¹ Zaman Daud jere min Naiot al fi Rama huwo ja wa kelimo le Yonasan, "Ana amolo shuno? Shuno batal ana amolo? De yato katia al ana amolo gidam ta abu taki, al sibo huwo bi fetisho ashan katulo ana?" ² Yonasan kelimo le Daud, "Ma hagiga; ita ma bi muto. Abu tai ma bi amolo haja kan suker wele keber bedon ma bi wori le ana. Le huwo bi dusu kalam de min ana? huwo ma zede." ³ Lakin Daud halifo wa kelimo, "Abu taki arufu tamam ino ita bi rudu ana. Huwo kelimo, 'Kede Yonasan ma arufu kalam de, ashan huwo bi tala ma murtah.' Lakin hagiga tou ze ma Yahuwa hai, wa ze ma ita hai, ana kan gerib min mutu." ⁴ Yonasan gum kelimo le Daud, "Asalo min ana ai haja, ana bi amolo le ita." ⁵ Daud kelimo le Yonasan, "Bokora ihtifal ta awel shahar, wa ana daiman bi geni wa akulu ma melik. Lakin sibo ana ruwa, wa duso nefsa fi mazra lahadi misa ta yom nimra talata. ⁶ Kan abu taki asalu ann ana, kelimo, 'Daud shelo izen min ana shan huwo bi ruwa le medina tou Beatlaham; ashan de zebiha ta awel sena bi amolo le gebila kulu.' ⁷ Kan huwo kelim, 'Mafi mushkila,' mana tou khadam taki fi aman. Lakin kan huwo tala zalan shedid, arufu ino huwo bi fekir shar le ana. ⁸ Ashan keda amolo maruf le khadam taki. Leano khadam taki amolo ahad ta Yahuwa ma ita. Kan fi katia fi ana, kede ita katulo ana; ashan maf sabab bi sibo ita shelo ana le abu taki?" ⁹ Yonasan kelimo, "De ma bi hasil! Kan ana arufo ino abu tai bi fekir shar le ita, ana ma bi wori le ita?" ¹⁰ Daud gum kelimo le Yonasan, "Muno yao bi wori le ana kan abu taki rudu le ita be teriga al batal?" ¹¹ Yonasan kelimo le Daud, "Tal, kede anna ruwa fi mazra." Fa humon gum ruwa le mazra. ¹² Yonasan kelimo le Daud, "Kede Yahuwa, Allah ta Israel, geni shahid. Kan ana asalo abu tai fi zaman de bukra tou, aw yom nimra talata, kan nia tou kowas tijah taki, wa ana ma wori le ita kabara. ¹³ Kan fi geliba tou sharr tijah taki, kede Yahuwa amolo le Yonasan ze ma abu tai dear amolo le ita , wa akter kaman kan ana ma wori le it wa sibo ita, ashan bi ruwa be salam. Kede Yahuwa kun ma ita, ze ma huwo ma abu tai. ¹⁴ Kan ana lisa hai,kede ita zahi ahad taki ma ana gidam ta Yahuwa; mata katulo ana kan ita tala melik. ¹⁵ Mata nisito ahad taki min beat tai hata kan Yahuwa katulo addo taki kulu min ard." ¹⁶ Fa Yonasan amolo ahad ma beat ta Daud wa kelimo, "Kede Yahuwa demir adu ta Daud kulu." ¹⁷ Yonasan kutu Daud halifo tani ashan muhaba tou le Daud, leano huwo hibo Saud ze nefsa tou. ¹⁸ Huwo kelimo le Saud, "Bukura ihtifal ta bidaya awel shahr. Ita bi kun mafi ashan kursi taki bi kun fadi. ¹⁹ Kan ita geni muda ta talata yom, nenzil guwm le makan al ita duso fugu zaman kan hajat lesa ma karabo, wa geni jambo hajer al bi nadi Iftiraq. ²⁰ Ana bi jada talat saham fi jambo tou, ze ana bi luku fi hadaf. ²¹ Yala ana bi rasolo zol wa kelimo le huwo, 'Ruwa wa fetiso saham de; kan ana kelimo le zol de, 'Aino, saham de fi jambo