¹ Wa baad de, shaab ta Moab wa Aamon, wa baad min Aameuneen jaa deed Yahushafat le arib. ² Wa fii baad min nas jaa kelim le Yahushafat, Gal, " Jumhur kebier gi jaa deed inta min gata bahar al meit, min Edom. Ainu, homon hinak fi husun ta Tamar," Al Hiya Einjedi. ³ Yahushafat kafu wa howo wodi nefsa tuo ashan bi fetishu Yahwah. Howo Aalinu siyam fi Yahuza kulu. ⁴ Yahuza limu kulu asha bi asalu Yahwah; homon jaa min kulu mudun ta Yahuza ashan bi asalu Yahwah. ⁵ Yahushafat wogif fi mujtamaa ta Yahuza wa Ureshelim, fi Beit ta Yahwah, gedam midan ( Al Dar) al jedid. ⁶ Howo kelim, "Yahwah, Allah ta judud ta nina, Hal inta yahu ma Allah al fi sama? Hal inta yahu ma melik al fok kulu mamalik ta aumam? Sulat wa gowa fi eda taki, wa mafi zol bi agdeer gawim inta. ⁷ Allah ta nina, Hal inta yahu ma turudu sukkan ta al ardi min gedam shaab taki Israel, wa howo wodi ardi de le Ajeayal ta Abraham elall abad? ⁸ Homon geni fogu wa abeinu le inta mahal al mughadus ashan isim taki, kelim gal, ⁹ 'Iza karisa jaa le nina - Seif, Hukum, aw jeayan- nina bi wogif gedam Beit de, wa gedam taki (ashan isim taki fii Beit de), wa nina bi kori le inta fi musiba ta nia, wa inta asuma nina wa angizu nina.' ¹⁰ Wa hasa, Yahu shaab ta Aamon, Moab, wa jebel saier al inta ma sibu Israel seatar fi zaman al homon tala bara min aedi masir; lakin, Israel rejaa min homon wa ma demiru homon. ¹¹ Ainu keif homon gi kafieu nina;homon gi jaa turudu nina min rdi taki al inta wodi wa worisu le nina ¹² Allah ta nina, Hal inta ma bi hakimu homon? ashan nina ma indu gowa deed gowa ta jesh al azim al gi jaa deed nina. nina ma arufu nina bi amulu shunu, lakin eyiyun ta nina le inta." ¹³ Yahuza kulu wogifu gedam Yahwah, maa , shabab tomon ,Nuswan, iyal sukiereen. ¹⁴ Wa min wasat ta mujmua ta nas ruhu ta Yahwah nezil le Yahuzael jena ta Zakariya, jena ta Beniya, jena ta Yael, Jena ta Mataniya Al lawee wa min Usura ( Abnaa) ta Aasaf. ¹⁵ Yahuzael kelim, " Asuma, ya Yahuza wa sukkan ta Ureshelim, wa melik Yahushafat. Yahwah kelim le intum gal, 'Keli intum ma kafu; keli gelba takum ma hezu bi sabab ta jesh al kebier de, ashan harib de ma le intum, lakin ta Allah. ¹⁶ Bukra keli intum ruwa haribu homon. Ainu, homon yahu dak gi jaa min sika Sis. intum bi ligu homon fi nihaya ta al wadi, gedam ta Barriya ta Yaruael. ¹⁷ Keli intum ma shakil fi harib de. keli intum wogif fi mahalat takum, wogif takum sabit, wa ainu takum khalas ta Yahwah le intum, Yahuza wa Ureshelim. Keli intum ma kafu wa ma keli intum hezu. Bkra keli intum haribu homon, ashanYahwah maa intum."' ¹⁸ Yahushafat dengiri ras wa wosa tuo le tehet. Yahuza kulu wa sukkan ta Ureshelim dengiri tehet gedam ta Yahwah, gi Aabidu howo. ¹⁹ Al aween, al min Usura ( Abnaa ) ta Ghuhateen wa Ghurhiyeen, homon wogif fok ashan bi sabihu Yahwah, Allah ta Israel, bi sut Aali shedid. ²⁰ Wa fi sabah bedri homon gum