¹ Zaman huwo kalaso wonosa ma Shaul, Yonasan rudu Daud, wa huwo hibo Daud ze nefsa tou. ² Min yom daak, Shaul sibo Daud kede geni ma khudam tou, huwo aba kede Daud rija le beat tou. ³ Yonasan wa Daud amolo ahad ta sabi sabi ashan huwo hibo Daud ze nefsa tou. ⁴ Yonasan agila gumash al kan huwo bi libiso wa wodi le Daud, kaman saef, danga, wa hizam tou. ⁵ Daud kan bi naja fi kulu muhima Shaul bi rasulo huwo fugu. Shaul wokil huwo musolia ta jesh ta harb. De sibo nas wa khudam ta Shaul mutahin. ⁶ Wokit humon rija baad ma katulo Julia, nuswan tala min kulu mudon ta Israel, be guna wa lieb, le Istigbal melik Shaul, be tubol, ma farah, wa adawat ta muzika. ⁷ Nuswan de kan bi guna le badon tumon ma lieb. Humon bi guna; "Shaul katulo allaf, lakin Daud katulo asharat al allaf." ⁸ Shaul kan tal zalan shedid, wa guna de sibo huwo ma murtah. Huwo kelimo, "Humon wodi le Daud ashara alif, lain le ana humon wodi alf bes. Haja wahid al fadolo le huwo yao ino bi tala melik." ⁹ Min yom daak Shaul geni ragibo Daud be shukok ion huwo bi ja shilo hukum min huwo. ¹⁰ Tani yom ruho al batal min Allah hajimo Shaul wa huwo bada itsaraf ze mujonon fi beat. Daud kan bi azifo ze ta kulu yom. Shaul kan indo rumh fi iden tou. ¹¹ Shaul luku rumh de, ashan huwo fekir gali, "Ana bi lesego Daud fi heta ma rumh de." Lakin Daud kan nofud min huwo maratain. ¹² Shaul biga bi kafo min Daud, ashan Yahuwa kan ma huwo, lain huwo ma ma Shaul ¹³ Shaul shelo Daud bara min gidam tou wa kutu huwo kaid ta alif. Daud kan bi tala wa rija ma asakir tou. ¹⁴ Huwo kan daimn bi naja fi shokol tou, leano Yahuwa kan ma huwo. ¹⁵ Zaman Shaul aino najah ta Daud, huwo kafo nim Daud. ¹⁶ Lakin kulu nas ta Israel wa Yahuza hibo huwo, ashan huwo kan bi tala wo rija ma humon. ¹⁷ Yala Shaul kelimo le Daud, "De binia tai al kebir Mirab. Ana bi zaojo le ita. Bes kede ita kun batal wa harbu hurob ta Yahuwa." Ashan Shaul wonoso le nefsa tou, "Kede ana ma katulo huwo be iden tai, lakin kede huwo mutu fi iden ta Filistineen." ¹⁸ Daud kan juwabo le Shaul, "Ana muno, wa ahal tai yao nas muno, aw gebila tai fi Israel, al ana bi kun raji binia ta melik?" ¹⁹ Lakin fi zaman al kan bi zaojo Mirab, binia ta Shaul, le Daud, Shaul zaojo heya le Adriel ta Maholi. ²⁰ Lakin Mikal, binia ta Shaul hibo Daud. Kabara de kan wosolo le Shaul, de sibo hwuo murah min Daud. ²¹ Shaul kan fekir, "Ana bi wodi heya le huwo, ashan heya bi kun fakh(sharak) le Daud, wa kaman iden ta Filistineen bi kun le huwo." Fa Shaul kelimo le Daud mara tani, "Ita bi kun rajil ta binia tai." ²² Shaul wodi awamir le khudam tou, "Wonoso takum le Daud fi adana tou, ino, 'Aino, melik bi hibo ita, wa khudam tou kulu bi hibo ita. Fa enna bi fekir kede ita zaojo binia ta melik ashan ita bi kun rajil binia tou."' ²³ Khudam ta Shaul biga bi wonoso kalam de le Daud. Daud kan juwabo gali, "Intum bi fekir ino zaojo binia ta melik de haja sahil, wa ana zol miskin, wa ma muhim?" ²⁴ Khudam de kan wori le melik kalam al huwo wonoso. ²⁵ Shaul kan kelimo, "Kelimo takum le huwo, 'Melik ma bi fekir fi gurush le binia tou; huwo bi fekir ino ita bi jibo le huwo mia jilid ta Filistineen al ma tahiro, ashan bi kun intigam minadda ta melik."'' Shaul kan fekir ashan sibo Daud katulo be Filistineen. ²⁶ Zaman khudam tou wonolso kalem de le Daud, huwo kan mogbol le Daud ashan huow bi kun rajil ta binia ta melik. ²⁷ Gubal ma ayam al kelimo de kalaso, Daud ruwa ma rujal tou wa katulo miten Filistineen. Huwo jibo jilid ta Filistineen al ma tahiro de wa wodi humon kamil be adad tou le melik, ashan huwo bi kun rajil ta binia ta melik. Shaul kan zaojo Mikal binia tou le Daud. ²⁸ Zaman Shaul aino, wa huwo arufo ino Yahuwa ma Daud, wa Mikal binia tou, bi hibo Daud, ²⁹ huwo biga bi kafo shedid min Daud. Shaul biga adu ta Daud. ³⁰ Jesh ta Filistineen kan bi tala le harib ma Israel, wa fi kulu zaman al humon bi tala, Daud kan bi intasir akter min bagi jesh ta Shaul, isim tou kan biga maarof fi kulu makan.