¹ Filistineen kan limo jesh tumon le harib. Humon limo fi Sokoh, mahal ta Yahoza. Humon geni bain Sokoh wa Aziga, fi Afsi Dammim. ² Shaul wa rujal ta Israel limo wa geni fi wadi ta al Butm, wa humon amolo saf ashan bi haribo Filistineen. ³ Filistineen wogif fi jebel fi itijah wahid, wa Israeleen wogif fi jebel fi itijal al tani fi wadi kan bi ferigo baen humon. ⁴ Fi zol gawi tala min nus ta Filistineen, isim tou Joliyat min jet, tulo tou kan seta azro wa shibir (3 amtar). ⁵ Huwo indo tegiya min nihas fi ras ta tou, wa libiso derre musafah min nihas wozin toi khamsa alif shgil (57 kilogram). ⁶ Huwo kaman lifo kura tou ma nihas wa rumh min nihas baen aktaf tou. ⁷ Huwo kaman indo rumh kebir. Fugu habil bi sibo huwo jadao be teriga al kwais. Ras tou min hadid wozin tou saba kilojiram. Askeri al bi arofa turs tou bi wogif gidam tou. ⁸ Huwo wogi wa nadi be sout fok le Israel, "Malo intum tala le shakila? Ana min Filistin, wa yao ma khudam ta Shaul? Ikhtar takum wahid zol min intu wa kede huwo ja shakila ma ana. ⁹ Kan huwo akider shakila ma ana wa katulo ana, enna bi tala abiid takum. Lakin kan hazimo wa katulo huwo, intu bi tala abiid tanna wa akhdim enna." ¹⁰ Huwo kaman kelimo, "Ana bi ithada jeash ta Israel kulu alela. Rasulo takum rajil ashan bi shakila ma ana." ¹¹ Zaman Shaul wa Israeleen kulu asuma kalam al Filistini de wonuso, humon kefo shedid. ¹² Daud kan weled ta Yessa Afrata ta Beatlaham fi ard Yahoza. Yessa kan indo tamenia awlad. Yessa kan biga ajoz shedid fi zaman ta Shaul. ¹³ Talata min awlad ta Yessa al kubarin kan ruwa fi harib ma Shaul. Isim ta awlad de yao Eliab kebir tumon, Abinadab nimra itnen, wa talata tou yao Shamma. ¹⁴ Daud kan suker ta tumon. Talata al kubarin kan ruwa wara Shaul. ¹⁵ Daud kan bi daoro le Shaul wa kanam bi aino wara galamayat ta abu tou fi Beatlaham. ¹⁶ Fatra ta arobain yom Juliat kan bi tala sabah wa misa gidam jesh ta Israeli le shakila. ¹⁷ Yessa gum kelimo le weled tou Daud, "Shelo le akwana taki ephah (22liter) ta hubob al hamiro wa ashara eshat de, wa jere guwam le nuaskar tuomon. ¹⁸ Kaman wodi ashara gita ta jibna de le reis ta alif jesh. Aino akwana taki bi keni kef, wa jibo ma ita isbat be ino humon bikher. ¹⁹ Akwana taki ma Shaul wa rujal ta Israel kulu fi wadi ta Butm, fi shakila ma Falastineen." ²⁰ Daud fi yon al tani gum sabah bediry wa sibo zol bi harido galamayat de. Huwo shilo hajat ze ma abu tou wodi awamin. Huwo wosulo muaskar fi zaman al jesh bi tala istedad le harib be korerak ta harib. ²¹ Yala Israel wa Filistineen wogif saf le harib jesh gusad jesh. ²² Daud kan sibo hajat tou ma zol al bi hafizo hajat, wa jere le makan ta jesh ashan selimo akwana tou. ²³ Fi wokit al huwo bi wonoso ma humon, rajil al gawi, Filistin min Get, bi nadi huwo Juliat, tala min sufof ta Filistineen, wa wonoso nefsa kalam al huwo kan wonoso, Daud kan asuma. ²⁴ Zaman jesh ta Israel aino Juliat, humon kafo shedid wa jere min huwo. ²⁵ Rujal ta Israel bada wonoso fi baad tumon, "intum aino rajil al tala bara de? Huwo tala ashan ithada Israel. Melik bi wodi sarwa ketir le rajil al bi katolo Juliat, wa bi wodi binia tou ashan zaojo huwo, wa bi afi osra ta tou min daraib." ²⁶ Daud gum asalo le rujal al kan wogif gidam tou, "Bi amolo shuno le zol al bi katulo Juliat wa shelo fadia min Israel? De yato Filistin al ma tahiro bi aliso jesh ta Allah al hai?" ²⁷ Nas de gum keriro kalam al humon kan bi wonoso le huwo, "Shuno yao bi amolo le zol al bi katulo Juliat." ²⁸ Eliab aku tou al kebir asuma zaman huwo bi wonoso ma rujal de. Huwo tala zalan min Daud, wa kelimo, "Malo ita ja hini? Ita sibo agnam al besit de le muno fi beria? Ana arufu ita weled ta fetisho mashakil! Ita ja hini ashan bi aino shakila." ²⁹ Daud kelimo, "Ana amolo shono hasa? ana bess bi asalo!" ³⁰ Huwo gum tala min gidam ta aku tou wa ruwa le nas taneen wa asalo nefsa sual. Nas de juwabo nefsa sual