¹ A ta cim dzuɓ tliiti mbǝtlǝŋǝiɗi a lǝǝɓ namboŋ, she a vǝrshi tlyaaghǝnni tǝ vartǝ a dulgam mǝndǝŋsǝ ɓuruk tǝǝ ndǝr tǝ fuuɗ ko gonngǝnni gyo. ² A shinshi tǝ nywali tǝ fuu zarsǝ vik guŋndu Cognvon tǝ fuuɗ mǝn gonngǝnni. ³ A wulshi tu, ''mbin ngǝtn won hŋ nǝ durghǝ righǝnnes hŋ, nǝ shirǝŋaa nǝ jigha wurɓa, nǝ dugha, nǝ wurɓa, nǝ laai gon ɗa ɗaa. ⁴ Ko yan nǝ dǝni gyo ɗaŋ kya ndaghai naan ɗa ɗan she dzaŋ gi ɗaŋ kya ga dǝnneshi. ⁵ Ko teɗo kǝn ya kaɓki hŋ, yan ka ga yatleshi, posǝn guɗ guɗ kǝ yatleshi a yasǝŋ wan, yan nguŋ wo tlyaki zha mǝn a dulgama wasǝŋ''. ⁶ Kǝnnda tǝǝ taa nywali ngyelaŋ a mǝri yatl, cii fuushi vik wusni tǝ ndǝr tǝǝ fuuɗ mǝn gonngǝnni ko teɗo. ⁷ Yan murghǝ guŋndǝ kǝ Galilii, wum koni ɗaŋ a yigha riighǝni, she a taa vui, nǝ duryo tu gya gon tǝǝ taa ya wultu Yohanna murghǝ baɓtisma a shishiɗi a giɓkǝ mǝn mǝǝskǝn, ⁸ tu caa wultu Iliya a mbwaaɗi, saɗ ɗaɗa gya gon tu murghǝ shinngǝnni Cogn gon won kǝ ɓaadǝŋ a shishiɗi. ⁹ Hiridus wul tu, ''Ma ta dzak gaam Yohannai, beɗ tǝ gi gin nǝ nuu nguŋ mya wum ngǝshi gya gini a dulgamashi yo?'' she a mbǝr tǝ tu tǝ yeltǝ. ¹⁰ Ɗaŋ mǝn shinngǝnes tǝǝ taa sushiɗi tǝǝ fuutǝ koni ɗaŋ tǝ fii. She a taa nyomshi washi, tǝ taa tlii nǝ vik muri abyatl won ɗaŋ sǝǝm wos tu Bersheda. ¹¹ Beɗ tǝ gi, zarsǝ monnda ɗaŋ tǝ wumi cik, she tǝ taa laaɓtǝ, she a kaɓshi washi tǝ polghǝnni, a taa fuushi vik guŋndǝ Cogn, she fuuɗ mǝn gonngǝnshi washi. ¹² To, dzaŋ a taa man ndaghǝnni, she dzuɓ tliiti mbǝtlǝŋǝi tǝ man ɓastǝ, tǝ wul tu, ''shinndar zarsǝn monnda tǝ tliuba gya mǝǝrghǝ yatl tǝ gya gi a vik laŋshi tǝ ŋal ngǝtn cighǝnni tǝ gya lǝǝɓ mbuɗ, nǝ duryo tu migha lǝǝɓ yo ɗaŋ yi a laŋshi ngǝtn wos.'' ¹³ Beɗ tǝ gi, a taa wulshi tu, ''kyani vǝraŋshi ngǝtn yo ɗaŋ ta cii.'' Tǝǝ wul tu, ''Mǝǝ yir ngǝtn yo ɗaŋ a laatsǝ guruŋ dugn nanndam tǝ gyaas mbǝtlǝm hŋ, she yan maa tlǝǝn ɗyiɓ ngǝtn cighǝn zarsǝ mǝn ɗi ɓuruk.'' ¹⁴ (Mǝn moncivtǝ taa wul tǝ fii zarsǝ zarsǝ zaŋngu nanndam.) ''A wul mǝri dǝnwos tu, ''Gan shi tǝ tsǝtn dǝni dǝni ɗaŋ taa naa ɗaŋ tǝ fii tashi nanndam nanndam. ¹⁵ She tǝǝ ta fi cik, tǝ gaa zarshes tǝǝ ta tsǝtni. ¹⁶ A taa nyom dugn guruŋshi nandamni tǝ gyaas mbǝtlǝmi, a taa yal Tsogn gaami, a taa gǝǝm mbuuni ghai, tsalii njetn njetn, she vǝr mǝri dǝn woshes tǝǝ gaa zarshes mǝn monndai a ken wasǝŋ. ¹⁷ Ɓuruk wasǝŋ tǝ taa cii hal kǝǝmshi vwaa yughǝi, kuŋni a ɓan naa ɗa, tǝǝ taa nyom hal tǝ fii buŋli dzuɓ tliiti mbǝtlǝm. ¹⁸ A ta mbwaaɗi a kili won ɗaŋ Yesu yan gamas a taa ya karaghǝn Cogn, gya mǝri dǝnwos tǝ ta yi ɗa ɗani, A taa ceɗshi cigha wulghǝnni tu, ''Zarsǝn monndan caa wul tu mya nǝn mi nǝ nuu?'' ¹⁹ Tǝǝ ta suɗa tu, Yohanna murghǝ baɓtisma. Beɗ tǝ gi gya gon caa wul tu Iliya, saɗɗaɗa gya gon caa wul tu, nǝ namboŋ a giɓkǝ mǝn shinngǝnni Cogn kǝ ɓanndǝŋi ghuŋ a shishiɗi. ²⁰ Kǝnnda a wulshi tu.. Beɗ tǝ gi kyaani kya wul gwan tu minǝ nuu?'' Biturus suɗa tu, ''Ɓorghǝnni kǝ Cognvon. ²¹ Beɗ tǝ gi a ta caa yir nyaŋ nyaŋ tu tǝ fuu gin gon won hŋ, ²² cigha wulghǝn tu, ''Ŋaa zaar wo buŋ mari mari monnda, mǝn varǝŋsǝ yatl, tǝ gya dǝllǝŋsǝ pǝris tǝ malamshi ngǝtn ɗaŋ Musa dlyaaɗ, taa nyaŋngas tǝ, taa ɗuuti, kǝnnda dzaŋ kǝ mayi taa shishir ti.'' ²³ Kǝnnda a wulshi ɓuruk wasǝŋ tu, ''konu ɗaŋ caa suu tǝ laaɓǝm, she tǝ nyaŋngas gamas, kǝnnda tǝ nbii ghǝmmbǝli wos ko dzaŋ gyo tǝ laaɓǝm. ²⁴ Ko gyo ɗaŋ ya wul tu wo vuum raai woshi wo naa ti, beɗ tǝ gi ko gyo ɗaŋ ya naa raai woshi nǝ duratn, wo vuum ti. ²⁵ Mbuunes yi ɗo ɗaŋ zaar tǝ tuu ɗǝgnǝi ɓuruk, kǝnnda tǝ vuum gamas hŋe? ²⁶ Ko gyo ɗaŋ ya ci ndzuunatn tǝ vietn, yan nguŋ Ŋaa zaarbwo ci dzuun wos kǝn ya nan a giɓjǝ zǝkkǝnni wos, tǝ zǝkkǝnni kǝ Daa, tǝ kǝ zhipti shinngǝni kǝ ndzǝkkǝnni. ²⁷ Beɗ tǝ gi mya wul ki jom jomni tu, gya gin cigha dlǝǝrghǝnni ɗuui hŋ, kǝnnda tǝ yel guŋndu Cogn von.'' ²⁸ Ɗaŋ a wul fi mbuɗkǝn tan tan a kaar vi gya gin ɗaŋ Yesu wulǝn, a nyom gya Biturus tǝ Yohanna tǝ Yakuɓ a ta tai wur tǝǝ kara Cognvon. ²⁹ Ɗaŋ cigha karaghǝnni Cognvon she tsogn ken wos sui, gya luu wos tǝ taa mbai pak pak. ³⁰ Kurum cik, she zarsǝ mbǝtlǝm tǝ ta yigha wulghǝn