¹ Kan fi Antakia fi Kenisa, baad min mualimin wa imbiya. Umun kan Barnaba, Samaan (al bi nadi uwu Nejar), Lukius al Hairawani, Manaien(aku ta Hirudus rais ta rubu al raba ma uwu), wa Shaul. ² Zaman umun kan bi abudu Rabana wa bi sum, Roho al Kudus kelim, ''Tala takum le ana Barnabama Shaul, ashan bi amulu shukul al Ana nadi umun fugu.'' ³ Baad ma umun sum, seli, wawedi iden fi ras ta nas de, umun rasulu umun bara. ⁴ Barnaba wa Shaul tii Roho al Kudus wa le Selukia; min hinak umun gata bahar le jezira ta Gubrus. ⁵ Wekit umun kan fi medina ta Salamis, umun beshiru kelima ta Allah fi Majma ta Yahud. Umun bardu kan indu Yuhanna Murkus ze musaid. ⁶ Laman umun mururu be Jezira kulu le Bafus, umun ligu zol ta sihir tani, Nebi Yahudi kadab, al isim tuo kan Bar Yesu. ⁷ Sahir de kan bi ishtakal ma wali Srjiuos Bulus, al rajil negit. Zol de nadi Barnaba ma Shaul, ashan uwu der asuma kalam ta Allah. ⁸ Lakin Alim al sahir (de yau teriga al isim tuo terjimu) aridu umun; uwu hawil ashan bi gairu wali min iman. ⁹ Lakin Shaul, al bi nadi Bulus, mala be Roho al Kudus, wa ayinu fugu uwu shedid. ¹⁰ Wa wunuso, ''Itta jena ta Eblis, itta malian be kulu shikil ta sher wa kabasa. Itta adu ta kulu bir. Itta ma bi wegif karabu sika ta Ranbana al adil? ¹¹ Hasa ayinu, Ida ta Rabuna bi neil fugu ita, wa ita bi kun amiyan. Ita ma bi ayinu shemis le fetera. ''Tuali duluma wa dabab waga fugu uwu; uwu bada duoru bi fetishu zol al bi ageder gubudu ida wa bi weri le uwu sika. ¹² Zaman wali ayinu haja al hasil, uwu amin, lanu uwu kan mustagrab be talim and Rabana. ¹³ Hasa Bulus ma Sabihat tuo ja be Safina min Bafus le Birja fi Bemifilia. Lakin Yuhanna sibu umun wa rija fi Urshelim. ¹⁴ Bulus ma Sabihat tuo safir min Birja wa ja le Antakia Bisidia. wa umun dakalu fi Majima fi yom sebit wa geni tihit. ¹⁵ Baad giria ta Namus wa Imbiya, giadin ta Majima rasulu le umun rissala bi wunuso, ''Ya ikeua kan iyakum indu ayi Kelima ta teshji le nas hini, wunuso takum.'' ¹⁶ Bulus wegif fuk wa midu iden tuo: ) Itakum rujal ta Israel al gi kafu Allah , asuma takum. ¹⁷ Ilah ta Shaab ta Israel iktar abuhat ta nina wa sibu nas geni fi beled ta guruba fi Masir, wa bi ida al gowi uwu tala umun bara min fugu. ¹⁸ Le fetera ta Arbein sena uwu kan bi subur ma umn u fi sahara. ¹⁹ Baad ma uwu demiru saba shuub fi beled ta kanaan uwu wedi beled tumun le nsa ta nina werisa. ²⁰ Hajat de kulu hasil fi fetera ta Urbumia wa kamsin sena. Baad hajat de kulu, Allah wedi le umun Guda lahadi Samuel al Nebi. ²¹ Yala nas asalu kede kutu le umun Melik, Allah wedi le umun Shaul jena ta Ges, trajil min bab ta Benyamin, le fetera ta arfbein sena. ²² Baad ma Allah tala uwu min Mamlaka, uwu arfa Daoud kede kun melik tumun. wa de kan an Daoud Allah kelim, Ana ligu FDaoud Jena ta Yassa rajil hasab Geliba tai, al gi amulu kulu haja al ana deru uwu bi amulu.' ²³ Min Eyal ta Zol de Allah jibu le Israel Mukalis, Yesua, ze ma uwu wadu bi amulu. ²⁴ De bada hasil gubal Yesua ma ja, Yuhanna beshiru awel be mamudia ta tuba le kulu shab ta israel. ²⁵ Ze Yuhanna bi kalasu shukul tuo, uwu kelim, ' Itakum bi fekir ana munu? Ana ma yau uwu. Lakin asuma takum, de al bi ja wara tai, al Ana ma mustahik ashan bi fiku habil ta gizimna tuo.' ²⁶ Ikeua, Eyal ta nesili ta Ibrahim, ma delin al fi nus takum al bi abudu Allah, de le nina rissala ta kulasa rsulu le nina. ²⁷ Lanu delin al bi geni fi Urshelim, wa ruasa tumun, ma arufu uwu, wa umun nefizu nubuwat ta ambiya al bi agarau kulu yom Sebit bewasat hukum tumun le uwu. ²⁸ Hata umun ma ligu sabab ta katulu tuo, umun asalu Bilatus kede katulu uwu. ²⁹ Zaman umun timu amulu ayi haja al muktub an uwu, umun nezilu uwu min ras kashab wa kutu uwu fi gubur. ³⁰ Lakin Allah guomu uwu min amuwat. ³¹ Uwu zahir ayam ketir le delin al ja ma uwu min Jelil le Urshelim. Nas de hasa yau shuhud ta tuo le shaab. ³² Inna gi weri le itakum kabara al kues an haja waad al Allah wedi le abuhat ta nina ³³ uwu tamimu le inna, eyal tumun, uwu jibu Yesua. Ze muktub fi Muzmur al tani: 'Ita Jena tai, alela ana bi abu taki.' ³⁴ Hagiga inu uwu goumu uwu min mutu ashan jisim tuo ma bi ligu fasad, Allah wunuso be teriga de: 'Ana bi wedi le ita waad ta Daoud al mukadas wa akid.' ³⁵ De sabab al uwu bardu wunuso fi muzmur tani barau, 'Ita ma bi sibu Kudus taki ayinu fasad.' ³⁶ Lanu Daoud zaman amulu kiduma tuo hasab niya ta Allah fi jil tuo, uwu mutu; w dufunu uwu ma abuhat tuo wa jisim tuo ligu fasad. ³⁷ Lakin de al Allah guomu ma ligu fasad. ³⁸ Ashan kida kede kalam de kun maruf le itakum, ya Ikewa, inu be wasat zol de beshiru le itakum an gufran ta kataya. ³⁹ Be uwu ayi zol al be amin beriru uwu min kulu hajad al ganon ta Musa ma agider beriru itakum. ⁴⁰ Kele itakum kun harisin ashan hajad al anbiya wunuso anu ma bi hasil le itakum: ⁴¹ Kutu takum bala, itakum al bi alisu, wa istagrab takum wa baad kida mutu takum; ashan ana bi amulu haja fi ayam takum, Haja al itakum ma sedek, hata ka fi zol alinu le itakum.''' ⁴² Ze Bulus ma Barnaba ruwa, nas asadu umun inu kede umun ashan be wunuso nefsa kalam tani mara fi yom sebit al jai. ⁴³ Zaman ijtima ta mejeles al Shiuk intahah, ketir min Yahud wa nas al ja min bara al bi abudu Rabana ruwa wara ta Bulus wa Barnaba, al wunuso le umun wa asadu umun kede istemir fi naima ta Allah. ⁴⁴ Fi yom sebit al badu, medina kulu tegriben limu sawa ashan binasuma kalam ta Rabana. ⁴⁵ Zaman Yahudin ayinu Jumhur de umun mala ma gira wa wunuso did kalam al wunuso be Bulus wa sitimu uwu. ⁴⁶ Lakin Bulus ma Barnaba wunuso be shuja wa kelim, ''Uwu kan dururi ashan kalam ta Allah bi wunuso le itakum awel. Lakin Ana ayinu itakum lizu bait min itakum wa itakum ayinu badun takum ma mustahegin le haya al abadia, yau de inna be ruwa le umam. ⁴⁷ Lanu Rabuna wusi inna, kelim, 'Ana kutu itakum ze nur le Umam, ashan itakum bi jibu kulaasa le akir ta wada.''' ⁴⁸ Ze nas Umam bi asuma kalam de, umun kan farhanin wa sabihu Rabuna. Ze ketirin hazilu le haya al abadia amin. ⁴⁹ Wa kalam ta Rabuna kan inteshir le bilad kulu. ⁵⁰ Lakin Yahudin hariku nusuwan al mukarasin ma nusuwan al muhimin, sawa ma rujal ta medina. Kalam de jibu itihadat did Bulus ma Barnaba wa umun jada umun bara min hudud ta medina. ⁵¹ Lakin Bulus ma Barnaba nufudu gubar min kurenat tumun safa tumun. Wa umun ruwa medina ta Igonia. ⁵² Wa talamis kan malian be Farah wa be Roho al Kudus.