kida uwu arkab sefina min Afasus. ²² Zaman Bulus wusulu fi Gaisaria uwu ruwa selimu Kenisa ta Urshelim wa baat kida uwu ruwa le Antakia. ²³ Baat ma uwu geni zaman hinak, Bulus tala wa ruwa safa ta Galatia wa Ferijia wa shaja rusul. ²⁴ Hasa si Yahudi tani isim tuo Abulus min Iskandaria be melad, uwu ja le Afasus. Uwu kan negit fi kalam wa indu kibira fi kalam ta Rabana. ²⁵ Abulus kan sukun fi Roho bi derisu dirasat ta Rabana be dikha, wa bi wunuso hajat al bi kus Yesua, Lakin umun bes arufu mamudia ta Yuhanna. ²⁶ Abulus bada wunuso be sout fi majama. Lakin zaman Akela wa Biriskila asuam uwu, umun juru taraf wa wadihu le uwu teriig ta Allah be dikha. ²⁷ Wa ligu uwu kan indu niya ashan bi mururu be safa ta AKhaiiya, ikewa sheja uwu wa katibu lw Talamis fi Akhaiiya kede rahibu uwu. Wekit uwu wusulu, uwu saidu ketir be naima delin al amin. ²⁸ Lanu Abulus kan bi fahimu Yahud be gowa wa gidam nas, bi sabitu min kitab inu Yesua yau al Messih.