vi cimshi, gya Musa tǝ Iliya. ³¹ Gyo ɗaŋ tǝbtaa mbwaaɗi tǝ zǝkkǝn monnda. Tǝǝ ta wul vi a dulgam gaaghǝn wos ɗaŋ naa ɗaŋ tǝ ɓanti guɓkǝ Urshelima. ³² Gya Biturus tǝ gya gyo ɗaŋ tǝ yi cimshi kuci a taa ɗuushi washi monnda, beɗ tǝ gi ɗaŋ tǝ byatli a kuces, tǝ taa yel zǝkkǝ woshi tǝ zarsǝ mbǝtlǝmi gya gu ɗaŋ tǝ ta yi a dlǝǝrghǝnni cimshi. ³³ Ɗaŋ tǝ ta yi a gaaghǝn Yesui, Biturus ta wul Yesu tu, ''Murghǝ dǝn, a ndara ɗaŋ mii ɗa ɗuuni. Dlǝǝri mǝ nal vin ɓuɓ mayi, namboŋ nǝ gwaa, nambiŋ nǝ kǝ Musa, namboŋ nǝ kǝ Iliya. (A taa yisǝŋ ngǝtn yo ɗaŋ ca wul hŋ.) ³⁴ Ɗaŋ cigha wulghǝnni cighǝi, she kurvon won ta man dlǝpm shi washi, vǝrtǝ ye ɗuushi washi monnda, ɗaŋ kurvonnes ta dlǝpmshi washi. ³⁵ Yer won taa wulɗi ɗa dlek kurvoni tu, ''Gin nǝ kunetn, gyo ɗaŋ ta bwaati, sǝǝn tǝ kǝǝm.'' ³⁶ Ɗaŋ yeres ta wul vieshi, she tǝ taa tu Yesu ngǝtnwos. Tǝǝ taa ngaɓ vi washi kelak, tǝ fuu gon hŋ a mbuɗkǝni gya gi a ngǝtn yo ɗaŋvtǝ yeli hŋ. ³⁷ To ɗaŋ lǝǝɓ ta tlaai, ɗaŋ tǝ shiɗi ɗa wuri, zarsǝ monnda tǝ taa man ɓastǝ. ³⁸ Kurum cik, she gon a dlek zarshes a gǝǝm vi tlya tlyaa tu, ''Malǝm, mya karaghǝ a yel gwanndǝ kunetn ci nǝ ŋaatn teŋraŋ. ³⁹ Yeli, kuskǝ zhipti caa nda ɓastǝ she tǝ gǝǝm riŋ kurum cik, yi catǝ tǝ ɗǝǝl riktsǝk riktsǝk vi wos yi fi fufuki. ca gaa tǝ swaaɗ hŋ hal she ya ngaa tǝ kuskǝ wus. ⁴⁰ Mǝ kara mǝri dǝn wa tǝ nyolar ti, beɗ tǝ gi tǝǝ kǝǝm hŋ.'' ⁴¹ Yesu suɗa, a wul tu, ''kyani wusuli ɓenndǝmi ɗaŋ kii tǝ caaghǝn raa hŋ, ma gǝrǝni wur cimkii kǝnnda mǝ dluu vwa tǝ kyaaniyo? lǝǝr kuniwaai ɗi ɗuun'' ⁴² Ɗaŋ kunes cigha manngǝnɗi she mǝnndes mbi tǝ ngaa yatl, she caa kunes yi ɗǝǝl riktsǝk riktsǝk. Beɗ tǝ gi Yesu ta dlwaa yer kuskǝ zhiptis, fuuɗ kuneshi, a taa sular tǝ daagos mǝn. ⁴³ She ɓuruk wasǝŋ a taa kosarshi tǝ vartǝ kǝ Cogn. Kiliyo ɗaŋ a yi ɓashi kosarghǝnni a ngǝtn yo ɗaŋa taa yagha fighǝnni, she a wul mǝri dǝn wos tu, ⁴⁴ ''Dlǝǝrǝn ni, vi gya gin tǝ ndakibwaani kǝǝm shoŋ shoŋ: Ta vǝr vi Ŋaa zaari a taas kǝ zarsǝ.'' Beɗ tǝ gi, tǝ taa mbi dek vin hŋ. ⁴⁵ A ta yi nǝ waaɗkǝni