¹ Ɗa kaari Yesu tǝ mǝǝri dǝn wos dzuɓ tliiti mbǝtlǝm tǝ ngyelaŋ s gya dǝllǝŋsǝ tǝ mǝrǝ yaatl mari mari ci ŋal tǝ fuu vik wusni a dlugaam guŋndu Cognvon. Dzuɓ tliiti mbǝtlǝŋes tǝ tayi cimtǝ, ² guɗi gyaa gon ɗaŋ Yesu ta fuuɗshi gya kusuŋsǝ mǝnndǝ tǝ gya gonngǝ tǝ ta yi cimshi: A giɓi waasǝŋ citǝ Maremu gyo ɗaŋ caa cim tǝ tu Magadaliya, gii ɗaŋ a nyolar mǝnndǝŋsǝ ɗi ɓastǝ wottsǝmai ɓastǝ. ³ Tǝ Yewaina gǝɗi Kuza murghǝ laaɓkǝn kaarghǝ Hiridus, tǝ Suzana tǝ beɗ guɗi gyagon monnda, gya gon ɗaŋ a giɓkǝ ngǝtn taas waasǝŋ, tǝ vǝr nǝ durghǝ waasǝŋ. ⁴ Ɗaŋ tǝ ta jwaam gutuli zarsǝ monda, durghǝ yo tu zarsǝ tǝ taya man yaatl yaatl durghǝ yo tu tǝ yel Yesu, a fuu shi vii a dulgaam ngǝtn kuuɓkǝn. ⁵ Murghǝ kitn won a tlii tu tǝ kǝɓ tursǝ ngǝtn wos. Ɗaŋ cigha keeɓkǝni, turshi gyagon tǝ shii gha datepm, she zarsǝ tǝ butughǝi, gya yetli tǝ ɗaa gyagon tǝ cii. ⁶ Gyagon tǝ shii gha dul puus ɗaŋ yaatl kai monnda hŋ, ɗaŋ tǝ mbwaai ɗi, tǝ nguɓ luuɗkǝn, she kyaaɗ tǝ kuŋǝi durghǝ yo tu tǝ tu damci hŋ. ⁷ Gyagon tǝ shii a giɓkǝ yiɓka, gya yiɓkas gya yiɓkas tǝ luuɗ vii namboŋ tǝ gya turshes ɗaŋ tǝ kǝɓii, tǝ kaaɓshi waasǝŋǝi har nǝ yo ɗaŋ tǝ ɗyaa tǝ luuɗ ɗa hŋ. ⁸ Beɗ tǝ gii turshi gyagon tǝ shii gha yaatl ndaraani, tǝ luuɗii nyelaaɗ, tǝ fi tsǝǝrii monnda hal a moɓ tǝm kuri. Ɗa kaari ɗaŋ Yesu kon ngǝrshi gya ginnii, a sǝǝɗ vii a wul tu, "Ɗeɓaɗ gyo ɗaŋ citǝ kǝǝm ngǝ wumngǝn, tǝ wumi." ⁹ Mǝǝri dǝn wos tǝ ceɗ tǝ fuushi dyak yerghǝ vii gin. ¹⁰ A wul tu, "Kyaani ghǝn tǝ vǝr ki yisǝŋngǝn sǝǝr kǝ guŋdu Cogn. Beɗ tǝ gii, nǝ ɓanci zarsǝ mya wul vii a giɓkǝ yerghǝ vii durghǝ tu ko caa yeli baa ta yisǝŋ hŋ, ko caa wumi ta tu gaami hŋ beɗ." ¹¹ Ɗaŋngǝni gin ngǝn nǝ dyak kǝ yerghe viin: tsǝǝres nǝ vik Cogn. ¹² Turshi gyo ɗaŋ tǝ vunnda gha datǝpm nǝ zarsǝ yo ɗaŋ tǝ wum vik Coghǝi, she ɗa kaari shetan man man mbii viieshi a giɓkǝ raa waasǝŋ durghǝ tu tǝ caa raai tǝ tu vumngǝni hŋ. ¹³ Gyagii a dulghǝ puushii nǝ gyagyo ɗaŋ ǝŋ caa wum viieshii tǝ kaɓi tǝ polghǝni. Beɗ tǝ gii citǝ tlǝrti vniuŋ; caaghǝn raa waasǝŋ nǝghǝ dǝǝl jwaatn; a kili