¹ Hasa wokit tani, Naboth bita Jezreelitiyun indu jinena ta inab fi Jezreel, gerib ma kasra bita Ahab, melik bita Samaria. ² Ahab wonusu le Naboth, gal, "Wodi le ana jinena inab bitaki de, ashan Ana bi kutu ze mahal zira ta khodruwat, leanu huwo gerib ma bet bitai. Fi bedil, Ana bi wodi le inta jinena inab al kwes, au, inta kan inta der, Ana bi dafa le inta keima tou be gurus." ³ Naboth Juwabu le Ahab, "Keli Yahwa manau inu Ana bi wodi miras(wirasa) bita judud tai le inta. ⁴ "Yala Ahab rua fi kasra bitou be zil le anu juwab al Naboth al Jezreel wori le huwo zaman huwo gal, "Ana ma bi wodi miras bita judud bitai le inta." Huwo nam fi seriri bitou, galab wusa tou, wa aba ashan bi akulu ai akil. ⁵ Mara tou Jezebel ja le huwo wa kelimu le huwo, "Malu inta ma murta, lahadi inta ma bi agder akulu ai akil? ⁶ Huwo Juwabu le hiya, "Ana kelimu le Naboth ta Jezreel wa kelimu le huwo, 'Wodi le ana jinena bitak de be gurus, au huwo kan kwes(mohim) le inta, Ana bi wodi le inta jinena inab tani,' Bad dak huwo juwabu ana, 'Ana ma bi wodi jinena inab bitai de le inta,"' ⁷ Yala Mara tou Jezebel juwabu huwo, "Hal inta ma yau lisa bi hakimu Israel? Gum fok wa akulu; keli inta kun farhan. Ana bi agder agna jinena inab bita Naboth al Jezreelii de le inta." ⁸ Bad kida Jezebel katabu juwabat fi isim ta Ahab, khatamu be khitim baris, wa rasulu le siyuk wa nas al ganiyanin al bi geni ma huwo fi ijtimahat, wa al sakinin gerib ma Naboth. ⁹ Hiya katabu fi juwabat, gal, "alinu siam wa kutu Naboth gidam nas. ¹⁰ Kutu kaman itnin rijal al ma muhtarimin(ma kwesin) ma huwo wa keli umon ashad did huwo, gal, 'Iinta laanu Allah wa melik."' bad dak shilu huwo bara wa durubu huwo be hujar hata al mut. ¹¹ Yala rijal bita medina, siyuk wa nas al ganiyanin al sakinin fi medina(asima) bita Naboth, amulu ze Jezebel wori le umon, ze katabu fi juwabat al hiya rasulu le umon. ¹² Umon alinu siam wa umon kutu Naboth fi gidam ta nas. ¹³ Rijal al itnin al ma muhtaramin del ja wa geni gidam Naboth; umon shahadu did Naboth fi gidam nas, gal, "Naboth laanu Allah wa melik." bad dak umon shilu huwo bara min medina wa darabu huwo hata al mut. ¹⁴ Bad dak siyuk rasal kalam le Jezebel, gal, "Darabu Naboth wa huwo mat." ¹⁵ Yala zaman Jezebel asuma inu darabu Naboth wa mat, hiya kelimu le Ahab, "Gum fok wa shilu mumtalakat ta jinena inab bita Naboth bita Jezreel, al huwo aba ashan bi wodi le inta be gurus, leanu Naboth ma hai, lakin mat." ¹⁶ Zaman Ahab asuma inu Naboth mat, huwo gam fok wa masha le Jinena inab bita Naboth bita Jezreel wa shalu mumtalakat tou. ¹⁷ Bad dak kalam bita Yahwa ja le Elijah bita Tisfbite, gal, ¹⁸ "Gum fok wa rua gabilu Ahab melik bita Israel, al geni(sakin) fi Samaria. Huwo fi jinena inab bita Naboth, huwo rua ashan bi shilu mumtalakat tou. ¹⁹ Lazim kede inta wonusu le huwo wa kelimu inu Yahwa gal, 'Inta katulu wa kaman shilu mumtalakat?' Bad dak inta bi wori le huwo inu Yahwa gal, 'Fi mahal al kilab bi alasu dom bita Naboth, kilab bi alasu dom bitak, nam dom bitak.'" ²⁰ Ahab kelimu le Elijah, "Inta ligo ana, adu tai? Elijah juwabu, Ana ligo inta, leanu inta biyu nfesak le Yahwa ashan amulu shar fi ena ta Yahwa. ²¹ Yahwa kelimu de le inta: 'Ainu(suf) Ana bi jibu karisa le inta wa bi istahilik(abulau) wa gata min Ahab bita kulu kulu iyal zakar wa abid wa rijal hur fi Israel. ²² Ana bi amulu usura taki ze usura bita Jeroboam weled bita Nebat, wa ze usura bita Baasha weled bita Ahijah, leanu inta kutu ana zalan wa shilu Israel le khatiya.' ²³ Yahwa kaman wonusu an Jezebel, gal, 'Kilab bi akulu Jezebel jambu hoz bita Jezreel.' ²⁴ Ai zol bita (al tabi le) Ahab wa mutu fi medina, kilab bi akulu; wa tiyur al fi jou bi akulu ai zol al mutu fi mazra(hugul).'' ²⁵ Mafi zol ze Ahab, al bau(biyu) nefsu ashan amulu shar fi ena ta Yahwa, al mara tou Jezebel dakalu(woridu) le khatiya. ²⁶ Ahab amulu hajat ma kwes le asnam al huwo bi tabau, bes ze Amoritiyun kulu amulu, Del al Yahwa talau gidam bita shab(abna) Israel. ²⁷ Zaman Ahab asuma kalamat de, huwo sheretu gumasat bitou wa libisu gumasatal be suwal fi jisim tou wa sum, wa nam be gumasat bita suwalat wa ma murta. ²⁸ Bad dak kalam bita Yahwa ja le Elijah bita Tishbite, gal, ²⁹ Hal inta ainu Ahab nezilu nefsu kef gidam ana? Leanu ashan huwo nezilu nefsu gidam ana, Ana ma bi jibu karisa al jai fi ayam bitou; huwo bikun fi zaman(ayam) bita iyal tou al ana bi jibu karisa le usura tou."