wa ruwa Barriya Tekuaa. zaman homon ruwa, Yahushafat wogif wa kelim, " Asuma takum le ana, Yahuza, wa intum sukkan ta Ureshelim! Keli intum amin fi Yahwah Allah takum, wa intum bi ligu musaada. Keli intum amin fi Anbiyaa tuo, wa intum bi najah." ²¹ Baad howo amuly mushawara maa shaab , howo ikhtar nas al gi guna le Yahwahwa al gi mejedu howo ashan jamal ta Aazama tuo wa homon gi douwru gedam ta Jesh, gi kelim, "Wodi shukran le Yahwah, ashan amana tuo bi geni ellal abad. ²² Zamanhomon bada guna wa mejeedu, Yahwah amulu sherik min nas deed shaab ta Ammon, Moab, wa Jebel saeir, al kan gi jaa deed Yahuza. kan katulu homon. ²³ Ashan shaab ta Ammon wa Moab gum ashan bi shakil sukkan ta Jebel saeir, ashan in katulu wa demiru homon kulu. zaman homon kalasu maa sukkan ta jebel saeir, homon kulu saidu ashan bi demiru baad tomon. ²⁴ Zaman Yahuza fi mahal ta muraghaba ta Barriya, homon ainu le jesh. Waa, homon kan meiteen , waga fi al ardi; mafi zol al najah. ²⁵ Zaman Yahushafat wa shaab tuo jaa ashan bi seregu hajat, homon ligu Amual ketier beina homon, Malabis,wa hajat al ghali, al homon shilu le nefsa tomon, aktar bi keteir min al mon i agdeer shilu. homon amulu talata yom ashan bi nahibu hajat deel, Leanu kan hajat de keteir shedid. ²⁶ Fii yom al talit homon limu fi wadi al Baraka. Hinak homon mejeedu Yahwah, wa homon nadi mahal de "Wadi al Baraka" hata al yom. ²⁷ Biga homon rejaa, ayi zol min Yahuza wa Ureshelim, wa Yahushafat fi mugedima tomon, ashan bi ruwa tani mara le Ureshelim maa farah, ashan Yahwah wodi le homon intisar alla Aaduw tomon. ²⁸ Homon jaa le Ureshelim wa le Beit ta Yahwah maa Aaud wa Ghitar wa turumpeta. ²⁹ Kuaf ta Allah kan fii mamalik ta Aumam kulu zaman al homon asuma inu Yahwah harib deed Aada ta Israel. ³⁰ Wa mamlaka ta Yahushafat kan biga fi salam, ashan Allah wodi le howo salam hawli howo. ³¹ Yahushafat hakumu Yahuza: Amur tuo kan khamsa-wa teletiin sina, ³² sina fi zaman al howo kan bada hukum, wa howo hukumu reshelim le mudat khamsa- wa Isheriin sina. wa kan isim ta Uma tuo Aazuba, Biniya ta shilhi. ³³ Howo douwru fi terig ta Aasa, Abu tuo; howo ma rejaa min homon; howo amulu haja al sah fi eiyun ta Yahwah. 33Lakin, al amakin al Aali ma.shilu ashan shaab kan lisaa ma jahizu gulub tomon le Allah ta Judud tomon. ³⁴ Wa bagi hajat ta Yahushafat, al awel wa al akhier, Hina, Muktub fi tarikh ta Yahu jena ta Hanani, al musajal fi kitab ta muluk ta Israel. ³⁵ Wa baad dak Yahushafat, melik ta Yahuza, limu nefsa tuo maa Ahaziya, melik ta Israel, al amulu shar shedid. ³⁶ Howo limu nefsa tuo maa howo ashan bi abeinu Sufun ashan bi ruwa fi Tershish. Homon abeinu Sufun fi Aasiun Jabier. ³⁷ Wa Alieyazar jena ta Duduwahu al min Marshah, Itnabaa aan Yahushafat, howo kelim, "Ashan inta limu nefsataki maa Ahaziya, Yahwah demiru shukul taki." Sufun kan kasuru kulu wa ma agdeer ruwa le .Tershish