ghǝ diiɓkǝni caa yi ndaaɗi. ¹⁴ Turshi gyagyo ɗaŋ tǝ vunnda a giɓkǝ gya yiɓka nǝ zarsǝ yo ɗaŋ tǝ wum viieshii, bǝɗ gii ɗaŋ tǝ ci ken tǝ riighǝni, she tǝ gaa vuughǝni tǝ tughǝni tǝ wumngǝn wusǝŋngǝn kǝ ɗǝghǝn tǝ mbii raa waasǝŋǝi she a man tu guuri waasǝŋ aa nyaŋ hŋ. ¹⁵ Beɗ tǝ gii, turshi gyagyo ɗaŋ tǝ vunnda a yaatl ndaraani, gyagin nǝ zarsǝ gyagyo ɗaŋ tǝ wum viieshii tǝ raaghǝ mbuni tǝ ngaɓtii tlyaa tlyaa, fi guurii tǝ morghǝn raa tǝ dumngǝn vwaa.̇ ¹⁶ Daŋngǝni gon yi ngaɓ kuɓka kǝ wuɗ dlǝpm tii tǝ koɗ ko caa tii gǝs galaŋ hŋ. A bamvi gii she tǝ gaa tii a lǝɓ tsǝtnngǝn wos, durghǝ tu ɓurug muryo ɗaŋ yaa ndaɗi tǝ yel mbaaghǝn woshii. ¹⁷ Ngǝtn won yinǝ waaɗi ɗaŋ wo naa bǝǝrghǝnii hŋ, ko sǝǝr won ɗa ɗaŋ wo naa yisǝŋngǝŋǝi a lǝɓ yaali hŋ. ¹⁸ Sǝǝn kǝǝm mbun mbun, muryo ɗaŋ yir ta daɗag tǝ mǝn ngai monda, gyo ɗaŋ yirr hŋ, ko gii ɗaŋ ca ɓital tu yirrii ta kaɓii ɓastǝ." ¹⁹ She naana gos tǝ gya yesashi tǝ man ɓastǝ, bǝɗ tǝ gii tǝ ɗyaa tǝ man ɓastǝ mel hŋ nǝ durghǝ gutuli zarsǝ. ²⁰ She gon wul tǝ tu, Naana gwa tǝ gya yesa cigha dlǝǝrghǝn ɓidlǝm, caa suu tǝ yelghǝ." ²¹ Beɗ tǝ gii a suɗa, a wul tu, "Naana gǝn tǝ gya yesatn nǝ gyagyo ɗaŋ caa wum vik Coghǝi tǝ fi ngǝtn yo ɗaŋ caa kon." ²² Dzaŋgon Yesu ta ndai giɓ zhuŋ ngǝ zha tǝ mǝǝri dǝn wos, she a wulshi tu, dlaarǝnnii a te dlari ghǝ gǝrǝŋ zhaes." She tǝ nguɓ tlǝghǝn durghǝ tu tǝ dlaarii. ²³ Beɗ tǝ gii ɗaŋ cigha dlaarghǝni she ata ndai kuci. Dǝllǝ ghǝ yetar von won a ta nguɓ vaɗkǝn ɗi ɗa gǝrǝŋ zhaes. Kyaaɗ she zhirgies ta nguɓ yugnngǝn tǝ zha. Tǝ ta ndai a vuughǝni. ²⁴ She mǝǝri dǝn ngǝ Yesui tǝ ta man ɓastǝ tǝ shisher tǝ gha kuci, tǝ wul tǝ tu," Daadǝ! Daaden! Maa naa ɗaŋ mǝǝ mǝǝshii!" A ta shishi dlwaa yer yetares tǝ maanndǝ zhaes, she tǝ dlǝǝri, lǝɓ ta mwaali kelak. ²⁵ She a wul shi tu, "Caaghǝn raa waan ɗo? "She vǝrtǝ ta ngaɓ shi waasǝŋǝi. A ta kwasarshi she tǝ nguɓ ceɗkǝn dlǝŋsǝ waasǝŋ. Gin nǝ nuu, gyo ɗaŋ hal wo dlwaa yer yetar tǝ zha tǝ ndǝǝr tǝ sǝǝ tǝ kǝǝmo? ²⁶ Tǝ tlii te yaatl kǝ Gerasinawa, gyo ɗaŋ yi mel tǝ Galili. ²⁷ Ɗaŋ Yesu ndai ɗa