¹ Ciɗa a giɓkǝ mbuɗkǝnnes, she Kaisar Augustas a ta gǝmvi ndǝr kon tu tǝ kwaan zarsǝi ɓuruk ɗaŋ ca tsǝtn a giɓkǝ ɗǝgn. ² Gin ghǝn a ta yi nǝ kwaanngǝn kǝ kenni ɗaŋ tǝ ta fi a kiliyo ɗaŋ Kiriniyus a ta yi nǝ guŋngǝ Suriya. ³ Nǝ durghǝ cik, ko nu tǝ sutǝ ɗatǝ yatl duryo tu tǝ dlaaɗ sǝmwoshi nǝ durghǝ kwaanngǝnnes. ⁴ Yusufu beɗ a ta shishi ga yatl kǝ Nazareɗ ɗi tlii nǝ ghǝ yatl kǝ Baitalami ɗaŋ yi Yahudiya, gyo ɗaŋ caa cimtǝ tu yatl ghǝ Dauda, duryo tu cinǝ wusuli ghǝ giɓ dǝn ghǝ Dauda. ⁵ A ta tlii ɗan tu tǝ dlaaɗ sǝmwoshi tǝ gǝɗiwos Maryamu gyo ɗaŋ nǝ gǝɗ shiiliwos ɗaŋ ci tǝ ŋaavwaa. ⁶ A naai tu ɗaŋ ci ɗa ɗan, kili ta fi ɗaŋ wo ɓwaa kuniwos. A ta ɓwaa kuniwos, kuniwos kǝ keni ghǝnndi, a ta karghaɗti ndarara tǝ gya vwaapm. ⁷ A ta gǝmti a giɓ kumbur ghǝ tǝmsa, nǝ dur yo tu viin ghǝ kaɓkǝn sǝmmbǝrsǝ ta yi ɗa nǝ dur wasǝŋ hŋ. ^{8 9} A giɓkǝ lǝɓi ges, mǝn lyaaghǝn tǝmsa won ɗa ɗani ɗaŋ caa tsǝtn a dǝǝl cigha paŋngǝn gutuli tǝmsa waasǝŋ kavid. A ngaalaa hŋ, she zhipti ghǝ shinngǝn Daadǝn a ta man ɓashi, luughǝn ghǝ Daadǝn a ta mbaa lǝɓeshi ɗaŋ cighai, she vǝrtǝ ta ngaɓshi waashi mbun- mbun. ^{10 11 12} she zhipti ghǝ shinngǝnes a ta wulshi tu, '' Ɓak wum vǝrtǝ hǝŋ, nǝ dur yo tu mǝ lǝǝrkini vik wusni mǝnndi ɗaŋ wo caaki polghǝn monnda tǝ ɓuruk zarsǝ. yawon ta ɓwaaki murghǝ vuumngǝn waan mǝn a giɓkǝ yatl kǝ Dauda! yan nǝ gi daŋ nǝ ɓorghǝni Daadǝn! gin ghǝn ci gidkǝn yo daŋ ta vǝrki. ka yel ŋaa na bartu nǝ karghadkǝn tǝ vwaapm cigha mɓuɗkǝn giɓ kumbur tǝmsa.'' ¹³ Swaaɗ, she dǝllǝk jwaamngǝn won ghǝnndi gaami tǝ gya zhipti ghǝ shinngǝn Cogn cigha luughǝn Cogn, ci yi wultu, ¹⁴ ''luughǝn a Cogn gaami, gaan wusni tǝ naa a ɗǝgn a dlǝk kǝ zarsǝn ɗaŋ ca wum wusǝŋngǝn waasǝŋ.'' ¹⁵ A naai a kiliyo ɗaŋ gya zhipti shinngǝn Cogn tǝ ta gaashi wasǝŋǝi tǝ taai gaami, she mǝn lyaaghǝn tǝmsas tǝ wul dlǝŋsǝ wasǝŋ tu, ''Mǝ tlǝnni Baitalami mǝ yel ngǝrshi gin ɗaŋ a fiin,gyo ɗaŋ Daadǝn giɗmi wopǝn.'' ¹⁶ Tǝ ta fi motl-motl tǝ tlii ɗa ɗannes tǝ tu Maryemu ci tǝ Yusufu, tǝ yel ŋaa nabartos a mbuɗkǝn a giɓ kumbar. ¹⁹ Ɗa kaari ɗaŋ tǝ yel tǝ, tǝ fuu zarsǝ ngǝtn