¹ Shaul kelimo le Yonasan jena tou wa le khudam tou kulu gali kede humon katulo Daud. Lakin Yonasan, jena ta Shaul, kan bi hibo Daud. ² Huwo gum kelimo le Daud, "Shaul abo tai dear katulo ita. Ashan keda hafizo nefsa taki bukura sabah wa duso nefsa taki fi makan mafi zol bi arufo. ³ Ana bi tala wa wogif ma abo tai fi makan al ita fugu, wa ana bi wonoso ma huwo ann ita. Kan ana arufo ai haja ana bi wori le ita." ⁴ Yonasan wonoso ann kwas ta Daud le abo tou huwo kan kelimo, "Mata amolo katia did khadam taki Daud. Ashan huwo ma amolo katia did ita, wa hajat al huwo amolo saido ita shedid. ⁵ Huwo kutu haya tou fi khatar zaman huwo katulo Juliat. Yahuwa jibo intisar azim le Israel. Ita tala murtah wokit ita aino. Malo ita dear katolo Daud wa dufugo dom beri?" ⁶ Shaul asoma le Yonasan. Huwo halifo, "Ze ma Yahuwa hai, ana ma bi katulo huwo." ⁷ Baad dak Yonasan nadi Daud, wa wori le huwo kulu haja. Yonasan gum jibo Daud le Shaul, wa huwo rija fi gidam tou ze ta bedri. ⁸ Harib gum bada tano, wa Daud lata wa shakila ma Filistineen wa hazimo humon shedid. Humon kan jere min gidam ta Daud. ⁹ Lakin fi yom min ayam ruho al batal min Yahuwa hajimo Shaul zaman huwo bi geni fi beat tou wa rumh fi iden tou, wa Daud kan bi azifo aala tou. ¹⁰ Shaul hawil ashan atano Daud be harba wa dugo huwo fi heta, lakin huwo kan jere min gidam ta Shaul, fa Shaul luku harba de fi heta. Daud jere wa dusu bilel ta yom daak. ¹¹ Shaul gum rasulo jawasis le Daud ashan bi ragibo huwo ashan bi katulo huwo fi sabah. Mikal, mara ta Daud, kelimo le huwo, "Kan ita ma alago nefsa taki belal ta alela, bukura tou bi katulo ita." ¹² Mikal gun nezil min shubak. Huwo jere wa tefes. ¹³ Mikal shelo timsal wa kutu fi serir. Biga heya kutu makhada min shar ta galamaya, wa kati be be gumash. ¹⁴ aman Shaul rasulo asakir ashan bi shelo Daud, heya kelimo,, "Huwo ayan." ¹⁵ Shaul gum rasulo asakir ashan bi ayno Daud; huwo kelimo, "Jibo takum huwo le ana fi serir, ashan ana bi katulo huwo." ¹⁶ Zaman asakir de dakalo juwa, humon ligo timsal yao fi serir ma makhada min shar ta galamaya fi makan ta ras. ¹⁷ Shaul kelimo le Mikal, "Malo ita kabaso ana wa sibo addo tai ruwa, shan bi tefes?" Mikal juwabo Shaul, "Huwo kelimo le ana, sibo kede ana ruwa, yao ana bi katulo ita," ¹⁸ Baad ma Daud jere wa tefes min Shaul, huwo ruwa le Samuel fi Rama wa wori le huwo hajat al Shaul amolo le huwo. Huwo ruwa wa geni ma Samuel fi Naiot. ¹⁹ Kelimo le Shaul ino, "Daud fi Naiot fi Rama." Shaul rasulo asakir ashan gubudo Daud. ²⁰ Zaman humon aino jamaa ta anbia bi itnabaa, wa Samuel yao raies tumon, Ruho ta Allah nenzil fi asakir at Shaul, wa humon kaman bada itnaba. ²¹ Zaman kelimo le Shaul haja al hasil, huwo rasulo asakir tani, wa humon kaman itnaba. Shaul kman rasulo asakir la mara al talit, wa humon kaman geni itnaba. ²² Biga huwo kaman ruwa be nefsa tou le Rama wa ruwa laqhadi fi bear al kebear fi Sekho. Huwo asalo, "Samuel ma Daud fi wen?" Zol tani kelimo, "Humon fi Naiot fi Rama." ²³ Shaul ruwa le Nayot fi Rama. Fa Ruho ta Allah nenzil fi huwo, wa huwo bada itnaba lahadi ma huwo wosulo fi Naiot fi Rama. ²⁴ Huwo agila gumash tou bara wa kaman itnaba gidam ta Samuel. Huwo num ariyan nhar kulu lahadi belel. nas kan bi asalo, "Shaul kaman fi nus ta anbiya?"