yaatli, she murwonǝn yaatlies ɗaŋ citǝ mǝnndǝŋsǝ a ta tsal tǝ. Aa ngaa laai mures ca caa lǝŋsǝ hŋ. Ca tsǝtn dǝn hŋ ɓeɗ. A bamvii gii ca tsǝtn nga gya vii giir. ²⁸ Ɗaŋ a yel Yesu a gǝm riiŋ tlyaa tlyaa a tlǝn zuɓni a ken wos wul tǝ tǝ yer tlyaa tlyaa tu, "Kyaa suu aa fi mǝni wurii, Yesu Ɲaa ghǝ Cogn Murghǝ Zhimnǝn? Mya karaghǝ ɓak vǝrǝm forǝm hŋ." ²⁹ Durghǝ Yesu aa ta caa mǝndǝŋshies tǝǝ nywaali ɗi a mures. Durghǝ tu mǝnndǝŋshe taa tlya tǝ ngaɓkǝni, ko caa naaɗ tǝ ni tǝ maraŋgusa tǝ ndǝr tǝ lyaa tii, ca tlaa maraŋgusashii, she kuskǝ mǝnndes ca mbi tǝ tlǝǝrii dlǝk ndǝǝr. ³⁰ She Yesu ceɗ tǝ tu, "Sǝm waa tu nii?" She a wul tu, "Mi monnda," durghǝ tu mǝnndǝŋshes taa ta ndai monnda ɓastǝ. ³¹ Tǝ ci ken tǝ karaghǝn wos tǝ shinshi waashii a giir shoŋnii hŋ. ³² Dǝllǝ ghǝ gutuli kaŋshi dǝn tǝ ta yi ɗa ɗan ɗaŋ cigha lyaaghǝn waasǝŋ. Mǝnndǝŋshies tǝ ta kara Yesu tǝ gaa shi tǝ tlǝn ndai a kaŋshi dǝnes. She a ta vǝrshi dǝǝl. ³³ Mǝnndǝŋshies tǝ ta nywaali a mures tǝ shii a kaŋshi dǝnes. She kaŋshi dǝnes tǝ ta shii ɗi a gǝŋcigǝŋ tǝ shii ɗa gǝrǝŋ zhaes tǝ mǝǝshi. ³⁴ Ɗaŋ mǝn lyaaghǝn kaŋshi dǝnes tǝ ta yel ngǝtn yo ɗaŋ a ta tlaa ɗi, she tǝ ta kiri tǝ tlǝn fuu zarsǝ yo ɗaŋ ci ɗa giɓ yaatli, tǝ yaatli gya gyo ɗaŋ ci mel tǝ yaatles ngǝtn yo ɗaŋ a tlaa ɗi. ³⁵ She zarsǝ tǝ ta nywaal ɗi tǝ yel ngǝtn yo ɗaŋ a tlaa ɗi. She tǝ man nga Yesu tǝ man tu mures ɗaŋ mǝnndǝŋsǝ tǝ nywaal ɗi ɓastii a tsǝtnngǝn a yaasǝŋ Yesu aa caa lǝŋsǝ ɗi ɓitalghǝn wos aa ta sutǝɗi.She vǝrtǝ ta ngaɓ shi waasǝŋǝi. ³⁶ Zarse ɗaŋ tǝ ta yel ngǝtn yo ɗaŋ a tlaaɗi tǝ fuu gyagon datǝpm ngǝ fuɗkǝn mures ɗaŋ mǝnndǝŋsǝ ca fi vartǝ tǝ yaanii. ³⁷ She ɓurug zarse kǝ yaatl Gerasinawas tǝ wul Yesu tu tǝ tlii tǝ gaa shi yaatl waasǝŋ mǝn durghǝ tu vǝrtǝ aa ta ngaɓ shi waasǝŋǝi nǝ naa jomjomni. She a ta ndai giɓ zhuŋ nge zha tǝ ta sushi kaar. ³⁸ Mures ɗaŋ mǝnndǝŋsǝ tǝ ta nywaal ɓastii a ta kara tu tǝ gaa tǝ tǝǝ tlii cim tǝ. Beɗ tǝ gii Yesu ta sular tǝ kaar wul tu, ³⁹ "Sughǝ kaar dǝn aa fuu zarsǝ dǝllǝŋsǝ ngǝtn yo ɗaŋ Cogn aa fighǝ mǝn." Mures ta mbi datǝpm wos