yo ɗaŋ tǝ fuushi a duulgaam kuni gines. ¹⁸ Ɓuruk mǝn yo ɗaŋ tǝ wum, a kwasarshi monnda a duulgaam ngǝtn yo ɗaŋ mǝn lyaaghǝn tǝmsas tǝ fuushi. ¹⁷ Beɗ tǝ gi yan Maryemu a ciken tǝ ɓitalghǝn a ngǝrshi gya gi ɗaŋ a wummi, cigha ɓitalghǝn shoŋ-shoŋ a giɓkǝ raawos. ²⁰ Mǝn lyaaghǝn tǝmsas tǝ ta sushi cigha luughǝn tǝ zǝghǝrghǝn Cogn nǝ durghǝ ɓuruk ngǝrshi gya gi ɗaŋ tǝ wummi, tǝ ndǝr tǝ yelli, yin ɗaŋ gi ɗaŋ tǝ fuushi washi. ²¹ Ɗaŋ a tuli mbuɗkǝn tan- tan, kiliyo ɗaŋ ta sǝǝrǝ kuneshi, she tǝ ta caa tǝ sǝǝm tu Yesu, sǝǝm yo ɗaŋ zhipti shinngǝnes ta vǝrtǝ ghǝnndi annda tǝ mbi ŋaavwa wos. ²² Ɗaŋ mbuɗkǝn ghǝ coɓkǝn voraŋ ghǝ nabartuyes ta latsǝi, ɗaŋ gi ɗaŋ Musa dlyaaɗi, Yusufu citǝ Maryemu tǝ ta lǝǝrti giɓ vin ladi Urshelima duryo tu tǝ vǝrtǝ Cogn. ²³ Ɗaŋ gi ɗaŋ tǝ dlyaaɗ a mborkighǝ Daadǝn, ''ta ciim ɓuruk ŋaa kǝ gami tu, ndzǝkni ghǝ Daadǝn.'' ²⁴ Tǝ ta man tu tǝ vǝr ngǝtn ɗaŋ gi ɗaŋ tǝ kon dǝǝl ghǝn vighǝ Daadǝn, ''kumri mbǝtlǝm tǝ vumbur mbǝtlǝm.'' ²⁵ Yanngǝnni, murwon ciɗa ɗaŋ sǝǝmwos tu Siman. Mures nǝ zarbghǝ taŋ-taŋnyi tǝ mbuughǝn Cogn beɗ. Ci gha ɓuɓkǝn murghǝ mbutarghǝn raa mǝn Isar'ila, zhipti var ghǝ ndzǝkni ci ɗa tǝ gaam. ²⁶ Tǝ giɗtǝ a te zhipti var kǝ ndzǝkǝn tu wo mǝs hŋ hal she ya yel gi ɗaŋ nǝ ɓorghǝn ghǝ Daadǝnni. ²⁷ Dzaŋ gon won Siman ta man vin ladi a te cimngǝn ghǝ zhipti var ghǝ ndzǝkkǝni. Ɗaŋ mǝn mbwaaghǝn woshes tǝ ndar kuneshi ɗi ɗa giɓes, Yesu ghǝnndi, nǝ duryo tu, tǝ yugn ngǝtn yo ɗaŋ ɗǝǝlghǝn ves ca suu. ²⁸ Siman kaɓti a giɓ ghǝ taaswos, a zǝghǝr Cogn wul tu, ²⁹ ɗaŋni ga mon wa tǝ tli tǝ wusni ghǝ raa, Daadǝn, ɗaŋ gi ɗaŋ kǝ koni. ³⁰ Nǝ duryo tu yiratn a yel kaɓkǝni wai, ³¹ gyo ɗaŋ kǝ ɓumtsǝ a ken ghǝ zarsǝ ɓuruk. ³² Nǝ mbaaghǝn ghǝ giɗkǝn Cogn a zarsǝ ɓuruk, beɗ tǝ luughǝn ghǝ zarsǝwa Isar'ila.'' ³³ Daaghǝ kunes tǝ naashi, a kosarshi, nǝ durghǝ ngǝtn yo ɗaŋ tǝ kon a gamashi. ³⁴ Siman gǝmshi mbuni mǝn a wul naashes Maryemu tu, ''wum gin ndarara, kunin wo na nǝ dekkǝ ndaaɗkǝn tǝ shishighǝ zarsǝ monnda ghǝ Isar'ila, nǝ giɗkǝn tu ta nyaŋngas tǝ. ³⁵ Dur tu wo taar raa wai ɗaŋ gi ɗaŋ ɓitalghǝn zarsǝ wo giɗ.'' ³⁶ Gǝɗ won murghǝ shinngǝn Cogn ɗaŋ sǝǝmwos tu Annatu ciɗa ɗuun. Nǝ nyighǝ Fanuliya giɓ dǝn ghǝ Ashiru. A ta yi nǝ ndotsǝ gǝɗ. A ta yi tǝ tuurwos ɗaŋ a kaɓtǝ tǝ voni wattsǝmai ɗaŋ tǝ laatsǝ. ³⁷ Ɗaŋ tuurwos mǝs, a ta fi tsǝtnngǝn wos nǝghǝ voni tashi tan-tan tliti wuɓsǝ. A ta ya ga vin ladi hŋ, a ta ciken tǝ luughǝn Daadǝn, dzaŋ tǝ kaviɗ. ³⁸ A kili gya ges, a ta tai ɓashi nda nyarghǝn Cogn. A ta fuu ɓuruk gya gon ɗaŋ cigha ɓuɓkǝn ghǝ kaɓkǝn Urshelima. ³⁹ Ɗaŋ tǝ ɓan konighai ɗaŋ caa su tǝ fes ɗaŋ gi ɗaŋ dǝǝlghǝn vi ghǝ Daadǝni, tǝ ta sushi Galili, tǝ tlii giɓ yatl wasǝŋ, Nazareɗ. ⁴⁰ Kunes ta luui ndǝr tlyaai, saghaɗkǝn wos ta ɓǝɗkai, gyal ghǝ Daadǝn beɗ a ta yi ɗaa tǝ gaam. ⁴¹ Mǝn ɓwaaghǝn wos ca yi tlǝ Urshelima ko voni gyo nǝ durghǝ zakkǝn lǝpm kǝ tlǝghǝnni. ⁴² Ɗaŋ ci voni dzuɓ tliti mbǝtlǝm, tǝ ta taai ɗa ɗa daɓ a kili ghǝ zakkǝn lǝpm ɗaŋ gi ɗaŋ caa yi. ⁴³ Ɗa kaari ɗaŋ tǝ ɓan mbuɗkǝn ghǝ zakkǝn lǝpeshi, tǝ ta ndashi sughǝnndi dǝn. Beɗ tǝ gi ŋaa kunes Yesu a ta naai kaar tsǝti Urshelima, tǝ cik mǝn ɓwaaghǝnwos taa ta yisǝŋ hŋ. ⁴⁴ Caa caraa tu citǝ zarsǝi gya gon ɗaŋ cigha riighǝnndi cimshi, tǝ ta ciken tǝ riighǝn nǝ ghǝ mbuɗkǝn namboŋ. Tǝ ta nda ŋalghǝnwos a giɓkǝ zarsǝ wasǝŋ tǝ gya kamsa wasǝŋ. ⁴⁵ Ɗaŋ tǝ yeltǝ həŋ, tǝ ta sushi Urshelima tǝ nda tǝ ŋalghǝn ɗa ɗan ⁴⁶ Ɗaŋ mbuɗkǝn maayi ta laatsǝi, tǝ ta tutii giɓ vin laadi, cigha tsǝtnngǝn a dlek malǝmshi, ci ɓashi sǝǝghǝn kǝǝm cigha ceɗkǝn wasǝŋ beɗ. ⁴⁷ Ɓuruk gya gyo ɗaŋ caa wumtǝ a kosarshi tǝ yisǝŋ ngǝtn yo ɗaŋ yir tǝ suughǝn yo ɗaŋ ca sushiɗa. ⁴⁸ Ɗaŋ tǝ yeltǝ, a kosarshi mbun-mbun . Naashi wultǝ tu, ''kunetn, ni ghǝn ca kǝ fimii cighǝi? Wumi, Daagwa tǝ myan mi ɓaskǝ ŋalghǝn tǝ raa malarghǝn.'' ⁴⁹ A wul shi tu, ''Ni ca ghǝnnda kya ŋalme? kaa yisǝŋ tu a naa ciɓ mǝ na a dǝnngǝ Daagǝtn hŋaa?'' ⁵⁰ Beɗ tǝ gi tǝ yisǝŋ ngǝtn yo ɗaŋ a kon a viwoshes hŋ. ⁵¹ She a shishi a laaɓshi tǝ sushi Nazareɗ ci cimshi a ciken tǝ wumngǝn vi mǝn ɓwaaghǝn wos. Naashi ta num ɓuruk ngǝrshi gya gi a raawos cgha ɓitalghǝn ghai. ⁵² Beɗ tǝ gi Yesu ciken tǝ yisǝŋngǝn tǝ luughǝn, a ndǝr tu kaɓkǝn a Cogn tǝ zarsǝ.