al kan wori le huwo ³¹ Zaman asumao Daud bi wonoso zede, kalam de ruwa le Shaul, wa huwo nadi Daud. ³² Daud gum kelimo le Shaul, "Mafi zol kede geliba tou kafo min Filistini de; khadim bitak bi ruwa wa shakila ma Filistini de." ³³ Shaul kelimo le Daud, "Ita ma bi akider ruwa wogif ashan shakila ma Filistni de; ashan ita lisa suker, wa huwo zol ta shakila min zaman shabab tou." ³⁴ Lakin Daud kelimo le Shaul, "Khadam taki kulu yom bi aino Khurfan ta abu. Kan Ased aw Dub ja wa shelo jena ta khuruf, ³⁵ ana bi turujo wara tou wa hajimo huwo, wa ankizo min kasuma tou. Kan huwo gum ashan bi hajimo ana, ana gubudo min dikin tou, dugu huwo, wa katulo huwo. ³⁶ Khadam taki katulo Ased wa Dub. Filistini al ma gatao jelid tou bi geni ze wahid min itneen de, ze ma huwo ithada jesh ta Allah al hai ³⁷ Daud kelimo, "Yahuwa ankizo ana min dufur ta Ased wa ta Dub. Huwo bi ankizo ana min iden ta Filistini de." Shaul gum kelimo le Daud, "Ruwa, wa kede Yahuwa kun ma ita." ³⁸ Shual Daud be gumash ta harib. Huwo kuto tagia min nihas fi ras tou, wa huwo kati duss tou be deree. ³⁹ Daud gum arufa seaf ta Shaul fi ketif tou. Lakin huwo ma agder daoro, ashan huwo ma wolifo hajat de. Daud gum kelimo le Shaul, "Ana ma bi agder ruwa wa shakila ma hajat de, shan ma deribo ana." Huwo gum agila hajat de. ⁴⁰ Huwo shelo asaya tou wa legeto khansa hujar abo amles min jedwal ta fi wadi; huwo kutu fi jeba tou al min jelid. Huwo shelo Mukulaa tou fi iden wa itajih le Juliat. ⁴¹ Juliat kan ja fi gidam ta Daud, ma zol al bi arufa silah fi gidam ta tou. ⁴² Wokid Juliat aino Daud, huwo aliso huwo, ashan Daud kan suker, wa ashkar, wa wasim. ⁴³ Juliat kelimo le Daud, "Hal ana kelib, ashan ita bi ja le ana be hujar?", huwo gum laano Daud be isim ta alliha tou. ⁴⁴ Juliat gum kelimo le Daud, "Tal le ana, wa ana bi wodi jesim taki le tiyor ta sama wa le haiwanat ta gaba." ⁴⁵ Daud rudu le huwo, "Ita bi ja le ana be saef, wa rumh (harba), wa daraga. Lakin ana bi ja le ita be isim ta Yahuwa rais jesh ta malikat, Illah ta jesh ta Israel, al ita bi ithada huwo. ⁴⁶ Alela Yahuwa bi wodi le ana intisar did ita, wa ana bi katulo ita wa gata rass taki min jesim taki. Alela ana bi wodi jusas ta asakir ta Filistinen le teyor ta sama wa wohosh ta ard, ashan ard kulu kede arufo ino fi Allah fi Israel, ⁴⁷ wa nas al limo hini bi arufo ino Yahuwa ma bi wodi intisar be saef aw rumh. Ashan shakila de ta Yahuwa, wa huwo yao bi wodi ita fi iden tanna." ⁴⁸ Zaman Daud aino Juliat bi ja le huwo , huwo jere guwam le addo ashan bi gabilo huwo. ⁴⁹ Daud dakalo iden tou fi shanta tou, shilo min fugu hajer, kutu fi habil al bi arufa hajer fugu, wa lifo, durubo Juliat fi wusa (jabha) tou, wa huwo waga tehet be wusa. ⁵⁰ Daud hazimo Juliat be habil wa hajer. Huwo durubo Juliat wa katulo huwo. Daud kan ma indo seaf fi iden tou. ⁵¹ Daud kan jere wa wagif fi ras ta Juliat wa shelo seaf ta Juilat, wa talao min juwa tou, katulo huwo, wa gata rass tou bara. Zaman Filistineen aino zol tumon al gawi mutu humon jere. ⁵² Biga rujal ta Israel wa Yahuza gum be kure ta shakila, wa turujo wara ta Filistineen lahadi bidaya ta wadi wa abuwab ta medina ta Akron. Jusas ta Filistineen fi sika lahadi Shaaraim, kaman fi sikat ta Gass wa Akron. ⁵³ Nas Israel rija min turuju Filistineen, wa nahabo muaskar tumon. ⁵⁴ Daud shelo rass ta Juliat wa jibo lahadi Orshalim, lakin huwo hafizo adawat ta harib fi khema tou. ⁵⁵ Zaman Shaul aino Daud tala ashan bi ruwa shakila ma Juliat , huwo kelimo le Abner, kaid ta asakir tou, "Abner, shab de jena ta mono?" Abner kelimo, "Ze ma ita hai, ya melik, ana ma arufu." ⁵⁶ Melik kelimo, "Asalo beal al bi arufu, weled de jena ta mono." ⁵⁷ Zama Daud rija min katolo ta Juliat, Abner shelo huwo, wa jibo huwo fi gidam ta Shaul ma ras ta Juliat fi iden tou. ⁵⁸ Shual kelimo le huwo, "Ita weled ta muno?" Daud juwabo, "Ana jena ta khadam taki Yasse ta Beatlaham."