tlii annda yi fuu zarsǝ ghǝ dǝllǝŋsǝ yaatl ɓurug gya ngǝtn yo ɗaŋ Yesu fitǝ mǝn. ⁴⁰ A kili yo ɗaŋ Yesu sutǝɗi, zarsǝ tǝ tsal tǝ, ɓurug waasǝŋ tǝ tayi ɓastǝ ɓuɓkǝn. ⁴¹ Swaaɗ murwon ghǝn cighǝni ɗaŋ sǝm wos tu Yayirus, gyo ɗaŋ ci namboŋ a giɓkǝ mǝn varaŋsǝ viin ladi Yahudawa. A man man ndaaɗ a ken ngǝ Yesu, she a kara tǝ tu tǝ man ɗaa tǝ dǝn, ⁴² durghǝ yo tu nyii wos namboŋ, ŋaa ghǝ voni dzuɓ tlii ti mbǝtlǝm, a ta yi a mǝskǝn. Ɗaŋ Yesu ta yi a tlǝghǝn wos gutuli zarsǝ tǝ ta gomtsak tǝ. ⁴³ Gǝɗ won tayi ɗa ɗan ɗaŋ caa dlaa voraŋ nǝghǝ voni dzuɓ tliiti mbǝtlǝm, aa ɗu wurɓa woshii ɓurug a mǝn wugn, beɗ tǝ gii gon ɗyaa fuɗ tǝ hŋ. ⁴⁴ She a ta man te kaar Yesu man tǝǝn luu wos. She swaaɗ dlaaghǝn voraŋ nyes ta dlǝǝrii ⁴⁵ She Yesu ta wul tu, Nuu ghǝn a tǝǝn mi yo?" Ɗaŋ ɗeɓaɗ tǝ ci vii ghai Biturus wul tu, "Daadǝn, ɗaŋ ɓurug zarsǝ taa ngirǝŋngǝi ci ɓaskǝ gomtsakkǝn." ⁴⁶ Yesu wul tu, "Gon tǝǝnǝn, durghǝ tu mǝ wum ɗaŋ vartǝ nyol ɓasǝm." ⁴⁷ Ɗaŋ gǝɗes a yel ɗaŋkutu wo ɗyaa waaɗ tǝ hŋ, she a man tǝ vǝrtǝ man ndaaɗ a ken wos. A ta kon a ken zarsǝ ɓurug dei yo ɗaŋ a caa a tǝǝn tǝ tǝ yo ɗaŋ a byaatlii swaaɗ kyaɗ. ⁴⁸ She a wul gǝdes tu, " Nyiin, caaghǝn raa waa a caa kǝ byaatlii. Tlǝ tǝ raaghǝ wusni." ⁴⁹ Ɗaŋ ata yigha wulghǝn vii she gon ta dlam ɗdǝn ngǝ mǝnvar ghǝ viin laadi Yehudawai man wul tu, "Nyii wai aa mǝshii, vuu raa Malǝm mǝn ɗa vuŋ." ⁵⁰ Beɗ tǝ gii ɗaŋ Yesu wum gin, ata wul Yayirus tu, "Vǝrtǝ tǝ ngaɓkǝ hŋ, caa raai kurum, nyi waai wo fuɗi." ⁵¹ Ɗaŋ ata man ɗa dǝnes ata gaa gon tǝ nda tǝ laaɓ tǝ hŋ, she Biturus,tǝ Yohanna tǝ Yakuɓ, tǝ daa nyees tǝ naagos. ⁵² Ɓurug zarse tǝ ta yi gha miitsǝ tǝ ngaarghǝn nǝ mǝskǝn nyees.Beɗ tǝ gii Yesu wul shi tu, "Ngwaarǝn hŋ; aa mǝs hŋ, cini gha kuci." ⁵³ Beɗ tǝ gii tǝ ta gyomtlǝ tǝ, durghǝ tu taa yisǝŋǝi nyees aa mǝshii. ⁵⁴ She ata ngaɓ taas wos cim tǝ wul tu, "Nyiin, shishi." ⁵⁵ Zhipti wos ta sutǝɗi, she ata shishi swaaɗ. Ata caa shi tǝ ŋal tǝ ngǝtn ngǝ cighǝn mǝn ɗi tǝ ci. ⁵⁶ A ta kwasar mǝn bwaaghǝn wos, beɗ tǝ gii Yesu ta caa shi yir tǝ fuu gon ngǝtn ɗaŋ a fi hŋ.