taki, legeto humon," kede ita ja; ita bi fi aman wa mafi khatar, ze ma Yahuwa hai. ²² "Lakin kan ana kelimo le weled de, 'Aino saham de fi gidam taki,' kede ita ruwa fi sika taki, ashan Yahuwa fiko ita. ²³ Ze ma ana wa ita tifago, Yahuwa fi nus tanna lel abad." ²⁴ Daud dusu nefsa tou fi mazra. Zaman ihtifal ta awel shahar fi sena jedid, mekil kan ja ashan akulu akel. ²⁵ Huwo geni fi kursi tou, ze ta kulu yom, al fi heta. Yonasan geni gusat ta melik, wa Abner geni jambo Shaul. Lakin kursi ta Daud kan fadi. ²⁶ Fi yom daak Shaul ma wonoso aai haja, ashan fi fekra tou, "Haja hasil le Daud sebo huwo ma nedif hasab ganon wama bi agder ja gidam Allah." ²⁷ Lakin fi yom al tani, makan ta Daud fadi. Shaul kelimo le Yonasan jena tou, "Malo weled ta Yessa ma ja le akil umbarih wa alela?" ²⁸ Yonasan juwabo Shaul, "Daud asalo izen minana ashan bi ruwa le Beatlaha. ²⁹ Huwo kelimo, 'Malis sibo ana ruwa. Ashan usura tai indo zebiha fi medina, wa akwana tai nadi ana ashan bi kun hinak. kan ita bi rudu ana, malis sibo ana ruwa wa aino akwana tai.' De yao sabab al sibo huwo ma ja fi terbeza ta melik." ³⁰ SHaul kan tala zalan shedid min Yonasan, wa huwo kelimo le Yonasan, "Ita belid jena ta mara al mutmerid! Ita gali ana ma arufu meilan taki le jena ta Yessa ashan bi kati fadia taki, wa fadia ta umma taki? ³¹ Kan jena ta Yessa de hai fi donia, la ita wa la mamlaka taki bi sabito. Hasa de, rasulo wa jibo huwo le ana, ashan huwo lazim bi mutu." ³² Yonasan juwabo Shaul abu tou, "Le yato sabab bi katulo huwo? Huwo amolo ³³ shuno?" Shaul gum luku Yonasan be harba tou ashan bi katulo huwo. Yonasan arufu ino abu tou jaadi ashan katulo Daud. ³⁴ Huwo gum min gidam ta tarbeza be zalan shedid wa fi yom al tani le ihtifal huwo aba akulo, leano huwo kan hazin Daud, ashan abu tou aliso huwo. ³⁵ Fi sabah, Yonasan ruwa bara le mazra fi makan al huwo bi ruwa limo ma Daud, wa kan fi weled suker ma huwo. ³⁶ Huwo kelimo le weled de, "Jere wa fetiso nishab al ana bi jadao de." Wokid weled de bi jere, huwo jada nishab gidam ta tou. ³⁷ Zaman weled de wosolo fi makan al nishab ta Yonasan waga fugu, huwo nadi weled de, wa kelimo, "Nishab de ma yao fi gidam taki?" ³⁸ Yonasan nadi weled suker de, "Jere, guwam, mata akir!" Weled de gum limo danga de be sura wa ja le sead tou. ³⁹ Lakin weled de ma arufo ai haja. Ele Yonasan ma Daud humon yao arufo kalam de. ⁴⁰ Yonasan gum wodi danga tou ma nishab le weled de wa kelimo le huwo, "Ruwa, shelo hajat de le medina." ⁴¹ Baad ma weled de ruwa, Daud gum be sura minwara hajer, dengir ras tou, wa dengir falata talata marat. Humon selimo badon be gubla wa kore sawa. Lakin Daud kore aktar min Yonasan. ⁴² Yonasan kelimo le Daud, "Ruwa be salam, leano anna halifo le badon tanna be isim ta Yahuwa be keilmat de, 'Kede Yahuwa geni bain ita wa ana, wa bain iyal tai wa iyal taki lel abad."' Daud gum wogif wa futu, wa Yonasan rija le medina.