ɓashi, nǝ durghǝ gi tǝ taa yisǝŋ dei wos hŋ, ko ɗaŋ tu yi cighǝi, nǝ durghǝ vǝrtǝ tǝǝ ta kǝǝm tǝ ceɗ tǝ ɗa nǝ ves ɗaŋ a wuli hŋ. ⁴⁶ She sǝrɗkǝn yer ta ndai a dlei wasǝŋ tu nǝ nuu ghuŋ wo naa nǝ kǝ vares a dlei wasǝŋ ŋo. ⁴⁷ Beɗ tǝ gi, ɗaŋ Yesu a yisǝŋ ɓitalghǝni wasǝŋǝi, a mbi ŋaa ŋaa won,ba gaa ti a laŋsǝ wos, ⁴⁸ she a wulsi tu, ''konu ɗaŋ ya kaɓ ŋaa ŋaani tǝ polghǝnni a giɓkǝ sǝǝmatn, a kaɓmi tǝ polghǝn, konu ɗaŋ ya kaɓmi, a kaɓni muryo ɗaŋ a shinǝm ɗi. Yan tu konu ɗaŋ cighǝ njwati a giɓi wan ɓuruk yani ghuŋ ci kǝ vares. ⁴⁹ Yohanna suɗa tu, ''Murghǝ dǝn, Mǝǝ yel gon ɗaŋ cigha nyolarghǝn mǝnndǝŋsǝ tǝ sǝǝm wa, she mǝǝ ɗaktǝ ghai nǝ duryo tu caa laaɓmii ɗaŋ hŋ. ⁵⁰ ''Ɓak ɗakti ghai hŋ, Yesu wul cik, ''yan tu konu ɗaŋ a nyaŋngaskǝ hŋ cinǝ gwaa.'' ⁵¹ Ɗaŋ mbuɗkǝni taaghǝni Tsogn wos ta ndokghǝi ɗi, a ta gaa gamken wos taŋ taŋ tǝ tlii Urshelima. ⁵² A taa shin mǝn shinngǝnni tǝ ndatǝ kǝn, she tǝ taa tliu a ŋaa yatl kǝ mǝn Samaraya won, tǝ ɓumtsǝ tǝ koni mǝni. ⁵³ Beɗ tǝ gi, mǝnes ɗa ɗan tǝ taa kaɓtǝ tǝ polghǝni hŋ, nǝ duryo tu a ta gaa gam kǝn woshi caa maan Urshelima. ⁵⁴ Ɗaŋ mǝri dǝn wos gya Yakuɓ tǝ Yohanna tǝ yel cik she tǝ wul tu, Daadǝn, kya suu mǝ caa wuɗ tǝ shiɗi gaami tǝ man datsǝshi washi ya?'' ⁵⁵ Beɗ tǝ giba ta sutǝ dlwaa shi yer. ⁵⁶ She tǝǝ ta latsǝi a ŋaa yatli gon. ⁵⁷ Ɗaŋ cigha riighǝni a datǝpm,gon won a wul tǝ tu, ''maa laaɓkǝ ko kya kǝǝn teɗo.'' ⁵⁸ Yesu wultǝ tu, ''Shewai cii tǝ giir wasǝŋ. yetli cii tǝ vin wasǝŋ, beɗ tǝ gi Ŋaa zaar ci tǝ lǝǝɓ yo ɗaŋ wo gaa gam wos ghai hŋ.'' ⁵⁹ Kǝnnda a wul gon ɗa tu, ''laaɓǝmɗi'' Beɗ tǝ gi a wul tǝ tu, ''Daadǝn gaam mǝ tlii, mǝ tlǝn gii daagǝti keni gham. ⁶⁰ Beɗ tǝ gi a wultǝ tu, ''Gaa mǝn mǝskǝn tǝ gi mǝn mǝskǝni wasǝŋ.'' Beɗ tǝ gi kyan gwaa tku avŋaalar vik guŋndǝ Cognvon ɗuun mel tǝ ɗongai.'' ⁶¹ Kǝnnda gon saɗ ɗaɗa, a wul tu, ''Maa laaɓkǝ, Daadǝn, beɗ tǝ gi gamken mǝ tlǝn wul mǝn dǝnatn tu maa tlii.'' ⁶² Yesu sutǝ ɗa tu, ''Gon won ɗa hŋ, ɗaŋ ya ngaɓ jir galtsǝi kǝnnda caa yal kaar, ɗaŋ a tuli nǝghǝ guŋndu Cognvon.''